ខេត្តព្រះសីហនុ៖ប្រទេសកម្ពុជា–ជប៉ុន មានទំនាក់ទំនងយ៉ាងស្អិតរមួត និងមានប្រវត្តិឧបត្ថម្ភគាំទ្រគ្នាតាំងពីយូលុងណាស់មកហើយ។ប្រទេសកម្ពុជា និងប្រទេសជប៉ុនបានបង្កើតទំនាក់ទំនងការទូតផ្លូវការនៅថ្ងៃទី៩ ខែមករា ឆ្នាំ១៩៥៣ ហើយនៅក្នុងឆ្នាំ២០២៣ នេះគឺជាខួបលើកទី៧០ នៃទំនាក់ទំនងការទូតរវាងកម្ពុជា–ជប៉ុន។ ពីមួយឆ្នាំទៅមួយឆ្នាំទំនាក់ទំនងរវាងប្រទេសយើងទាំងពីរ មានភាពល្អប្រសើរជាបន្តបន្ទាប់ ជាពិសេសវិស័យសេដ្ឋកិច្ច ពាណិជ្ជកម្មទ្វេភាគីមានការរីកចម្រើន ក្រោមគម្រោងកិច្ចសហប្រតិបត្តិការរវាងកម្ពុជា–ជប៉ុន ខេត្តព្រះសីហនុទទួលការឧបត្ថម្ភគាំទ្រលើគម្រោងអភិវឌ្ឍន៍ជាច្រើនក្នុងវិស័យនានាដូចជា សុខាភិបាល អប់រំ បរិស្ថាន ទូគមនាគមន៍ ធារាសាស្ត្រ ជាពិសេសគម្រោងអភិវឌ្ឍន៍កំពង់ផែស្វយ័តក្រុងព្រះសីហនុ និងតំបន់សេដ្ឋកិច្ចពិសេស។ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ មានប្រសាសន៍បែបនេះ ក្នុងឱកាសឯកឧត្តមទទួលរថយន្តពន្លត់អគ្គីភ័យជណ្ដើរវែង ដែលជាអំណោយរបស់សមាគមជប៉ុន–កម្ពុជាជូនដល់រដ្ឋបាលខេត្តព្រះសីហនុ នៅការិយាល័យនគរបាលចរាចរណ៍ផ្លូវគោកខេត្តព្រះសីហនុ កាលពីរសៀលថ្ងៃទី១០ ខែកុម្ភៈ ឆ្នាំ២០២៣ ។
ក្នុងនោះឯកឧត្តមអភិបាលខេត្ត បានបញ្ជាក់ថា ការផ្ដល់នូវរថយន្តពន្លត់អគ្គីភ័យជណ្ដើរវែង ០១គ្រឿង ដែលមានដៃរហូតដល់ ៣៥ម៉ែត្រ អាចធ្វើការងារលើសំណង់អគារមានកម្ពស់ ១៣ជាន់
នេះ ពិតជាមានតម្លៃមិនអាចកាត់ថ្លៃបាន និងមានសម្ភារៈសំខាន់ក្នុងការអន្តរាគមន៍ពន្លត់អគ្គីភ័យ និងកាត់បន្ថយហានិភ័យនានាបង្កឡើងដោយអគ្គីភ័យក្នុងខេត្តព្រះសីហនុ។
ជាមួយគ្នានោះដែរឯកឧត្តមអភិបាលខេត្ត ក៏បានធ្វើការណែនាំដល់កងកម្លាំងប្រដាប់អាវុធ និងមន្ត្រីសណ្ដាប់ធ្នាប់សង្គ្រោះ និងពន្លត់អគ្គីភ័យត្រូវបន្តការយកចិត្តទុកដាក់គ្រប់គ្រងសភាពការណ៍ និងធ្វើការឆ្លើយតបជាបន្ទាន់ចំពោះគ្រោះអគ្គីភ័យដែលកើតមានឡើង យើងត្រូវចេះគ្រប់គ្រងស្ថានការក្នុងអំឡុងពេលអគ្គីភ័យកើតឡើង។ ទន្ទឹមនោះយើងក៏ត្រូវធ្វើការហ្វឹកហ្វឺនកម្លាំងបង្ការបស់យើងជាប្រចាំ ដើម្បីពង្រឹងគុណភាព សមត្ថភាព និងស្មារតីគ្រប់គ្រាន់ក្នុងការឆ្លើយតបទៅនឹងគ្រោះមហន្តរាយ និងគ្រោះហានិភ័យនានាដែលកើតមានឡើង៕
