ខេត្តបន្ទាយមានជ័យ៖នាថ្ងៃទី១២ ខែមិថុនា ឆ្នាំ២០២៥ នៅសាលាស្រុកថ្មពួក ឯកឧត្ដម ខន កែវមនោ ទីប្រឹក្សាគណៈកម្មាធិការជាតិរៀបចំការបោះឆ្នោតនិងជាអគ្គនាយករង នៃអគ្គនាយកដ្ឋាន បានអញ្ជើញជាអធិបតីក្នុងពិធី បើកវគ្គអប់រំផ្សព្វផ្សាយ និងបញ្ជ្រាបការយល់ដឹង ស្ដីពី សារៈសំខាន់ នៃការបោះឆ្នោតនៅកម្ពុជា ជូនដល់តំណាងគណបក្សនយោបាយ សមាគមអង្គការមិនមែនរដ្ឋាភិបាល ភាគីពាក់ព័ន្ធសិស្សានុសិស្សតាមគ្រប់ក្រុង ស្រុក។
លោក កែវ ពិសី ប្រធានការិយាល័យបណ្តុះបណ្តាល និងលោក យ៉ង់ ស័ក្តិ ប្រធានលេខាធិការដ្ឋានរៀបចំការបោះឆ្នោតខេត្តបន្ទាយមានជ័យបានឡើងធ្វើបទបង្ហាញ ស្ដីពី នីតិវិធីនៃការបោះឆ្នោតនៅកម្ពុជា ដែលមានខ្លឹមសារបញ្ជាក់ថា គណៈកម្មាធិការជាតិរៀបចំការបោះឆ្នោតហៅកាត់ថាគ.ជ.ប ជាអង្គការដែលមានសមត្ថកិច្ចរៀបចំ ចាត់ចែងនិងគ្រប់គ្រងការបោះឆ្នោតជ្រើសតាំង សមាជិកព្រឹទ្ធសភា ជ្រើសតាំងអ្នកតំណាងរាស្ត្រព្រមទាំងការបោះឆ្នោតផ្សេងៗទៀតតាមការកំណត់ នៃច្បាប់ ហើយគណៈកម្មាធិការជាតិរៀបចំការបោះឆ្នោត គឺត្រូវតែអនុវត្តតាមសមត្ថកិច្ចរបស់ខ្លួនប្រកប ដោយឯករាជ្យអព្យាក្រឹត ដើម្បីឲ្យការបោះឆ្នោតប្រព្រឹត្តទៅដោយ សេរីត្រឹមត្រូវ យុត្តិធម៌ស្របតាមគោលការណ៍នៃលទ្ធិប្រជាធិបតេយ្យ សេរីពហុបក្ស ។ ហើយការបោះឆ្នោត នៅកម្ពុជាយើង ច្បាប់បានបែងចែកចេញជា២រួមមាន ការបោះឆ្នោតដោយសកល និងការបោះឆ្នោតអសកល។ ចំពោះការបោះឆ្នោតដោយសកលគឺមានន័យថា ជ្រើសតាំងតំណាងរាស្ត្រ ការបោះឆ្នោតជ្រើសតាំងក្រុមប្រឹក្សាឃុំ សង្កាត់ ដែលប្រជាពលរដ្ឋដែលមានអាយុចាប់ពី ១៨ឆ្នាំឡើង ទៅមានសិទ្ធិទៅបោះឆ្នោត ៥ឆ្នាំម្តង រីឯការបោះឆ្នោតអសកល គឺការជ្រើសតាំងសមាជិកព្រឹទ្ធសភា អ្នកបោះឆ្នោតគឺជាតំណាងរាស្ត្រសមាជិក ក្នុងតំណែង នៃក្រុមប្រឹក្សា ឃុំ សង្កាត់។
ឯកឧត្តម ខន កែវមនោ បានមានប្រសាសន៍ថា វគ្គផ្សព្វផ្សាយពីថ្ងៃនេះ គឺមានសារៈសំខាន់ណាស់ចំពោះអស់លោកលោកស្រី សិស្សានុសិស្ស បានយល់ដឹងកាន់តែច្បាស់ នៃការបោះឆ្នោតនៅកម្ពុជាយើង ហើយក៏សូមអរគុណចំពោះបងប្អូនកូនក្មួយទាំងអស់ដែលបានចូលរួម និងយកចិត្តទុកដាក់ស្ដាប់ចំពោះ បទបង្ហាញនៅថ្ងៃនេះ៕
