ប្រកាសលោក សួន សុភា ចូលកាន់មុខតំណែង ជាប្រធានមន្ទីររៀបចំដែនដី នគរូបនីយកម្មសំណង់ និងសុរិយោដី ខេត្តបាត់ដំបង ជំនួសលោក អ៊ូ ដារី ដែលត្រូវទទួលភារកិច្ចថ្មី
ខេត្តបាត់ដំបង៖លោក សួន សុភា ត្រូវបានចូលកាន់មុខតំណែង ជាប្រធានមន្ទីររៀបចំដែនដី នគរូបនីយកម្មសំណង់ និងសុរិយោដី ខេត្តបាត់ដំបង ជំនួសលោក អ៊ូ ដារី ដែលត្រូវទទួលភារកិច្ចថ្មី ។ ពិធីប្រកាសនេះបានធ្វើឡើងនៅសាលប្រជុំអគារE សាលាខេត្តបាត់ដំបង កាលពីព្រឹកថ្ងៃទី១៥ ខែកញ្ញា ឆ្នាំ២០២២ ក្រោមអធិបភាព ឯកឧត្តម ឆាន់ សាផាន រដ្ឋលេខាធិការប្រចាំការ តំណាងដ៏ខ្ពង់ខ្ពស់ឯកឧត្តម ជា សុផារ៉ា ឧបនាយករដ្ឋមន្រ្ដី រដ្ឋមន្រ្ដីក្រសួងរៀបចំដែនដី នគរូបនីយកម្ម និងសំណង់ ឯកឧត្តម អ៊ុយ រី ប្រធានក្រុមប្រឹក្សាខេត្តបាត់ដំបង ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង។
ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង បានថ្លែងនូវការកោតសរសើរដល់លោក អ៊ូ ដារី អតីតប្រធានមន្ទីរប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តបាត់ដំបង ដែលបានខិតខំប្រឹងប្រែងបំពេញនូវតួនាទីភារកិច្ចរបស់ខ្លួន ស្របតាមគោលការណ៍ផែនការយុទ្ធសាស្រ្ដរបស់ក្រសួងរៀបចំដែនដី នគរូបនីយកម្ម និងសំណង់ និងផែនការ ការងាររបស់មន្ទីរសាម៉ីដោយទទួលបានលទ្ធផលយ៉ាងល្អប្រសើរ ។ក្នុងនោះរដ្ឋបាលខេត្ត បានកត់សម្គាល់ឃើញថា មន្ទីរបានខិតខំអនុវត្តការងារការផ្ដល់សេវាសាធារណៈ តាមរយៈអង្គភាពច្រកចេញចូលតែមួយរបស់រដ្ឋបាលខេត្ត ការងារចុះបញ្ចីដីមានលក្ខណៈជាប្រព័ន្ធ ការចុះដីបញ្ចីដីធ្លីផ្សេងៗទៀត ព្រមទាំងការដោះស្រាយវិវាទដីធ្លី ទទួលបានលទ្ធផលល្អប្រសើរ និងទទួលបានការគាំទ្រពីប្រជាពលរដ្ឋ ។
