សកម្មជនមកពីគណបក្សភ្លើងទៀន និងគណៈបក្សផ្សេងៗទៀតចំនួន ១៦៨នាក់ ស្ម័គ្រចិត្តចូលរួមជីវភាពនយោបាយជាមួយគណបក្សប្រជាជនកម្ពុជា នៅខេត្តកំពង់ធំ
ខេត្តកំពង់ធំ៖នៅរសៀលថ្ងៃទី១៤ ខែកុម្ភៈ ឆ្នាំ២០២៣ គណបក្សប្រជាជនកម្ពុជាខេត្តកំពង់ធំ បានរៀបចំពិធីសំណេះសំណាល និងប្រកាសបញ្ជូលសមាជិកមកពីគណបក្សភ្លើងទៀន និងគណៈបក្សដ៏ទៃទៀតចំនួន ១៦៨នាក់ ដែលស្ម័គ្រចិត្តចូលរួមរស់ជាមួយគណបក្សប្រជាជនកម្ពុជា ក្រោមអធិបតីភាពឯកឧត្តមបណ្ឌិត លី សាម៉េត ទីប្រឹក្សាផ្ទាល់សម្ដេចតេជោ ហ៊ុន សែន នាយករដ្ឋមន្ត្រី ជាប្រធានគណបក្សប្រជាជនកម្ពុជា និងឯកឧត្តមបណ្ឌិត ថោង ខុន សមាជិកគណៈកម្មាធិការ កណ្តាល និងជាអនុប្រធានទី១ ក្រុមការងារគណបក្សចុះមូលដ្ឋានកំពង់ធំ អមដំណើរឯកឧត្តមបណ្ឌិត មួង ឃីម , សាស្ត្រាចារ្យបណ្ឌិត ឡាយ សំរោង សាកលវិទ្យាធិការ នៃសាលកវិទ្យាល័យឥន្ទ្រវិជ្ជា រួមទាំងក្រុមការងារជាច្រើនរូប ។ក្នុងនោះក៏មានការទទួលស្វាគមន៍យ៉ាងកក់ក្តៅពីលោក ញឹក បានខេង អភិបាលរងខេត្ត តំណាងឯកឧត្តម ងួន រតនៈ ជាប្រធានគណៈកម្មការខេត្តកំពង់ធំ រួមទាំងសមាជិកសមាជិកា ប្រធានគណៈកម្មាធិការគណបក្ស ស្រុក ក្រុង លោក លោកស្រី អ្នកមុខអ្នកការ ក្រុមការងារជាច្រើនរូប។
ជាកិច្ចចាប់ផ្តើមនៃកម្មវិធីក៏មានការអានសេចក្តីសម្រេចបញ្ចូលជាសមាជិកគណៈបក្សប្រជាជនកម្ពុជា ដោយលោកជំទាវ លំ គន្ធារី សមាជិកគណៈប្រចាំការនៃគណៈអចិន្ត្រៃយ៍គណៈកម្មាធិការគណៈបក្សខេត្ត។ជាកិច្ចបន្ទាប់លោក សាន់ ណារ៉ាត់ តំណាងសមាជិកថ្មីទាំងអស់បានមានចំណាប់អារម្មណ៍ក្នុងអង្គពិធីទាំងមូលថា មូលហេតុដែលសម្រេចចិត្តរួមរស់ជីវភាពជាមួយគណបក្សប្រជាជនកម្ពុជា គឺដោយសារសម្លឹងឃើញអំពើល្អ និងការដឹកនាំល្អរបស់សម្រេចតេជោនាយករដ្ឋមន្ត្រី ធានាបាននូវការអភិវឌ្ឍន៍លើគ្រប់វិស័យ ក្នុងអត្ថន័យបង្រួបបង្រួមជាតិពិតប្រាកដ។ក្នុងនោះលោក សាន់ ណារ៉ាត់ បានប្ដេជ្ញាយ៉ាងមុតមាំថា លោក និងសមាជិកទាំងអស់នឹងស្មោះត្រង់ចំពោះជាតិមាតុភូមិ ខិតខំបំពេញការងារតាមមាគ៌ាដឹកនាំរបស់សម្ដេចតេជោនាយករដ្ឋមន្ត្រីជាប្រមុខ ហើយនឹងចូលរួមបោះឆ្នោតជូនគណបក្សប្រជាជនកម្ពុជា ទាំងអស់គ្នានាពេលបោះឆ្នោតក្នុងពេលខាងមុខ។
