ប្រជាពលរដ្ឋខ្មែរដែលប្រកបរបរនេសាទនៅសមុទ្រក្នុងខេត្ដកោះកុង និងខេត្ដកំពត ចោទលោកផ្កាយ៣ ទូច ពលៈ ថា ឃុបឃិតគ្នាបែបពុករលួយ បើកដៃឱ្យជនជាតិវៀតណាមប្រើឧបករណ៍ល្មើសច្បាប់ចូលនេសាទយ៉ាងអណាធិបតេយ្យ ឯពលរដ្ឋខ្មែរមិនឲ្យចូលនេសាទ
(ភ្នំពេញ)៖លោកផ្កាយ៣ ទូច ពលៈ ប្រធាននាយកដ្ឋាននគរបានលព្រំដែនទឹក កំពុងរងការរិះគន់យ៉ាងចាស់ដៃពីប្រជាពលរដ្ឋខ្មែរដែលប្រកបរបរជានេសាទនៅសមុទ្រក្នុងខេត្តកោះកុង និខេត្តកំពត ថា បានបើកដៃឲ្យជនជាតិវៀតណាម ប្រើប្រាស់សុទ្ធតែឧបករណ៍ដែលច្បាប់ហាមឃាត់ ដូចជា ការឆក់ អួនព័ទ្ធភ្លើង ទូកអូសគូរជាដើម ចូលមកនេសាទក្នុងដែនសមុទ្រកម្ពុជាយ៉ាងអណាធិបតេយ្យ ជាហេតុធ្វើឲ្យបានបង់ធនធានធម្មជាតិ ពូជមច្ឆាសមុទ្រយ៉ាងធ្ងន់ធ្ងរ ក្នុងកម្រិតទ្រុងទ្រាយធំនាថ្ងៃអនាគត ។
ប្រភពពីប្រជាពលរដ្ឋខ្មែរ ជាអ្នកនេសាទច្រើនគ្រួសាររស់នៅស្រុកគីរីសាគរ ខេត្ដកោះកុង និងប្រជាសហគមន៍នេសាទ នៅត្រពាំងរពៅ ខេត្ដកំពត បានសម្តែងការហួសចិត្ដជាពន់ពេកស្រែកយំដោយសារ លោកផ្កាយ ៣ ទូច ពលៈ ជាប្រធាននាយកដ្ឋាននគរបាលព្រំដែនទឹក ប្រើក្បាច់កន្ទេធំបន្លំដេក នៅតែបន្ដប្រព្រឹត្ដនូវអំពើពុករលួយជាប្រព័ន្ធ ដោយគ្មានខ្លាចញញើតច្បាប់អ្វីបន្ដិចសោះ បណ្ដោយឱ្យទូកនេសាទជនជាតិវៀតណាមជាច្រើនគ្រឿង ប្រើប្រាស់ឧបករណ៍ខុសច្បាស់ ចូលនេសាទក្នុងដែនសមុទ្រកម្ពុជាដោយសេរី និងគ្មានការបង្ក្រាបអ្វីបន្ដិចសោះ។
ពលរដ្ឋខ្មែរបន្តថា មូលហេតុដែលជនជាតិវៀតណាម ចូលមកនេសាទល្មើសច្បាប់ដោយសេរីគ្មានខ្លាចញញើតនោះ ក៏ព្រោះតែមានការបើកដៃពីលោក ទូច ពលៈ ដោយបង់លុយឲ្យទៅប្រពន្ធលោក ទូច ពលៈ និងឈ្មោះ ឆាយ សុវណ្ណ ហៅស្នា ដែលជាដៃស្ដាំរបស់លោក ទូច ពលៈ ក្នុងមួយទូកយ៉ាងតិច ៤០០០ ទៅ ៥០០០ ដុល្លាអាមេរិក ជាថ្នូរនឹងការចូលនេសាទខុសច្បាប់ រីឯប្រជាពលរដ្ឋខ្មែរ ដែលប្រកបរបនេសាទ ត្រូវបានលោកផ្កាយ ៣ ដ៏មានឥទ្ធិពលខាងពុករលួយ ទូច ពលៈ ឲ្យប៉ាក់ពួកធ្វើទុកបុកម្និញ មិនឲ្យប្រជានេសាទខ្មែរដែលជាម្ចាស់ទឹកដី ចូលនេសាទនោះឡើយ ជាហេតុធ្វើឲ្យពួកគាត់មានការខឹងសម្បារជាខ្លាំង។
