សម្តេចតេជោ ហ៊ុន សែន ជំរុញឲ្យគ្រប់ផ្នែកពាក់ព័ន្ធរួមគ្នាផ្សព្វផ្សាយបញ្ជ្រាបខ្លឹមសារអប់រំ គោលនយោបាយភូមិ-ឃុំ-សង្កាត់មានសុវត្ថិភាពរួមមាន គ្រឿងញៀន ល្បែងស៊ីសង និងសុវត្ថិភាពចរាចរណ៍ ឱ្យបានទូលំទូលាយ ដើម្បីកាត់បន្ថយអត្រាស្លាប់ និងរបួសឱ្យស្ថិតនៅក្នុងកម្រិតតិចតួចបំផុត
(ភ្នំពេញ)៖គ្រប់សាសនាទាំងអស់ នៅលើលោកនេះ សុទ្ធតែបង្រៀនមនុស្សឱ្យប្រព្រឹត្តអំពើល្អទាំងអស់ គ្មានសាសនាណាឲ្យមនុស្សធ្វើអំពើអាក្រក់នោះទេ។ សាសនាគឺផ្នែកមួយដ៏សំខាន់ មិនអាចខ្វះបាននៅក្នុងសង្គម ជាពិសេសផ្សារភ្ជាប់ជាមួយជីវិតរស់នៅរបស់ប្រជាពលរដ្ឋតែម្ដង។សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា មានប្រសាសន៍បែបនេះក្នុងឱកាសដែលសម្តេចអញ្ជើញសំណេះសំណាលជាមួយ អាចារ្យ អាចារិនីទូទាំងប្រទេសលើកទី៨ នៅមជ្ឍមណ្ឌលកោះពេជ្រ នៅព្រឹកថ្ងៃសៅរ៍ ៣រោច ខែចេត្រ ឆ្នាំខាល ចត្វាស័ក ព.ស. ២៥៦៦ ត្រូវនឹង ថ្ងៃទី៨ ខែមេសា ឆ្នាំ២០២៣ នេះ។
ជាមួយគ្នានោះដែរសម្តេចតេជោ ហ៊ុន សែន ក៏បានផ្តាំផ្ញើដល់អាចារ្យ អាចារិនីទាំងអស់ ក្នុងពិធីមង្គលការ ត្រូវសម្របសម្រួលជាមួយម្ចាស់ដើមការ ជៀសវាងការខ្វែងគំនិតគ្នាក្នុងពិធីមង្គលការ។ ក្នុងករណីម្ចាស់ដើមការតម្រូវឱ្យអាចារ្យធ្វើតាមប្រពៃណីភូមិឋានគាត់ ត្រូវតែសម្របសម្រួលតាមនោះ ដើម្បីឲ្យមានការស្រុះស្រួលគ្នាជាមួយម្ចាស់ដើមការ ក៏ដូចជាកូនកំលោះ កូនក្រមុំ។
ក្នុងនោះសម្តេចតេជោក៏បានជំរុញឲ្យគ្រប់ផ្នែកពាក់ព័ន្ធរួមគ្នាផ្សព្វផ្សាយ បញ្ជ្រាប ខ្លឹមសារ អប់រំ គោលនយោបាយភូមិ–ឃុំ–សង្កាត់ មានសុវត្ថិភាពរួមមាន គ្រឿងញៀន ល្បែងស៊ីសង និងសុវត្ថិភាពចរាចរណ៍ ឱ្យបានទូលំទូលាយ ដើម្បីកាត់បន្ថយអត្រាស្លាប់ និងរបួសឱ្យស្ថិតនៅក្នុងកម្រិតតិចតួចបំផុត។
ទន្ទឹមនោះសម្តេចតេជោនាយករដ្ឋមន្ត្រីបានបញ្ជាក់ថា ក្នុងជីវិតនយោបាយរបស់សម្តេចតែងតែជោគជ័យជារៀងរហូតមក តែសម្តេចមិនទាន់ប្រកាសថា «ខ្លួនជាគ្រូជោគជ័យទេ» ហើយក៏មិនទាន់អាចទៅបង្រៀនអ្នកដទៃពីភាពជោគជ័យនោះដែរ។សម្តេចតេជោ ហ៊ុន សែន បានមានប្រសាសន៍ប្រកាសទៅបុគ្គលពាលដែលកំពុងជ្រកក្រោមព្រះពុទ្ធសាសនា ហៅ«អាខ្មៅ» រកឱ្យឃើញជុំវិញការចោទប្រកាន់ទៅលោក ជេម សុខ ហៅ សុខ សុគន្ធ ដែលថាបានទទួលលុយចំនួន១០ម៉ឺនដុល្លារអាមេរិកពីសម្តេចតេជោ ហ៊ុន សែន។សម្តេចតេជោបានបញ្ជាក់ទៀតថា ត្រង់ចំណុចនេះ បើសុំទោស រួចខ្លួន បើមិនសុំទោសទេ សម្តេចនៅតែបន្តហៅថា«អាខ្មៅ»ជារៀងរហូត។ សម្តេចតេជោមានប្រសាសន៍សូមឱ្យមានការប្រុងប្រយ័ត្នជាប់ជានិច្ចចំពោះឧបាយកលទុច្ចរិតរបស់បុគ្គលប្រឆាំងមួយចំនួនតូច ដែលចិញ្ចឹមចិត្ត និងមានបំណងបង្កមហន្តរាយដល់សង្គម និងបំផ្លាញសុខសន្តិភាព នៅកម្ពុជាដែលកម្ពុជារកបានដោយកម្រនោះ។ សម្តេចតេជោ ហ៊ុន សែន បានមានប្រសាសន៍ ប្រកាសឱ្យប្រជាពលរដ្ឋទាំងអស់រួមគ្នាការពារសន្តិភាព សន្តិសុខ សណ្តាប់ធ្នាប់ និងរបៀបរៀបរយសង្គម ដើម្បីកម្ពុជាឆ្ពោះទៅកាន់វឌ្ឍនភាពលើគ្រប់វិស័យបន្ថែមទៀតនាពេលខាងមុខ៕
