អភិបាលខេត្តកំពង់ចាម ណែនាំដល់មន្ទីរ អង្គភាព ពាក់ព័ន្ធទាំងអស់ ឲ្យជម្រុញដល់ក្រុមហ៊ុន សហគ្រាស ដែលប្រកបអាជីវកម្មនានា ត្រូវបំពេញបែបបទស្នើសុំប័ណ្ណប៉ាតង់
(កំពង់ចាម)៖ថ្លែងក្នុងកិច្ចប្រជុំពិភាក្សាលើសេចក្តីព្រាងគម្រោងចំណូល ចំណាយថវិកា របស់រដ្ឋបាលខេត្តកំពង់ចាម សម្រាប់គ្រប់គ្រងការចំណាយឆ្នាំ២០២៣ នាព្រឹកថ្ងៃទី២ ខែសីហា ឆ្នាំ២០២២ ឯកឧត្តម អ៊ុន ចាន់ដា អភិបាលខេត្តកំពង់ចាម បានណែនាំដល់មន្ទីរ អង្គភាព ពាក់ព័ន្ធ ទាំងអស់ ឲ្យជម្រុញ ដល់ក្រុមហ៊ុន សហគ្រាស ដែលប្រកបអាជីវកម្មនានា ត្រូវបំពេញបែបបទ ស្នើសុំប័ណ្ណប៉ាតង់ ដើម្បីគ្រប់គ្រង និងប្រមូលចំណូលពន្ធឲ្យមានប្រសិទ្ធភាពស្របតាមការរីកចម្រើននៃ សេដ្ឋកិច្ចរបស់ព្រះរាជាណាចក្រកម្ពុជា។
ជាមួយគ្នានោះដែរឯកឧត្តម អភិបាលខេត្តកំពង់ចាម បានថ្លែងការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រី ពាក់ព័ន្ធទាំងអស់ ដែលបានចូលរួមចំណែកបំពេញភារកិច្ចអស់ពីកម្លាំងកាយចិត្ត និងសម្រេចបានលទ្ធផលការងារគ្រប់គ្រង ប្រមូលចំណូលពន្ធយ៉ាងល្អប្រសើរ នាពេលកន្លងមក ។ ក្នុងនោះ ឯកឧត្តមក៏បានណែនាំដល់ មន្ទីរ អង្គភាព ពាក់ព័ន្ធទាំងអស់ ធ្វើយ៉ាងណា ត្រូវពង្រឹងការគ្រប់គ្រង និងប្រមូលចំណូលពន្ធ ឲ្យមានប្រសិទ្ធិភាព ជៀសវាងការបាត់បង់ប្រាក់ចំណូល របស់ជាតិក៏ដូចជាថវិកាសម្រាប់ធ្វើការអភិវឌ្ឍន៍ ក្នុងខេត្តកំពង់ចាមផងដែរ ។
គួរបញ្ជាក់ថា គម្រោងអភិវឌ្ឍសម្រាប់ឆ្នាំ ២០២៣ របស់សាលាខេត្តកំពង់ចាម មានដូចជា ការថែទាំដីធ្លី សួនច្បារ ព្រៃឈើ ការថែទាំ ជួសជុលអគារផ្សេងៗ និងប្រសាទ ការថែទាំ ជួសជុលផ្លូវ ផ្លូវលំ ស្ពាន និងប្រព័ន្ធលូ ថែទាំ ជួសជុលផ្លូវសំបុកមាន់ និងស្លាកសញ្ញាចរាចរក្នុងក្រុងកំពង់ចាម និង ការថែទាំប្រព័ន្ធធារាសាស្ត្រ សរុប ១៨គម្រោង ដែលសរុបថវិកាប្រមាណជា 19.386.900.000 រៀល ៕