ប្រជាពលរដ្ឋបានលើកឡើងទៀតថា ក្រៅពីលោកផ្កាយ៣ ទូច ពលៈ ប្រព្រឹត្ដអំពើពុករលួយលើផលនេសាទហើយ លោកក៏បើកដៃឱ្យប្រពន្ធ និងក្រុមពីរនាក់ប្ដីប្រពន្ធ ឈ្មោះ វៀង ថាន់ទៀង ជាប្ដី និងឈ្មោះ ម៉ី ជាប្រពន្ធ នាំចូលនិងនាំចេញនូវទំនិញគេចពន្ធ ដូចជាប្រេងឥន្ទនៈ បារី គ្រឿងសមុទ្រគ្មានគុណភាពផងដែរ ហើយពីនាក់ប្ដីប្រពន្ធជនជាតិវៀតណាមខាងលើនេះ ជាមេខ្យល់ ដែលបាននាំយក ទូកនេសាទវៀតណាម ខុសច្បាប់ចូលក្នុងព្រំដែនសមុទ្រខ្មែរបានសួ្រលៗ ដោយអាងលោកផ្កាយ៣ ទូច ពលៈ ជាខ្នងបង្អែកធំ។នេះជាការរៀបរៀងស៊ីជាប្រព័ន្ធ មិនលាន់លឺដល់ថ្នាក់លើ សន្ងំស្ងាត់ឈឹងគ្មានអ្នកណាហ៊ានក្អកនោះទេ។ បើកូនចៅណាហ៊ាននិយាយ នោះអធិរាជសមុទ្រនឹងមិនទុកមុខឡើយ។
ប្រជានេសាទខ្មែរម្នាក់បានរអូរទាំថា នៅពេលទូកខ្មែរចេញទៅនេសាទលើទឹកដីរបស់ខ្លួនឯងសោះ បែរជាពួកវៀតណាមហាមឃាត់ ព្រមទាំងប្ដឹងទៅលោក ទូច ពលៈ ជាប្រធាននាយកដ្ឋាននគរបាលព្រំដែនទឹក ឱ្យចាប់ទូកនេសាទខ្មែរទៅវិញ នេះពិតជាអំពើគ្មានយុត្ដិធម៌សម្រាប់ប្រជាពលរដ្ឋខ្មែរនោះទេ មាត់ថាស្រឡាញ់ខ្មែរ ការពារខ្មែរ ប៉ុន្ដែទង្វើរផ្ទុយពីពាក្យដែលបាននិយាយ ធ្វើឱ្យប្រជាពលអស់ទំនុកចិត្ដលើមន្ដ្រីនគរបាលព្រំដែនទឹករូបនេះ។
ប្រជាពលរដ្ឋជាច្រើនគ្រួសារ រស់នៅស្រុកគីរីសាគរខេត្ដកោះកុង និងខេត្ដកំពត ទទូចស្នើសុំ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងថ្នាក់ដឹកនាំនគរបាលជាតិមេត្ដាពិនិត្យ និងជួយប្រជាពលរដ្ឋដែលកំពុងជួបនូវជីវភាពខ្វះខាតលើកមុខរបរនេសាទផងទាន។ពាក់ព័ន្ធនឹងការចោទប្រកាន់ខាងលើនេះដែរ អង្គភាពយើងមិនទាន់សុំការពន្យល់ណាមួយពីអ្នកពាក់ព័ន្ធបាននូវឡើយទេរហូតមកដល់ពេលនេះ តែទោះយ៉ាងនេះក្តីអង្គភាពយើង រងចាំការបកស្រាយពីសាម៉ីពាក់ព័ន្ធរាល់ម៉ោងធ្វើការ៕
