(បន្ទាយមានជ័យ)៖វិទ្យាស្ថានពហុបច្ចេកទេសខេត្តបន្ទាយមានជ័យ បានរៀបចំបើកកិច្ចប្រជុំពិគ្រោះយោបល់ជាមួយវិស័យឯកជន ដែលមានការគាំទ្រដោយអង្គការ Swisscontact (ស្វីសខនថាក់)។ពិធីនេះប្រព្រឹត្តទៅក្រោមអធិបតីអភិលោក យឹម សំណាង អភិបាលរងខេត្តបន្ទាយមានជ័យ និងមានការចូលរួមពីលោក លោកស្រី ថ្នាក់ដឹកនាំក្រសួង ដៃគូអភិវឌ្ឍន៍ នាថ្ងៃទី១៥ ខែឧសភា ឆ្នាំ២០២៤ នៅសាលប្រជុំភោជនីយដ្ឋានមាតុភូមិ ក្នុងក្រុងប៉ោយប៉ែត ។
ថ្លែងនៅក្នុងឱកាសនោះលោក យឹម សំណាង បានមានប្រសាសន៍លើកឡើងថា៖កម្មវិធីកិច្ចប្រជុំពិគ្រោះយោបល់ជាមួយវិស័យឯកជនដែលជាកម្មវិធីមានសារៈសំខាន់មួយក្នុងការអភិវឌ្ឍសេដ្ឋកិច្ចជាតិក្នុងចំណោមកម្មវិធីគោលនយោបាយអទិភាពទាំង៦ ដែលរាជរដ្ឋាភិបាលបានប្រកាសដាក់ឲ្យអនុវត្តភ្លាមៗនៅមុនតំណាច់ឆ្នាំ២០២៣។ហើយឆ្នាំ២០២៤នេះជាលើកទីមួយផងដែរបានជំនួបរវាងវិស័យឯកជននិងវិទ្យាស្ថានផងដែរ។
លោក អភិបាលរងខេត្តបានមានប្រសាសន៍បញ្ជាក់ថា៖តាមរយៈការដាក់ចេញនូវ កម្មវិធីបណ្ដុះបណ្ដាលជំនាញវិជ្ជាជីវៈនិងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យនៅទូទាំងប្រទេសដែលមានចំនួនប្រមាណ១,៥លាននាក់ នៅតាមបណ្ដាគ្រឹះស្ថានអប់រំបណ្ដុះបណ្ដាលបច្ចេកទេសនិងវិជ្ជាជីវៈនានា ក្នុងកម្រិតសញ្ញាបត្របច្ចេកទេសនិងវិជ្ជាជីវៈ១ ដោយមិនបង់ថ្លៃការសិក្សានិងទទួលបាននូវប្រាក់ឧបត្ថម្ភប្រចាំខែ ២៨ម៉ឺនរៀល គឺជាវិធានការបង្រួមវិសមភាពសេដ្ឋកិច្ចមួយប្រកបដោយប្រសិទ្ធភាពនិងបរិយាបន្ន ដោយឈរលើអទិភាពគន្លឹះទី១ “មនុស្ស” និងគោលដៅយុទ្ធសាស្ត្រទី៣ “សមធម៌” នៃយុទ្ធសាស្ត្របច្ចកោណដំណាក់កាលទីមួយសំដៅសម្រេចឱ្យបាននៅគោលដៅកាត់បន្ថយភាពក្រីក្រក្នុងអត្រាទាបជាង ១០% និងបន្តខិតខំទាញទម្លាក់អត្រានៃភាពក្រីក្រឲ្យស្ថិតនៅក្នុងកម្រិតជាអប្បបរមា។
ទន្ទឹមជាមួយគ្នានោះលោក យឹម សំណាង បានធ្វើការស្នើសុំភាគីពាក់ព័ន្ធ មានរោងចក្រ សហគ្រាសមគ្រឹះស្ថាន និងក្រុមហ៊ុននៃវិស័យឯកជនទាំងអស់ ដែលបានចុះអនុស្សរណៈនៃការយោគយល់គ្នាជាមួយក្រសួងការងារ និងបណ្ដុះបណ្ដាលវិជ្ជាជីវៈលើកម្មវិធីហាត់ការ និងកម្មសិក្សា ដើម្បីផ្ដល់ឱកាសដល់សិស្សបានផ្សារភ្ជាប់ទ្រឹស្ដីជាមួយការអនុវត្តជាក់ស្ដែង និងលើកកម្ពស់ការអភិវឌ្ឍន៍ជំនាញនិងដើម្បីមានឱកាសអាចជ្រើសរើសសិស្សដែលកំពុងហាត់ការ ឬកម្មសិក្សា ដែលយល់អំពីការងារស្រាប់ឲ្យធ្វើជាបុគ្គលិករបស់ខ្លួនផងដែរ៕
