ខេត្តបន្ទាយមានជ័យ៖នៅរសៀលថ្ងៃទី០៧ ខែកក្កដា ឆ្នាំ២០២៥ ក្រុមហ៊ុន សែលកាត (Cellcard) ចូលជួបសម្តែងការគួរសម និងពិភាក្សាជាមួយ ឯកឧត្តមអភិបាល អ៊ុំ រាត្រី អភិបាល នៃគណៈអភិបាលខេត្ត និងឯកឧត្តម ប្លែក វ៉ារី ប្រធាន ក្រុមប្រឹក្សាខេត្ត នៅសាលប្រជុំ ខ សាលាខេត្តបន្ទាយមានជ័យ ដោយពិភាក្សាអំពីកិច្ចសហប្រតិបត្តិការ និងការចូលរួមឧបត្ថម្ភព្រឹត្តិការណ៍ផ្សេងៗនៅក្នុងខេត្តបន្ទាយមានជ័យ ។
តំណាងក្រុមហ៊ុន ស៊ែលកាត ក៏បានបញ្ជាក់ពី សហប្រតិបត្តិការជាមួយខេត្តបន្ទាយមានជ័យ ដែលពាក់ព័ន្ធដូចជា ការផ្សព្វផ្សាយវប្បធម៌ និងទេសចរណ៍ខេត្តបន្ទាយមានជ័យ តាមបណ្តាញឌីជីថល និងបច្ចេកវិទ្យាថ្មីៗ, ការឧបត្ថម្ភព្រឹត្តិការណ៍របស់ខេត្ត តាមរយៈជំនួយផ្នែកហិរញ្ញវត្ថុ និងបច្ចេកទេស។ បន្ថែមពីលើនេះ ក្រុមហ៊ុន សែលកាត ( Cellcard) ក៏បានបញ្ជាក់ពីគោលបំណងបង្កើតកិច្ចសហប្រតិបត្តិការ ភាពដៃគូឧបត្ថម្ភសកម្មភាពធំៗនៅតាមខេត្តបន្ទាយ មានជ័យផងដែរ។ដោយសង្ឃឹមជំនឿជាក់ថា ការសហការរបស់ក្រុមហ៊ុន ខេមជ្ជី អេសអេម ម.ក ជាមួយខេត្តបន្ទាយមានជ័យ នឹងផ្តល់នូវអត្ថ ប្រយោជន៍ជាច្រើន និងជួយលើកកម្ពស់សេដ្ឋកិច្ច ទេសចរណ៍នៅក្នុងខេត្តបន្ទាយមានជ័យ។
ក្នុងឱកាសនោះដែរឯកឧត្តម អ៊ុំ រាត្រី អភិបាល នៃគណៈអភិបាលខេត្ត ក៏បានថ្លែងអំណរគុណចំពោះក្រុមហ៊ុនសែលកាត ដែលបានជួយផ្សព្វផ្សាយអំពីវប្បធម៌ប្រវត្តិសាស្ត្រដែលមាននៅក្នុងខេត្តបន្ទាយមានជ័យ ក៏ដូចជាតំបន់ទេសចរណ៍នៅក្នុងខេត្តបន្ទាយមានជ័យ ។ ឯកឧត្ដម បញ្ជាក់ថា ក្នុងនាមរដ្ឋបាលខេត្ដ គឺគាំទ្រយ៉ាងពេញទំហឹងចំពោះកិច្ចសហការជាមួយក្រុមហ៊ុនរបស់ក្រុមហ៊ុន សែលកាត ដើម្បីផ្សព្វផ្សាយ ពីវប្បធម៌ និងតំបន់ទេសចរណ៍នៅក្នុងខេត្តឱ្យកាន់ទូលំទូលាយ ដល់បណ្ដាភ្ញៀវទេសចរជាតិ អន្តរជាតិ បានស្គាល់ពីតំបន់ទេសចរណ៍ដែលមាននៅក្នុងខេត្ត។
មួយវិញទៀតឯកឧត្តមអភិបាលខេត្ត ក៏ស្នើដល់ក្រុមហ៊ុន សែលកាត ដើម្បីបន្តផ្តល់សេវាឱ្យបានកាន់តែទូលំទូលាយពិសេសសុំឱ្យចូលរួមសហការជាមួយរដ្ឋបាលខេត្ត ក្នុងពេលមានពិធីបុណ្យទានធំៗ ដូច ពិធីបុណ្យអុំទូក បណ្ដែតប្រទីបអកអំបុក សំពះព្រះខែ ជាដើមចូលរួមពង្រីកសេវា អ៊ីនធឺណិតឱ្យបានកាន់តែទូលំទូលាយ៕
