(បន្ទាយមានជ័យ)៖ លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជឣាវុធហត្ថក្រុងប៉ោយប៉ែត ដឹកនាំកម្លាំងចុះបង្ក្រាបករណីជួញដូរនិងប្រើប្រាស់ដោយខុសច្បាប់នូវសារធាតុញៀននៅចំណុចផ្សារឣគារថ្មី ស្ថិតក្នុងភូមិឣូរជ្រៅ សង្កាត់ប៉ោយប៉ែត ក្រុងប៉ោយប៉ែត និងដកហូតវត្ថុតាងបានមួយចំនួន។
លោកវរសេនីយ៍ត្រី នួន នីណារ៉ូ បានឱ្យដឹងថា មុនពេលបង្ក្រាបករណីនេះ នៅវេលាម៉ោង២០និង០០នាទី ថ្ងៃទី០៩ ខែមេសា ឆ្នាំ២០២៤ លោកបានដឹកនាំកម្លាំងចំនួន០៤នាក់ រថយន្តស៊ឺរ៉ែន០១គ្រឿង ធ្វើការចុះល្បាតការពារសន្តិសុខ រក្សាសណ្ដាប់ធ្នាប់ ជូនប្រជាពលរដ្ឋក្នុងភូមិសាស្ត្រក្រុងប៉ោយប៉ែតដូចសព្វមួយដង រហូតដល់វេលាម៉ោង២២និង០០នាទី ពេលល្បាតដល់ចំណុចខាងលើបានប្រទះឃើញយុវជនចំនួន០២នាក់ គួរឱ្យសង្ស័យ ទើបកម្លាំងហៅមកសួរនាំហើយធ្វើការឆែកឆេរលើខ្លួនប្រាណរកឃើញមានគ្រឿងញៀនប្រភេទម្សៅក្រាបពណ៌សថ្លា ចំនួន១៧កូនថង់កិប ទម្ងន់៥,៦១ក្រាម គ្រឿងញៀនប្រភេទថ្នាំគ្រាប់ រាងមូល ពណ៌ក្រហមក្បឿង(WY) ចំនួន១៧គ្រាប់ ទម្ងន់ ១,៧៤ក្រាម និងសម្ភារ:សម្រាប់វេចខ្ចប់គ្រឿងញៀនមួយចំនួន ហើយនាំមកមូលដ្ឋានកងរាជឣាវុធហត្ថក្រុងដើម្បីសួរនាំតាមនីតិវិធី។
លោកវរសេនីយ៍ត្រី នួន នីណារ៉ូ បានបញ្ជាក់ទៀតថា ជនសង្ស័យមានឈ្មេាះ ខៀវ សារ៉ាត់ ភេទប្រុស ឣាយុ២២ឆ្នាំ បច្ចុប្បន្ន រស់នៅមិនពិតប្រាកដ ក្នុងក្រុងប៉ោយប៉ែត និងឈ្មេាះ វ៉ាន់ សុភ័ក្រ្ដ ភេទប្រុស ឣាយុ៣៦ឆ្នាំ បច្ចុប្បន្ន រស់នៅមិនពិតប្រាកដ ក្នុងក្រុងប៉ោយប៉ែត។ ជនសង្ស័យទាំង០២នាក់ ក្រោយពីកម្លាំងជំនាញមូលដ្ឋានកងរាជឣាវុធហត្ថក្រុងសួរនាំរួច បានឆ្លើយសារភាពថា ពួកគេពិតជាបានទិញគ្រឿងញៀនមកលក់ផង និងប្រើប្រាស់ខ្លួនឯងផង។ដោយផ្អែកលើចម្លើយសារភាពនិងមានវត្ថុតាងជាក់ស្ដែង និងតាមការធ្វើតេស្ដទឹកនោមរកសារធាតុញៀន ជនសង្ស័យទាំង០២នាក់ ត្រូវបានកម្លាំងជំនាញកសាងសំណុំរឿងបញ្ជូនមកបញ្ជាការដ្ឋានកងរាជឣាវុធហត្ថខេត្តចាត់ការបន្តតាមនីតិវិធី។
លោកវរសេនីយ៍ឯក ជា តារា មេបញ្ជាការរង កងរាជឣាវុធហត្ថខេត្ត ទទួលការងារប្រឆាំងគ្រឿងញៀនបានឱ្យដឹងថា ក្រោយពីកម្លាំងការិយាល័យប្រឆាំងគ្រឿងញៀន កងរាជឣាវុធហត្ថខេត្ត ពិនិត្យលើសំណុំរឿង និងវត្ថុតាង ឃើញថា ជនសង្ស័យទាំង០២នាក់ ពិតជាពាក់ព័ន្ធករណីជួញដូរនិងប្រើបា្រស់ដោយខុសច្បាប់នូវសារធាតុញៀនពិតប្រាកដមែន។បច្ចុប្បន្ន ជនង្ស័យនិងវត្ថុតាង ត្រូវបានកម្លាំងការិយាល័យប្រឆាំងគ្រឿងញៀនបញ្ជូនទៅតុលាការហើយនៅថ្ងៃទី១១ ខែមេសា ឆ្នាំ២០២៤នេះ ដើម្បីចាត់ការតាមនិតិវីធី៕