ក្នុងពិធីសំណេះសំណាលនាឱកាសនោះលោក ញឹក បានខេង អភិបាលរងខេត្ត តំណាងឯកឧត្តម ងួន រតនៈ ជាប្រធានគណៈកម្មការខេត្តកំពង់ធំ បានមានប្រសាសន៍ថា លោកពិតជារីករាយទទួលស្វាគមន៍យ៉ាងកក់ក្តៅ នៅពេលដែលបងប្អូនបានចូលរួមរស់ជីវភាពជាមួយគណៈបក្សប្រជាជនកម្ពុជា ហើយនេះមិនមែនជាលើកទីមួយនោះទេសម្រាប់កម្មវិធីទទួលស្វាគមន៍សមាជិកថ្មីនេះ ហើយសង្ឃឹមថា នឹងមានសមាជិកជាបន្តបន្ទាប់ទៀតចូលរួមបន្ត ។លោកជឿជាក់លើការដឹកនាំរបស់សម្តេចតេជោ នាយករដ្ឋមន្ត្រី ហើយសូមឲ្យបងប្អូនបន្តចូលរួមបោះឆ្នោតជូនគណៈបក្សប្រជាជនកម្ពុជា ដែលមានសម្តេចតេជោជាប្រធាន។
ឯកឧត្តមបណ្ឌិត ថោង ខុន សមាជិកគណៈកម្មាធិការ កណ្តាល និងជាអនុប្រធានទី១ក្រុមការងារគណបក្សចុះមូលដ្ឋានខេត្តកំពង់ធំ បានថ្លែងអរគុណបងប្អូនទាំងអស់ដែលភ្ញាក់ខ្លួន ហើយទទួលស្គាល់ការពិតវិលមករួមរស់ជាមួយគណៈបក្សប្រជាជនកម្ពុជា ឯកឧត្តមពិតជាកោតសសើរអំពីការប្តេជ្ញាចិត្តរបស់បងប្អូន សូមជឿជាក់លើមាគ៌ាដឹកនាំរបស់គណៈបក្សប្រជាជនកម្ពុជាដែលមានសម្តេចតេជោជាប្រមុខ។
ឆ្លៀតក្នុងឱកាសដ៏សែនកក់ក្តៅនេះដែរ ឯកឧត្តមបណ្ឌិត លី សាម៉េត ក៏បានមានប្រសាសន៍ស្វាគមន៍ និងសំណេះសំណាលសួរសុខទុក្ខដល់សមាជិកនៅក្នុងអង្គពិធីទាំងមូល និងបានផ្តាំផ្ញើរឲ្យប្រជាពលរដ្ឋ មានការជឿជាក់លើការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី ព្រោះសម្តេចតេជោគឺពិតជាយកចិត្តទុកដាក់ ចំពោះប្រជាពលរដ្ឋរបស់សម្តេចដោយមិនគិតពីនិន្នាការនយោបាយអ្វីឡើយ សុខទុក្ខរបស់បងប្អូនប្រជាពលរដ្ឋគឺដូចជាសុខទុក្ខរបស់គណបក្សប្រជាជនកម្ពុជា និងសូមឲ្យបងប្អូនបន្តបោះឆ្នោតជូនគណបក្សប្រជាជនកម្ពុជានៅថ្ងៃបោះឆ្នោតឆ្នាំ២០២៣ នាពេលខាងមុខនេះ មានសន្តិភាពទើបយើងមានអ្វីៗគ្រប់យ៉ាងដូចសព្វថ្ងៃនេះ។នាចុងបញ្ចប់នៃកម្មវិធីក៏មានការចែកជូននូវលិខិតបញ្ជាក់សមាជិក និងមានការថតរូបអនុស្សាវរីយរវាងថ្នាក់ដឹកនាំ និងសមាជិកដែលបានចូលរួមផងដែរ៕
