ព្រះសង្ឃ រួមនឹងរដ្ឋបាលក្រុងប៉ោយប៉ែត សមាគមចលនាយុវជនក្រុម១៥៧ និងសប្បុរសជននានាទាំងជនជាតិខ្មែរនិងបរទេស បានសហការគ្នានាំយកអំណោយចែកជូនប្រជាពលរដ្ឋដែលមានជីវភាពខ្វះខាតចំនួន ២៧០គ្រួសារ នៅវត្តឃោសត្ថារាមស្រះត្រាច ហៅវត្តត្រាច
ខេត្តបន្ទាយមានជ័យ ៖ដោយមើលឃើញពីទុក្ខលំបាករបស់បងប្អូនប្រជាពលរដ្ឋដែលមានជីវភាពខ្វះខាតនោះ ព្រះសង្ឃដឹកនាំដោយព្រះគ្រូចៅអធិការវត្តឃោសត្ថារាមស្រះត្រាច ហៅវត្តត្រាច ព្រះនាម ពេជ្រ ចាន់សីហា រួមនិងរដ្ឋបាលរក្រុងប៉ោយប៉ែត សមាគមចលនាយុវជនកម្ពុជា ក្រុម១៥៧ក្រុងប៉ោយប៉ែត លោក នួន នីណារ៉ូ មេបញ្ជាកា មូលដ្ឋានរកងរាជអាវុធហត្ថក្រុង និងសប្បុរសជននានាទាំងជនជាតិខ្មែរនិងបរទេស បានសហការគ្នារៀបចំអំណោយជាគ្រឿងឧបភោគបរិភោគ ចែកជូនដល់ប្រជាពលរដ្ឋដែលមានជីវភាពខ្វះខាតចំនួន ២៧០គ្រួសារ នៅវត្តឃោសត្ថារាមស្រះត្រាច ហៅវត្តត្រាច ស្ថិតនៅក្នុងសង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ នាចុងសប្តាហ៍នេះក្រោមអធិបតីភាពលោក គាត ហ៊ុល អភិបាលនៃគណៈអភិបាលក្រុងប៉ោយប៉ែត និងព្រះគ្រូចៅអធិការវត្ត ព្រះនាម ពេជ្រ ចាន់សីហា។
លោក គង់ រិទ្ធា ប្រធានសមាគមចលនាយុវជនកម្ពុជា (ក្រុម ១៥៧)ក្រុងប៉ោយប៉ែត សាខាខេត្តបន្ទាយមានជ័យបានមានប្រសាសន៍ថា សមាគមចលនាយុវជនកម្ពុជា (ក្រុម ១៥៧) តែងតែគៀងផ្គរ ដល់សប្បុរសជននានាទូទាំងខេត្ត ក៏ដូចជាអាជ្ញាធរ កងកម្លាំងគ្រប់លំដាប់ថ្នាក់ គ្រប់អង្គភាព ដើម្បីចូលរួមចំណែកកាត់បន្ថយភាពក្រីក្រជាមួយប្រមុខរាជរដ្ឋាភិបាល ក្នុងការផ្ទៀងផ្គរកញ្ចប់ថវិកាសម្រាប់យកទៅជួយដល់ប្រជាពលរដ្ឋដែលមានជីវភាពខ្វះខាត ចាស់ជរា គ្មានទីពឹង ជនពិការជាដើម ។
ជាមួយគ្នានោះដែរព្រះគ្រូចៅអធិការវត្ត ព្រះនាម ពេជ្រ ចាន់សីហា បានមានសង្ឃដីកាថា អំណោយដែលចែកជូននាពេលនេះមានចំនួនតិចតួច មិនគ្រប់គ្រាន់តាមតម្រូវការរបស់ប្រជាពលរដ្ឋដែលជាពុទ្ធបរិស័ទចង់បានក៏ពិតមែន តែវាអាចជួយកាត់បន្ថយការលំបាកមួយគ្រាផងដែរ។ក្នុងនោះព្រះគ្រូចៅអធិការវត្តក៏មានសង្ឃដីការដាស់តឿនដល់បងប្អូនប្រជាពលរដ្ឋ កុំឲ្យអស់សង្ឃឹមនៅក្នុងជីវិត ព្រោះថា ព្រះសម្មាសម្ពុទ្ធព្រះអង្គបានសម្ដែង ឱ្យយើងមានសេចក្តីព្យាយាម តស៊ូ អត់ធ្មត់ក្នុងការរស់នៅប្រចាំថ្ងៃ ហើយម្យ៉ាងវិញទៀតសូមឲ្យប្រជាពលរដ្ឋជាពុទ្ធបរិស័ទទាំងអស់ ត្រូវអនាម័យជាចម្បង ព្រោះថាបញ្ហាសុខភាពជាកត្តាសំខាន់ណាស់ ដូច្នេះនៅតាមផ្ទះសម្បែងត្រូវទុកដាក់វេចខ្ចប់កាកសំណល់ឬសំរាមឱ្យបានល្អ ទើបសុខភាពបានល្អប្រសើរ។
ទន្ទឹមនោះលោក គាត ហ៊ុល អភិបាលក្រុងប៉ោយប៉ែត បានសម្ដែងការកោតសរសើរ ដល់សប្បុរសជននានាទាំងជាតិ និងអន្តរជាតិដែលតែងតែចូលរួមចំណែកជាមួយថ្នាក់ដឹកនាំ ក្នុងការបត្ថម្ភជាថវិការនិងគ្រឿងឧបភោគបរិភោគផ្សេងៗ ដើម្បីជួយដល់ប្រជាពលរដ្ឋដែលមានជីវភាពខ្វះខាត ជួបការលំផ្សេងៗ ពិសេសគ្រោះទឹកជំនន់តែម្តង ។ជាក់ស្ដែងដូចជាពេលនេះជាដើម មានទាំងកងកម្លាំង អាជ្ញាធរមូលដ្ឋាននិងសប្បុរសជនទាំងជាតិ និងអន្តរជាតិ បានសហកាគ្នាឧបត្ថម្ភតាមរយៈព្រះគ្រូចៅអធិការវត្ត និងលោក គង់ រិទ្ធា បានរៀបអំណោយជាគ្រឿងឧបភោគបរិភោគ ចែកជូនដល់ប្រជាពលរដ្ឋចំនួន២៧០គ្រួសារ ក្នុងមួយគ្រួសារទទួលបានអង្ក ២៥គីឡូ ,មី ១កេះ, ទឹកសុទ្ធ២យូ ,ត្រីខ ១យូ, សារុង១ និងថវិការ ២ម៉ឺនរៀលផងដែរ កាយវិការនេះជាប្រពៃណីចែករំលែក ទំនៀមទំលាប់ដ៏ល្អរបស់ខ្មែរយើងដែលតែងតែជួយគ្នាទៅវិញទៅមក។ក្នុងនោះដែរលោកអភិបាលបានលើកឡើងអំពីសមិទ្ធផលថ្មីៗដែលរដ្ឋបាលក្រុងស្ថាបនាបានរួចរាល់ស្ថាពរមានដូចជា សួនសម្តេចតេជោឈ្នះឈ្នះ,រង្វង់មូលច្រកទ្វារអន្តរជាតិប៉ោយប៉ែត និងស្លាកលេខផ្លូវ ចាប់ពីកាស៊ីណូច្រកទ្វារអន្តរជាតិប៉ោយប៉ែត រហូតដល់ច្រកទ្វារអន្តរជាតិស្ទឹងបត់ ដែលក្នុង ៩ស្រុក ក្រុង ក្នុងខេត្តបន្ទាយមានជ័យមិនទាន់មាន ហើយនាពេលខាងមុខនេះនឹងមានសមិទ្ធផលថ្មីៗ បន្ថែមទៀតដែលបានសិក្សារួច និងក៏កំពុងបន្តសិក្សា នេះជាភ័ពសំណាងរបស់ក្រុងប៉ោយប៉ែតដែលមានសប្បុរសជនល្អៗច្រើនដែលបានចូលរួម ហើយម្យ៉ាងវិញទៀតដូចយើងបានឃើញស្រាប់ហើយថា ក្រុងប៉ោយប៉ែតមានមនុស្សស្នាក់នៅនិងចេញចូលចម្រុះទាំងជាតិនិងអន្តរជាតិ មកពីបណ្តាលខេត្ត ក្រុងផ្សេងៗជាច្រើនផងដែរ៕
