ចេញផ្សាយនាថ្ងៃទី១១ ខែឧសភា ឆ្នាំ២០២៥
(ខេត្តបន្ទាយមានជ័យ)៖ ផ្ទះសំបែងរបស់បងប្អូនប្រជាពលរដ្ឋនៅក្នុងក្រុងប៉ោយប៉ែត ខេត្តបន្ទាយមានជ័យ ត្រូវបានទឹកហូរជន់លិច បណ្ដាលឲ្យខូចខាតទ្រព្យសម្បត្តិសម្ភារៈប្រើប្រាស់ក្នុងផ្ទះ និងមធ្យោបាយធ្វើដំណើរមានដូចជា ម៉ូតូ រថយន្តជាដើមរងការខូចខាតយ៉ាងដំណាំ ក្រោយពីភ្លៀងធ្លាក់មួយមេយ៉ាងធំ នាថ្ងៃទី១០ ខែឧសភា ឆ្នាំ២០២៥ ។
ប្រជាពលរដ្ឋបានលើកឡើងដូចៗគ្នាថា ពួកគាត់រស់នៅម្នាក់ៗចូលជាង ២០ឆ្នាំទៅហើយមិនដែលជួបប្រទះនោះឡើយ សម្រាប់ក្រុងប៉ោយប៉ែត ទើបនៅពេលភ្លៀងធ្លាក់ម្ដងៗ មិនសូវជាខ្វល់ខ្វាយយកចិត្តទុកដាក់ប៉ុន្មាននោះទេ ពីព្រោះអាងតែភ្លៀងមកទោះតិចក្តី ខ្លាំងក្តីក៏មិនយូរប៉ុន្មានដែរនិងស្រក់ទៅវិញហើយ ។ពួកគាត់លើកឡើងទៀតថា ទឹកហូរចេញមិនទាន់ទំនងមកពីបច្ចុប្បន្នក្រុងប៉ោយប៉ែត មានការអភិវឌ្ឍន៍លូតលាស់យ៉ាងឆាប់រហ័ស ពិសេសទៅលើហេដ្ឋារចនាសម្ព័ន្ធផ្លូវថ្នល់អាគារធំៗច្រើន ដូចនេះទឹកអាចហូរមិនទាន់ មិនដូចកាលពីមុនដែលមានដីទំនេរសល់ច្រើន។
យើងក្រឡេកមើល នៅពេលមេឃកំពុងភ្លៀងធ្លាក់ សំរាមអណ្ដែតនៅលើផ្ទៃទឹកយ៉ាងព្រោងព្រាត ទាំងនេះក៏អាចជាកត្តាមួយផ្នែកដែលធ្វើឲ្យស្ទះប្រព័ន្ធលូ ទឹកហូរមិនទាន់ ដូច្នេះប្រជាពលរដ្ឋគួរតែរួមគ្នាវេចខ្ចប់សំរាមទុកដាក់ឲ្យបានត្រឹមត្រូវ ។ដោយឡែកក្រោយពីភ្លៀងធ្លាក់ឃើញថា ផ្លូវជាច្រើនខ្សែរងការជនលិច បងប្អូនប្រជាពលរដ្ឋ ពិបាកក្នុងការធ្វើដំណើរអាជ្ញាធរ និងកម្លាំងសមត្ថកិច្ចបានចុះជួយអន្តរាគមន៍ភ្លាមៗ។គិតមកដល់ថ្ងៃអាទិត្យទី១១ ខែឧសភា ឆ្នាំ២០២៥ ផ្លូវមួយចំនួនទឹកបានស្រក តែមួយចំនួនទៀតនៅឡើយ ។បងប្អូនប្រជាពលរដ្ឋមួយចំនួនបានបាចទឹកចេញពីផ្ទះ រីឯជាងធ្វើរថយន្តនិង ម៉ូតូមមាញឹកខ្លាំង ដោយប្រជាពលរដ្ឋយកទៅធ្វើច្រើន ខ្លះមិនបានធ្វើ ដោយសារជាងរវល់ខ្លាំងធ្វើមិនទាន់ ៕
