លោកឧត្តមសេនីយ៍ទោ សិទ្ធិ ឡោះ ស្នើឲ្យម្ចាស់គណនីហ្វេសប៊ុកឈ្មោះភូ សុផល ដែលបានប្រើប្រាស់រូបភាពរបស់លោក ជានិម្មិតសញ្ញា (Logo) បញ្ឈប់សកម្មភាព និងលុបរូបភាពចេញជាបន្ទាន់
(បន្ទាយមានជ័យ)៖ក្រោយពីមានហ្វេសប៊ុកមួយ ឈ្មោះភូ សុផល ដែលបានប្រើប្រាស់រូបភាព របស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ជានិម្មិតសញ្ញា (Logo) នោះ នាថ្ងៃទី០៦ ខែមីនា ឆ្នាំ២០២៣នេះ ស្នងការដ្ឋាននគរបាលខេត្តបន្ទាយមានជ័យ បានចេញសេចក្តីប្រកាសឲ្យម្ចាស់គណនីហ្វេសប៊ុក ឈ្មោះ ភូ សុផល លុបរូបភាពជានិម្មិតសញ្ញា (Logo)របស់លោកឧត្តមសេនីយ៍ទោ សិទ្ធិ ឡោះ ចេញជាបន្ទាន់ បើពុំដូច្នេះទេនឹងមានវិធានការតាមផ្លូវច្បាប់ជាក់ជាមិនខាន។
ជៀសវាងមានការភាន់ច្រលំ ស្នងការដ្ឋាននគរបាលខេត្តបន្ទាយមានជ័យ បានប្រកាសជូនដំណឹង ដល់សាធារណជន ពិសេសអ្នកប្រើប្រាស់បណ្តាញទំនាក់ទំនងសង្គមទាំងអស់ ឲ្យបានជ្រាបអំពីជនខិលខូចមួយចំនួនដែលបានបង្កើត ទំព័រហ្វេសប៊ុក (Facebook Page) ក្លែងក្លាយ ដោយប្រើប្រាស់ឈ្មោះ ភូ សុផល និងបានប្រើប្រាស់រូបភាព លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ជានិម្មិតសញ្ញា (Logo)។
ក្នុងនោះស្នងការនគរបាលខេត្តក៏បានធ្វើការបដិសេធទាំងស្រុង និងមិនទទួលខុសត្រូវឡើយ ក្នុងករណីបើម្ចាស់ហ្វេសប៊ុកក្លែងក្លាយខាងលើ បង្ហោះព័ត៌មាននាំឲ្យបង្កចលាចលសង្គម ឬប្រព្រឹត្តបទល្មើសខុសច្បាប់ផ្សេងៗ។ បន្ថែមពីលើនេះ ដើម្បីឱ្យសាធារណជន ងាយស្រួលក្នុងការបែងចែករវាងទំព័រហ្វេសប៊ុកផ្លូវការរបស់លោកឧត្តមសេនីយ៍ទោ សិទ្ធិ ឡោះ និងគណនីហ្វេសប៊ុកក្លែងក្លាយ ។ ដើម្បីងាយចំណាំសូមបញ្ជាក់ថា ទំព័រហ្វេសប៊ុកផ្លូវការរបស់លោកឧត្តមសេនីយ៍ទោ សិទ្ធិ ឡោះ មានឈ្មោះជាភាសារអង់គ្លេសថា «Sith Luos »មានអ្នកគាំទ្រ ចំនួន 15781 Follower (ហ្វេសប៊ុកពិតប្រាកដ) មានរូបProfile ពាក់ឯកសណ្ឋាននគរបាលជាតិ។ ចំពោះគណនីហ្វេសប៊ុកក្លែងក្លាយ មានឈ្មោះ ភូ សុផល មានហ្វ្រែនគាំទ្រ ចំនួន០៨នាក់ និងអ្នកFollwer ចំនួន០២នាក់,រីឯ Profile លួចប្រើប្រាស់រូបលោកឧត្តមសេនីយ៍ទោ សិទ្ធិ ឡោះ ដោយគ្មានការអនុញាតិ។
ស្នងការដ្ឋាននគរបាលខេត្តបន្ទាយមានជ័យ សូមអំពាវនាវចំពោះ លោក លោកស្រី ដែលបានបង្កើតគណនីហ្វេសប៊ុកក្លែងក្លាយខាងលើ ដែលប្រើប្រាស់រូបភាព លោកឧត្តមសេនីយ៍ទោ សិទ្ធិ ឡោះ ត្រូវបញ្ឈប់សកម្មភាព និងលុបរូបភាព ចេញហ្វេសប៊ុកក្លែងក្លាយនេះជាបន្ទាន់ ករណីមិនអនុវត្តតាមការណែនាំ ស្នងការដ្ឋាននគរបាលខេត្តបន្ទាយមានជ័យ នឹងចាត់វិធានការស្រាវជ្រាវ ស្វែងរកជនល្មើសមកផ្ដន្ទាទោសតាមច្បាប់ជាធរមាន ៕