ឯកឧត្តមបានបញ្ជាក់ថា មន្ទីរជំនាញពាក់ព័ន្ធ ត្រូវពិនិត្យមើលការសាងសង់ ជួសជុលផ្ទះនៅតំបន់អភិរក្ស និងផ្ទះដែលជាផ្ទះបុរាណ ដោយមុននឹងធ្វើការជួសជុល ឬសាងសង់ថ្មី ត្រូវតែធ្វើការស្នើសុំដល់មន្ទីរអង្គភាពជុំវិញ ឬរដ្ឋបាលក្រុង ស្រុក ជាមុនសិន ដើម្បីឱ្យគណៈកម្មការជំនាញ ចុះពិនិត្យសិក្សាមើល ខ្លាចក្រែងការជួសជុល ឬសាងសង់ផ្ទះបុរាណ ឬផ្ទះដែលស្ថិតក្នុងតំបន់អភិរក្សនោះ ធ្វើឱ្យបានទ្រង់ទ្រាយដើម បង្កើតឱ្យសំណង់ផ្ទះបុរាណកាន់តែបាត់បង់ទៅៗ ។ ក្នុងនោះឯកឧត្តម ក៏បានធ្វើការណែនាំដល់រដ្ឋបាលក្រុង ស្រុកទាំង១៤ ត្រូវតែធ្វើការរៀបចំសណ្ដាប់ធ្នាប់ និងសំណង់មិនរៀបរយ ត្រូវធ្វើការរៀបចំសំណង់អាណាធិបតេយ្យដែលមានៅក្នុងស្រុកសាម៉ីខ្លួន ត្រូវតែធ្វើការរៀបចំ បើពុំនោះទេបញ្ហាសណ្ដាប់ធ្នាប់ និងសំណង់មិនរៀបរយកាន់តែច្រើនៗទៅ ធ្វើឱ្យបាត់បង់សណ្ដាប់ធ្នាប់សាធារណៈកាន់តែធ្ងន់ ព្រោះថ្ងៃទៅមុខទៀតបាត់ដំបងនឹងត្រូវបង្កើតជាទីក្រុងឆ្លាតវ័យ ហើយបើសិនជាមិនធ្វើការរៀបចំសណ្ដាប់ធ្នាប់ទេនោះ នោះមិនអាចក្លាយជាទីក្រុងឆ្លាតបានឡើយ ។
ជាមួយគ្នានោះឯកឧត្តម ឆាន់ សាផាន រដ្ឋលេខាធិការប្រចាំការ បានមានប្រសាសន៍ណែនាំដល់លោកប្រធានមន្ទីរថ្មី ដែលទើបតែតែងតាំងនាពេលនេះ ត្រូវតែបន្តបំពេញតួនាទីរបស់ខ្លួនឱ្យកាន់តែល្អប្រសើរជាងមុនទៀត ក្នុងគោលបំណង ដើម្បីបម្រើប្រជាពលរដ្ឋដែលទទួលសេវារបស់ខ្លួនឱ្យកាន់តែល្អ និងបំពេញភាពពេញចិត្តជូនពួកគាត់ ក្នុងមន្រ្ដីក្រោមឱវាទរបស់ខ្លួនក៏ត្រូវចូលរួមសហការជាមួយថ្នាក់ដឹកនាំរបស់ខ្លួន ដោយត្រូវតែឧស្សាហ៍ព្យាយាម ត្រូវចេះគោរពស្រឡាញ់ទៅវិញទៅមក និងត្រូវចេះជួយគ្នាទៅវិញទៅមក ដើម្បីដំណើរការការងាររបស់ខ្លួនកាន់តែល្អប្រសើរជាងមុន ។ ក្នុងនោះ ឯកឧត្តម បានកត់សម្គាល់ឃើញថា ការកាត់ឈ្មោះប្លង់ម្ចាស់កម្មសិទ្ធិដីធ្លី នៅតែជាបញ្ហាប្រឈម ដោយមានភាពយឺតយ៉ាវ ដោយសារតែត្រូវឆ្លងកាត់ច្រើនដំណាក់កាល ។ដូចនេះឯកឧត្តមក៏បានសំណូមពរឱ្យបង្កើនជំរុញល្បឿននៃការកាត់ប្លង់ជាម្ចាស់កម្មសិទ្ធិឱ្យបានកាន់តែឆាប់រហ័សជាងមុន តាមអ្វីដែលអាចធ្វើបាន ដើម្បីផ្ដល់ជូនប្រជាពលរដ្ឋឱ្យមានភាពងាយស្រួល មិនទន្ទឹងរង់ចាំយូរ មិនធ្វើឱ្យប្រជាពលរដ្ឋមានការធុញទ្រាន់ឡើយ ៕ ដោយ ៖ លោក ផូង បញ្ញា
