មិនដឹងជាមានវិបត្តិអ្វីនោះទេ បុរសម្នាក់បានដើរចូលក្រោមរថយន្តក្រឡុងស៊ីម៉ង់ត៍ដែលកំពុងធ្វើចរាចរណ៍នៅលើផ្លូវទំនប់ក៥ ក្នុងក្រុងប៉ោយប៉ែត បណ្តាលឲ្យកិនស្លាប់ភ្លាមៗនៅនឹងកន្លែង
(បន្ទាយមានជ័យ)៖ពិតជារន្ធត់ខ្លាំងណាស់បុរសម្នាក់ មិនដឹងជាមានវិបត្តិអ្វីនោះទេ បានដើរចូលក្រោមរថយន្តក្រឡុងស៊ីម៉ង់ត៍ ដែលកំពុងធ្វើដំណើរនៅតាមបណ្តោយផ្លូវទំនប់ ក៥ ស្ថិតនៅក្នុងសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បណ្តាលឲ្យកិនពីលើស្លាប់ភ្លាមៗនៅនឹងកន្លែង នៅវេលាម៉ោង១០ព្រឹក ថ្ងៃទី២៣ ខែមេសា ឆ្នាំ២០២៣ ។
បើតាមប្រពន្ធជនរងគ្រោះ បានឲ្យដឹងថា សពមានឈ្មោះ ឡៃ ស្នា អាយុ២៨ឆ្នាំ រស់នៅភូមិទួលប្រាសាទ សង្កាត់/ក្រុងប៉ោយប៉ែត ។ប្រពន្ធជនរងគ្រោះបញ្ជាក់ថា មួយរយះនេះមិនដឹងជាកើតអីនោះទេ ប្តីរបស់ខ្លួននិយាយប្លែកៗ ហើយនៅមុនពេលកើតហេតុប្តីរបស់ខ្លួនបានសុំលុយទិញថ្នាំសម្លាប់ខ្លួន ប្រពន្ធមិនចាប់អារម្មណ៍ស្មានតែប្តីនិយាយលេង ក៏បានឲ្យ ចំនួន២ម៉ឺនរៀល ក្រោយមកក៏ស្រាបតែប្តីដើរចូលក្រោមរថយន្តក្រឡុងស៊ីម៉ង់ត៍ បណ្តាលឲ្យកិនឈាមស្រោចមើលសឹងមិនយល់ ស្លាប់ភ្លាមៗ។
ពាក់ព័ន្ធករណីគ្រោះថ្នាក់ចរាចរណ៍ដ៍រន្ធត់នេះដែរ បើតាមប្រជាពលរដ្ឋដែលបានឃើញហេតុខាងលើបានឲ្យដឹងថា នៅមុនពេលកើតហេតុ ជនរងគ្រោះបានជិះម៉ូតូម៉ាកសង់ឌ្រីម សេរីឆ្នាំ២០១៩ ព័ណខ្មៅ ពាក់ស្លាកលេខ សៀមរាប 1AD-4621 ធ្វើដំណើរក្នុងទិសដៅពីជើងទៅត្បូងបានឡើងវ៉ារថយន្តក្រឡុកស៊ីម៉ង់ត៍ មួយគ្រឿងពាក់ស្លាកលេខ ភ្នំពេញ 5A-3148 ដែលកំពុងបើកក្នុងល្បឿនយឺតៗ ក្រោយមកក៏ឈប់ចតម៉ូតូនៅខាងឆ្វេងដៃ ដើរអោនៗ ទៅអង្គុយពីមុខរថយន្ត ភ្លាមនោះក៏ស្រាប់តែរថយន្តក្រឡុងស៊ីម៉ង់ត៍កិនពីលើបណ្តាលឲ្យបែកក្បាលឈាមហូរស្រោចពេញខ្លួនស្លាប់មួយរំពេច ។
ក្រោយពីកើតហេតុភ្លាមកម្លាំងនគរបាលជំនាញចរាចរណ៍ផ្លូវគោក នៃអធិការដ្ឋាននគរបាលក្រុងប៉ោយប៉ែត រួមនិងរថយន្តសង្គ្រោះបន្ទាន់ បានចុះធ្វើកោសលវិច្ច័យ និងធ្វើការវាស់វែង ធ្វើកំណត់ហេតុ រួចប្រគល់សាកសព ឲ្យក្រុមគ្រួសារយកទៅធ្វើបុណ្យតាមប្រពៃណី ។ចំណែកមធ្យោបាយពាក់ព័ន្ធ កម្លាំងជំនាញបាននាំយកទៅរក្សាទុកនៅអធិការដ្ឋាននគរបាលក្រុងប៉ោយប៉ែត រងចាំដោះស្រាយគ្នាជាក្រោយ ៕
