ខេត្តបន្ទាយមានជ័យ៖មហាកុដិ និងសមិទ្ធផលនានា នៅក្នុងវត្តពោធិសុវណ្ណសិលារាម ហៅវត្តអណ្ដូងថ្មមាស ស្ថិតនៅក្នុងភូមិអណ្ដូងថ្មមាស សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ត្រូវបានធ្វើពិធីបុណ្យពុទ្ធាភិសេក ព្រះពុទ្ធបដិមាចំនួន ៦ព្រះអង្គ សម្ភោធកាត់ខ្សែបូដាក់ឲ្យប្រើប្រាស់ជាផ្លូវការពីព្រឹកថ្ងៃពុធ ១រោច ខែជេស្ធ ឆ្នាំម្សាញ់សប្ដស័ក ពុទ្ធសករាជ២៥៦៩ត្រូវនឹងថ្ងៃទី១១ ខែមិថុនា ឆ្នាំ២០២៥ ក្រោមអធិបតីភាព ព្រះសមណាភិរ័ត ប៉ោ សុខឿន ព្រះអនុគុណក្រុងប៉ោយប៉ែត តំណាងដ៏ខ្ពង់ខ្ពស់ ព្រះឧត្តមសីលញាណ ធុល សុធា ព្រះមេគណខេត្ត។
ព្រះគ្រូ កុត្តចិត្តោ ឈិន ណារិទ្ធិ ព្រះគ្រូចៅអធិការវត្តអណ្ដូងថ្មមាស បានមាន សង្ឃដីកាបញ្ជាក់ថា សមិទ្ធផលទាំងអស់ ដែលបានកកើតឡើងនៅក្នុងបរិវេណវត្តអណ្ដូងថ្មមាសនេះ សរុបថវិកាទាំងអស់ចំនួន៤៣ ០៨២៩ដុល្លារសហរដ្ឋអាមេរិក ដោយឡែកមហាកុដិថ្មីដែលត្រូវបានធ្វើពិធីឆ្លងនៅថ្ងៃនេះត្រូវចំណាយថវិកាអស់ចំនួន ១៣០១២០ដុល្លារសហរដ្ឋអាមេរិក។ ព្រះចៅអធិការវត្តព្រះអង្គបានបន្តថា ក្នុងដំណើរការកសាងសមិទ្ធផលនានាបច្ចុប្បន្នគាត់នៅជំពាក់ថ្លៃគ្រឿងសំណង់ចំនួន ១៥០០០ដុល្លារទៀត ហើយទិសដៅបន្ត ព្រះសង្ឃ អាចារ្យគណៈកម្មការ ប្រជាពុទ្ធបរិស័ទ បានឯកភាពគ្នា ចេញនូវទីតាំងកសាងបន្តរួមមាន ព្រះវិហារថ្មី និងត្រៀមធ្វើពិធីបុណ្យបញ្ចុះខណ្ឌសីមា នៅឆ្នាំ២០២៦ខាងមុខនេះ ។ ព្រះតេជគុណ ឈិន ណារិទ្ធ ព្រះអង្គបានបញ្ជាក់បន្ថែមទៀតថា ចាប់តាំងពីឆ្នាំ២០១៩មករហូតមកដល់បច្ចុប្បន្នដែលមាន វត្តមានព្រះអង្គ ជាព្រះចៅអធិការគ្រប់គ្រងវត្តអស់រយៈពេលជាង៧ឆ្នាំកន្លងមកនេះ គឺបានកសាងនូវសមិទ្ធផលជាច្រើន ដោយថវិកាទាំងអស់បានមកពីការធ្វើបុណ្យភ្ជុំបិណ្ឌបុណ្យកឋិន បុណ្យផ្កាប្រាក់ និងប្រជាពុទ្ធបរិស័ទជិតឆ្ងាយមានសទ្ធាជ្រះថ្លាចូលរួម ។
ព្រះសមណាភិរ័ត ប៉ោ សុខឿន បានមានសង្ឃដីកាថា យើងទាំងអស់គ្នាបានមកចូលរួមធ្វើបុណ្យធ្វើទានយ៉ាងអធឹកអធមសប្បាយរីករាយ នៅក្នុងពេលនេះដោយសារប្រទេសជាតិ មានសុខសន្តិភាពពេញលេញ ក្រោមនយោបាយឈ្នះឈ្នះ របស់សម្តេចតេជោ ហ៊ុន សែន អតីតនាយករដ្ឋ នៃព្រះរាជាណាចក្រកម្ពុជា និងសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រីបច្ចុប្បន្ននេះ ដូចនេះចូរយើងទាំងអស់គ្នារួមគ្នាថែរក្សាសុខសន្តិភាព អោយបាន។ ចុងក្រោយគណៈអធិបតី ដែលជាម្ចាស់សទ្ធាធំ បានកាត់ខ្សែបូឆ្លង មហាកុដិនិងរាប់បាត្រព្រះសង្ឃ ចំនួន៨០អង្គផងដែរ៕
