ល្បែងស៊ីសងមាន់ជល់តាមអនឡាញ បើកឲ្យលេងយ៉ាងគគ្រឹកគគ្រេង នៅភូមិកណ្ដោល ឃុំគោកពោធិ៍ រាយការជូននគរបាលស្រុកបូរីជលសារ រុញដាក់គ្នាបណ្តាក់ដូចខ្យង
ខេត្តតាកែវ៖ស្នើឲ្យស្នងការនគរបាល ខេត្តតាកែវ ដុះក្អែលលោកវរសេនីយ៍ទោ នៅ សុគន្ធ អធិការនគរបាល ស្រុកបូរីជលសារ និងលោកវរសេនីយ៍ត្រី ប៊ួយ សារ៉ាត់ មេប៉ុស្តិ៍គោកពោធិ៍ ផងទាន ព្រោះថាល្បែងស៊ីសងប្រភេទមាន់ជល់តាមអនឡាញ កើតមានឡើងរីកដូចផ្សិតនៅក្នុងមូលដ្ឋាន មិនមានចំណាត់ការទាល់តែសោះ ទោះបីជាអ្នកសារព័ត៌មាន រាយការណ៍ជូនជាច្រើនដង ពិសេសប្រាប់ទាំងទីតាំងយ៉ាងច្បាស់លាស់ ថែមទៀតយ៉ាងណាក្តី រុញដាក់គ្នាបណ្តាក់ដូចខ្យងបែបនេះ មិនដឹងជាថ្ងៃខែឆ្នាំណា?អស់ល្បែងស៊ីសងនៅតាមមូលដ្ឋាននោះទេ។
ជាក់ស្ដែងកាលពីថ្ងៃទី០៨ ខែមករា ឆ្នាំ២០២៤ ភ្នាក់ងារយើងបានខលទូរសព្ទរាយការណ៍ជូនលោកវរសេនីយ៍ត្រី ប៊ួយ សារ៉ាត់ មេប៉ុស្តិ៍នគរបាលគោកពោធិ៍ លោកបានប្រាប់ថា នឹងចុះទៅមើល ដោយរងចាំជាច្រើនម៉ោងមិនឃើញចុះបង្ក្រាប នៅថ្ងៃខែឆ្នាំដដែល ភ្នាក់ងារយើងបានបន្តរាយការណ៍ជូនលោកវរសេនីយ៍ទោ នៅ សុគន្ធ អធិការនគរបាល ស្រុកបូរីជលសារ លោកបានប្រាប់ថា លោកទទួលបានហើយនឹងចាត់ឱ្យលោកមេប៉ុស្តិ៍ចុះទៅមើល តែរហូតដល់ថ្ងៃទី១១ ខែមករា ឆ្នាំ២០២៤ ភ្នាក់ងារយើងបានបន្តខលទូរស័ព្ទទៅសួរលោកមេប៉ុស្តិ៍ម្ដងទៀត តែលោកមេប៉ុស្តិ៍បានប្រាប់ថា ទីតាំងខាងលើបានធ្វើកិច្ចសន្យាបញ្ឈប់ហើយ ។ តែគិតមកដល់ត្រឹមថ្ងៃទី១៣ ខែមករា ឆ្នាំ២០២៤នេះទីតាំងខាងលើនូវតែបន្តបើកឲ្យលេងយ៉ាងរលូនដដែលដោយមិនខ្លាចញញើតសមត្ថកិច្ចឡើយ។
ការបើកឱ្យលេងល្បែងស៊ីសងតាមអនឡាញនេះ ត្រូវបានគេមើលឃើញថា ជះឥទ្ធិពលអាក្រក់ដល់សង្គមយ៉ាងធ្ងន់ធ្ងរ ដោយពិនិត្យមើលឃើញពីផលប៉ះពាល់បែបនេះ ទើបថ្មីៗនេះ ប្រមុខរាជរដ្ឋាភិបាលកម្ពុជា បានដាក់ចេញនូវបទបញ្ជាយ៉ាងដាច់ណាត់ឲ្យមន្ត្រីថ្នាក់ក្រោមជាតិ អនុវត្តឱ្យខានតែបានដោយមិនយោគយល់ ចំពោះល្បែងស៊ីសងគ្រប់ប្រភេទ ពិសេសផ្ដោតទៅលើល្បែងស៊ីសងតាមអនឡាញនេះតែម្ដង ដែលធ្វើឲ្យប៉ះពាល់ដល់សង្គម និងប្រជាពលរដ្ឋ ព្រោះថា តំបន់ដែលមានល្បែងស៊ីសងតែងតែកើតមានឡើង នូវអំពើ និងបទល្មើសផ្សេងៗដូចជា ចោរលួច ចោរប្លន់ អំពើហិង្សាក្នុងគ្រួសារ ។ដោយសារឥទ្ធិពល នៃការញៀនល្បែង ធ្វើឲ្យប្រជាពលរដ្ឋមួយចំនួនលក់អស់ទ្រព្យសម្បត្តិ ដីធ្លី ព្រមទាំងជំពាក់បំណុលគេជុំទិស បង្កជាអសន្តិសុខក្នុងសង្គមជាដើ ម ។ដូច្នេះ ដើម្បីឲ្យប្រជាពលរដ្ឋរស់នៅ ដោយសុខសាន្ត មិនមានការភ័យខ្លាច សូមស្នើឱ្យស្នងការ នៃស្នងការដ្ឋាននគរបាលខេត្តតាកែវ មានវិធានការទប់ស្កាត់ផងទាន ដើម្បីឲ្យស្របទៅតាមគោលនយោបាយភូមិ ឃុំ/សង្កាត់ មានសុវត្ថិភាព ដែលប្រមុខរាជរដ្ឋាភិបាល បានដាក់ចេញឲ្យអនុវត្តនាពេលកន្លងមកនេះ ៕ ដោយ៖ លោក ផូង បញ្ញា
