ប្រជាពលរដ្ឋរស់នៅសង្កាត់អូរជ្រៅជាង១០០គ្រួសារ លើកគ្នាតវ៉ាប្រឆាំងនឹងការអនុវត្តឲ្យរុះរើផ្ទះ សំណង់ផ្សេងៗរបស់សាលាដំបូងខេត្តបន្ទាយមានជ័យ ខណៈដែលពួកគាត់សាងសង់ផ្ទះរឹងមាំ រស់នៅជាង១០ឆ្នាំ អាជ្ញាធរដឹងឮ ទទួលស្គាល់ និងចេញប្លង់ថែមទៀត
ខេត្តបន្ទាយមានជ័យ៖ក្រោយពីទទួលបានលិខិតជូនដំណឹងមកកាន់អាជ្ញាធរក្រុងប៉ោយប៉ែត របស់សាលាដំបូងខេត្តបន្ទាយមានជ័យ ពាក់ព័ន្ធការស្នើសុំចូលរួមនីតិវិធីផ្សព្វផ្សាយ លិខិតជូនដំណឹងស្ដីអំពីការអនុវត្តដោយស្ម័គ្រចិត្ត ដោយបង្គាប់ឲ្យរុះរើកផ្ទះ សំណង់ផ្សេងៗ ចេញពីដីលំនៅឋានទំហំ ១០០ម៉ែត្រ គុណនឹង ៣០០ម៉ែត្រ ស្មើនឹង ៣ហិតា នៅចំណុចអាគារថ្មី ស្ថិតនៅភូមិអូរជ្រៅ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ដែលប្រជាពលរដ្ឋកំពុងរស់នៅ ដោយសាងសង់ផ្ទះ សំណង់រឹងខ្លះរហូតទៅដល់ច្រើនជាន់ គិតមកដល់ពេលនេះជាង ១០ឆ្នាំទៅហើយនោះ នាថ្ងៃទី២ ខែសីហា ឆ្នាំ២០២៣ ដែលត្រូវជាថ្ងៃកំណត់របស់សាលាដំបូងខេត្ត ចុះមកផ្សព្វផ្សាយលិខិតជូនដំណឹងស្ដីអំពីការអនុវត្តដោយស្ម័គ្រចិត្តនោះ ក៏ស្រាប់តែប្រជាពលរដ្ឋ១២៣គ្រួសារលើកគ្នាតវ៉ាស្នើសុំការអន្តរាគមន៍ពីរអាជ្ញាធរ ក៏ដូចជាប្រឆាំងនឹងការអនុវត្តឲ្យរុះរើផ្ទះ សំណង់ផ្សេងៗ របស់សាលាដំបូងខេត្តបន្ទាយមានជ័យ ។
នៅក្នុងការលើកគ្នាតវ៉ានោះដែរ គេសង្កេតឃើញថា ខាងប្រជាពលរដ្ឋជាង ១០០គ្រួសារ ដោយកាន់បដាមានរូបសំណាក់ព្រះមហាក្សត្រ សម្ដេចតេជោ និងឯកឧត្តម ហ៊ុន ម៉ាណែត ដោយធ្វើការស្រែកទាមទាររកយុត្តិធម៌ ក្រោយមកក៏បន្តដង្ហែរក្បួនទៅសាលាក្រុង ដោយធ្វើដំណើរថ្មើជើងតាមបណ្តោយផ្លូវជាតិលេខ៥ ក្នុងនោះមន្ត្រីសាលាក្រុង និងលោកចៅសង្កាត់អូរជ្រៅ បានចេញមកធ្វើការសម្របសម្រួល ដោយឲ្យទៅដោះស្រាយគ្នានៅលំនៅឋានវិញ លុះមកដល់លំនៅដ្ឋាន ក៏ស្រាប់តែឃើញមន្ត្រីរបស់សាលាដំបូងខេត្ត បានចុះមកចំណុចទីតាំងទំនាស់ ដោយមិនមានអាជ្ញាធរនិងសមត្ថកិច្ចមកជាមួយនោះឡើយ ក៏ត្រូវបានប្រជាពលរដ្ឋរួមគ្នាព័ទ្ធមិនឲ្យចេញ ដោយរង់ចាំអាជ្ញាធរមកដោះស្រាយ ។
