ខេត្តបន្ទាយមានជ័យ៖លោកជំទាវ ជ័យ ណារី អ៊ុំ រាត្រី អនុប្រធាន កិត្តិយសគណៈកម្មាធិការសាខាកាកបាទក្រហមខេត្តបន្ទាយមានជ័យ រួមដំណើរដោយអស់លោក លោកស្រី សមាជិក សមាជិកា បានអញ្ជើញចុះសួរសុខទុក្ខនិងចែកជូននូវអំណោយមនុស្សធម៌ដល់ បងប្អូនប្រជាពលរដ្ឋ ដែលជាគ្រួសារក្រីក្រគ្មានទីពឹងចំនួន ១៥គ្រួសារ ស្ថិតភូមិផាស៊ីស្រា ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ នារសៀលថ្ងៃទី២៥ ខែមិថុនា ឆ្នាំ២០២៥។
លោក បឹង គឹមសឹង អនុប្រធាន គណកម្មាធិកា សាខា កាកបាទក្រហមខេត្ត តំណាង ឯកឧត្តម អ៊ុំ រាត្រី បានមានប្រសាសន៍ថា កាកបាទក្រហមកម្ពុជា គឺជាជំនួយការជូនដល់អាជ្ញាធរសាធារណៈ លើវិស័យមនុស្សធម៌ ទីណាមានបងប្អូនជួបទុក្ខលំបាក តែងដោះស្រាយឆ្លើយតបបានភ្លាមៗ ទៅនឹងភាពងាយរងគ្រោះនិងបញ្ហាប្រឈមផ្សេងៗប៉ះពាល់ជីវភាព ហើយសម្មតិកម្មដែលសាខាកាកបាទក្រហមសម្រេចបានដូចជា ជួយសម្រាលទុក្ខលំបាក ដល់អ្នករងគ្រោះក្រីក្រ គ្មានទីពឹងជួបគ្រោះអន្តរាយផ្សេងៗ វឌ្ឍនភាពរបស់សាខាទៅជាសក្ខីកម្មនៃ នៃការប្រើប្រាស់ ទទួលបានពីសប្បុរសជនគ្រប់មជ្ឈដ្ឋាន ដែលតែងតែផ្ដោតលើក្ដីស្រឡាញ់ ក្ដីមេត្តាករុណា អាណិតអាសូរ និងការចែករំលែករវាងអ្នកមានលទ្ធភាព និងងាយរងគ្រោះបំផុត ជាមួយកាកបាទក្រហមកម្ពុជាដែលបានប្រកាន់ខ្ជាប់នូវគោលការណ៍គ្រឹះទាំង៧ របស់ចលនាអន្តរជាតិ កាកបាទក្រហមអឌ្ឍចន្ទ រួមមានភាពមនុស្សធម៌ ភាពមិនលំអៀង អព្យាក្រឹតភាព ឯករាជភាព សេវាកម្មស្ម័គ្រចិត្ត និង សកលភាព។
លោក បឹង គឹមសឹង បានបន្តថា កន្លងទៅថ្មីៗនេះ សាខាកាកបាទក្រហមខេត្ត បានរៀបចំ មេទ្ទិញអបអរសាទរខួបទី១៦២ ទិវាពិភពលោកកាកបាទក្រហម និងអឌ្ឍចន្ទ ៨ឧសភា ឆ្នាំ២០២៥ ក្រោមប្រធានបទ រួមគ្នាស្ម័គ្រចិត្តដើម្បីសហគមន៍មានសុខភាពល្អ និងមានភាពធន់នឹងអាកាសធាតុ ហើយនៅក្នុងកម្មវិធីនោះក៏មានការចូលរួមបរិច្ចាគថវិកាដល់សាខាកាកបាទក្រហមខេត្តរួមមាន ព្រះថេរានុត្ថេរៈគ្រប់ព្រះអង្គ ឯកឧត្តម លោកជំទាវ អ្នកឧកញ៉ា លោកឧកញ៉ាអស់លោក លោកស្រីសប្បុរសជន ជាច្រើនដែលបានបរិច្ចាគទ្រព្យធនផ្ទាល់ខ្លួន ចូលរួមគាំទ្រដល់ កាកបាទក្រហមដើម្បីមានលទ្ធភាព ជួយដល់បងប្អូនប្រជាពលរដ្ឋដែលជួបការលំបាក ដោយពុំទុកឲ្យនរណាម្នាក់ស្លាប់ដោយអត់អាហារនោះឡើយ។ គួរបញ្ជាក់ផងដែរថាអំណោយដែលផ្តល់ជូននាពេលនេះក្នុងមួយគ្រួសារ ទទួលបានអង្ករ២៥គីឡូក្រាម មី១កេសតូច ត្រីខ១យួរ ទឹកត្រី១យួរ ទឹកស៊ីអ៊ីវ១យួរមុង១ ភួយ១ សារុង១ ក្រមា១ និងថវិកាមួយចំនួនផងដែរ៕
