ចេញផ្សាយនាថ្ងៃទី១១ ខែឧសភា ឆ្នាំ២០២៥
រាជធានីភ្នំពេញ៖ លោកជំទាវវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល បានមានប្រសាសន៍ថា ការប្រើប្រាស់សេវាសុខភាពមាតា ទារក និងកុមារ មានការកើនឡើងគួរឱ្យកត់សម្គាល់ ដែលនាំឱ្យប្រទេសកម្ពុជាសម្រេចបានជោគជ័យដ៏ធំធេង ក្នុងការកាត់បន្ថយអត្រាមរណភាពរបស់មាតា ទារក និងកុមារ ស្ទើរតែគ្រប់ស្ត្រីមានផ្ទៃពោះទាំងអស់ បានទទួលការពិនិត្យមុនពេលសម្រាល និង ៩៩%នៃការសម្រាលទាំងអស់ ត្រូវបានផ្តល់សេវាដោយបុគ្គលិកជំនាញ។ ដែលកត្តាជោគជ័យទាំងអស់នេះ ពិតជាមិនអាចកាត់ថ្លៃបានពីការចូលរួមចំណែកយ៉ាងសកម្មពីសំណាក់ឆ្មបរបស់យើង។ លោកជំទាវវេជ្ជបណ្ឌិត មានប្រសាសន៍បែបនេះក្នុងឱកាសអញ្ជើញជាអធិបតីក្នុងសិក្ខាសាលាបូកសរុបលទ្ធផលប្រចាំឆ្នាំ២០២៤ និងលើកទិសដៅសម្រាប់ឆ្នាំ២០២៥–២០២៦ របស់សមាគមឆ្មបកម្ពុជា នាព្រឹកថ្ងៃទី១០ ខែឧសភា ឆ្នាំ២០២៥។
លោកជំទាវវេជ្ជបណ្ឌិត ប្រាក់ សោភ័ណនារី បញ្ជាក់ថា ស្ទើរតែគ្រប់ស្ត្រីមានផ្ទៃពោះទាំងអស់ បានទទួលការពិនិត្យមុនពេលសម្រាល និង ៩៩%នៃការសម្រាលទាំងអស់ ត្រូវបានផ្តល់សេវាដោយបុគ្គលិកជំនាញ។ ដែលកត្តាជោគជ័យទាំងអស់នេះ ពិតជាមិនអាចកាត់ថ្លៃបានពីការចូលរួមចំណែកយ៉ាងសកម្មពីសំណាក់ឆ្មបរបស់យើង។
លោកជំទាវរដ្ឋលេខាធិការក៏បានបញ្ជាក់ទៀតថា ការកាត់បន្ថយនូវអត្រាមរណភាពមាតា ទារក និងកុមារ គឺទាមទារឱ្យគ្រប់ស្ត្រីមានផ្ទៃពោះទាំងអស់ ត្រូវតែទទួលបានការពិនិត្យ ការតាមដានរកឱ្យឃើញសញ្ញាគ្រោះថ្នាក់ ដើម្បីអាចទទួលបានការថែទាំទាំងម្តាយ និងទារកក្នុងផ្ទៃ ហើយក៏អាចទប់ស្កាត់ផលវិបាកក្នុងពេលមានផ្ទៃពោះបានទាន់ពេលវេលា និងទទួលបានការព្យាបាលសមស្រប ដោយត្រូវអនុវត្តនូវគោលការណ៍ចំនួន ៤ ដូចខាងក្រោម៖
១– គ្រប់ស្ត្រីមានផ្ទៃពោះទាំងអស់ យ៉ងតិច ៩០% ទទួលបានការពិនិត្យថែទាំ តាមដានយ៉ាងតិច៤ដង។
២– គ្រប់ការសម្រាលទាំងអស់ យ៉ាងតិច ៩០% ត្រូវធ្វើឡើងដោយបុគ្គលិកសុខាភិបាលមានជំនាញ និងនៅមូលដ្ឋានសុខាភិបាល
៣– គ្រប់មាតា និងទារកទើបកើតទាំងអស់ យ៉ាងតិច ៨០% ទទួលបានការថែទាំជាសារវ័ន្តភ្លាមៗ ក្នុងពេលសម្រាល និងក្រោយសម្រាល
៤– គ្រប់ស្ត្រីមានផ្ទៃពោះប្រឈមនឹងផលវិបាកផ្នែកសម្ភពទាំងអស់ យ៉ាងតិច ៨០% ទទួកបានសេវាសង្គ្រោះបន្ទាន់ផ្នែកសម្ភព និងការថែទាំទារកទើបកើត៕