ខណៈដែលប្រជាពលរដ្ឋកំពុងតែព័ទ្ធមិនឲ្យចេញ ក៏ស្រាប់តែឃើញវត្តមានលោក ង៉ោ ម៉េងជ្រួន អភិបាលរងខេត្ត បានចុះជួយសម្របសម្រួល អន្តរាគមន៍ភ្លាមៗ ជៀសវាងមានបាតុភាពណាមួយធ្វើឲ្យប៉ះពាល់ លោកក៏បានស្នើយកតំណាងប្រជាពលរដ្ឋចំនូន១៥ នាក់ និងតំណាងភាគីម្ខាងទៀតដែលជាគូទំនាស់ រួមនឹងមន្ត្រីតុលាការ ចូលរួមប្រជុំបន្ទាន់ភ្លាមៗ នៅសាលាក្រុង ដោយមិនទុកយូរទេ នាវេលាម៉ោងជិត១២ថ្ងៃត្រង់ថ្ងៃខែដដែល។
ពាក់ព័ន្ធករណីខាងលើនេះបើតាមប្រជាពលរដ្ឋបានឲ្យដឹងថា មុននឹងពួកខ្លួនហ៊ានទិញដីនេះមកសាងសង់ផ្ទះ និងសំណង់រឹងជាច្រើនជាន់នោះ ក៏ព្រោះតែមើលឃើញម្ចាស់ពុះដីឡូតិ៍លក់នោះ បានឈ្នះក្តី រហូតដល់តុលាការកំពូល ចេញសាលក្រមស្ថាពរ អាជ្ញាធរមូលដ្ឋានគ្រប់លំដាប់ថ្នាក់ បានដឹងឮ នឹងធ្វើប្លង់ជូន ព្រមទាំងបានដាក់ប្លង់នៅធនាគារ ឬអង្គការនានា ដើម្បីយកប្រាក់មករកទទួលទានទៀតផង បើភាគីម្ខាងទៀតនោះអះអាងថា ជាដីរបស់ខ្លួនហេតុអ្វីក៏មិនប្តឹងជំទាស់នៅពេលដែលប្រជាពលរដ្ឋកំពុងតែធ្វើការសាងសង់ផ្ទះ ហេតុអ្វីបានទើបមកសើរើនៅពេលនេះទៅវិញ។
ពលរដ្ឋបញ្ជាក់ថា អ្នកដែលសើរើប្ដឹងជំទាស់នោះអះអាងថា ខ្លួនតំណាងប្រជាពលរដ្ឋ ចំនួន២៥០គ្រួសារ ដែលមានឈ្មោះ វែន ខេមរិន្ទ មិនដែលចេញមុខមកដោះស្រាយ ហើយប្រជាពលរដ្ឋដែលខ្លួនគ្រប់គ្រងទាំង២៥០គ្រួសារនោះ ក៏មិនដែលឃើញ ហើយក៏មិនដែលចេញមុខមកតវ៉ា ឬបញ្ជាក់ឯកសារណាមួយថាជាដីរបស់ខ្លួននោះដែរ ទោះបីជាប្រជាពលរដ្ឋជាង១០០គ្រួសារស្នើឲ្យចេញមុខតតាំងគ្នាយ៉ាងណាក្តី តែមិនដែលឃើញចេញមកនោះដែរ ឃើញតែប្តឹងរហូតមិនចេះចប់មិនចេះហើយ ច្រើនលើកច្រើនសារ ធ្វើឲ្យពួកគាត់រកពេលវេលារកទទួលទានសឹងពុំបាន ដោយសារតែការព្រួយបារម្ភ ដេកមិនលក់បក់មិនល្ហើយ៕
