ខេត្តបន្ទាយមានជ័យ៖ប្រជាពលរដ្ឋបានប្រទះឃើញនិងរាយការជូនសមត្ថកិច្ចករណីប្រទះឃើញសាកសពបុរសម្នាក់ មិនស្គាល់អត្តសញ្ញាណ ត្រូវបានគេដឹកតាមរថយន្ត សេរីទំនើបម៉ាកLexus ពាក់ស្លាកលេខ កម្ពុជា ST-1001 យកមកប្លុងចោល ត្រង់ចំណុចភូមិបឹងស្នោរ ស្ថិតនៅក្នុងឃុំស្លក្រាម ស្រុកស្វាយចេក ខេត្តបន្ទាយមាមជ័យ។
តាមប្រភពព័ត៌មានពីសមត្ថកិច្ចព្រំដែនបានអោយដឹងថា កាលពីវេលាម៉ោង១៣:១០នាទីរសៀល ថ្ងៃទី២០ ខែឧសភា ឆ្នាំ២០២៥ មានប្រជាពលរដ្ឋបានជូនដំណឹងពីករណីប្រទះឃើញសាកសពបុរសម្នាក់ មិនស្គាល់អត្តសញ្ញាណ ត្រូវបានគេដឹកតាមរថយន្ត ម៉ាកLexus ពាក់ស្លាកលេខ កម្ពុជា ST-1001 និងរថយន្តមួយទៀតម៉ាកដូចគ្នាកពាក់ស្លាកលេខភ្នំពេញ2CA6968យកទៅប្លុងចោល ត្រង់ចំណុចភូមិបឹងស្នោរ ឃុំស្លក្រាម ស្រុកស្វាយចេក ខេត្តបន្ទាយមានជ័យ។ ភ្លាមៗនោះ យោធា៥០៣ ដឹកនាំកម្លាំងកង៥០៣ចំនួន០២នាក់ សហការជាមួយកម្លាំងអធិការដ្ឋាននគរបាលស្រុកស្វាយចេក ចំនួន១៥នាក់ កម្លាំងប្រជាការពារភូមិបឹងស្នោរចំនួន៥នាក់ បានចុះដល់ទីតាំងកើតហេតុ ធ្វើការកាយដីយកសាកសពជាសាកសពបុរសសង្ស័យជាជនជាតិបរទេសនិងធ្វើកោសល្យវិច្ច័យសាកសពជាបុរស តែមិនបានបញ្ជាក់ពីអត្តសញ្ញាណជនរងគ្រោះនៅឡើយទេ។
តាមប្រភពពីកន្លែងកើតហេតុបានដាក់ការសង្ស័យជាករណីឃាតកម្មជាជនជាតិចិន ព្រោះរថយន្តដែលគេថតបានជារថយន្តទំនើបដែលនៅឃុំអូរបីជាន់សំបូរទៅដោយជនជាតិចិនជិះចេញចូលក្នុងតំបន់អភិវឌ្ឍន៍មួយកន្លែងដែលទីនោះពពេញដោយជនបរទេសនិងជាទីតាំងអនឡាញផង ហើយតែងមានករណីចាប់បង្ខាំងនិងឃាតកម្មកើតឡើងលើជនបរទេសគ្នាឯង។
ក្រោយប្រទះឃើញសាកសពខាងលើសមត្ថកិច្ចបានបន្តនីតិវិធីឈានដល់ការរកឃើញរថយន្តសង្ស័យទាំងពីរគ្រឿងនៅក្នុងតំបន់អភិវឌ្ឍន៍(ភូមិចិន)និងឃាត់ខ្លួនជនបរទេសសង្ស័យពាក់ព័ន្ធបីនាក់មានជនជាតិចិនម្នាក់និងមីយ៉ាន់ម៉ា២នាក់បញ្ជូនទៅស្នងការនគរបាលខេត្តបន្ទាយមានជ័យ។
ជុំវិញករណីនេះអ្នកយកព័ត៌មានយើងមិនទាន់សុំការបកស្រាយលំអិតពីសមត្ថកិច្ចនគរបាលបានទេ៕
