(បន្ទាយមានជ័យ) ខ្មែរជួយខ្មែរ នៅក្នុងគ្រាលំបាក នេះគឺជាប្រពៃណីវប្បធម៌ដ៏ល្អផូរផង់ របស់ជាតិសាសន៍ខ្មែរយើងតាំងពីយូរលង់ណាស់មកហើយ ។ ព្រះសមណៈញាណ ណាប់ ម៉ឺន ព្រះបាឡាត់គណខេត្ត មមានសង្ឃដីការបែបនេះក្នុងពិធីនិមន្តចែកអំណោយមនុស្សធម៌ ជូនដល់បងប្អូនប្រជាពលរដ្ឋ ជាជនភៀសសឹកស្នាក់នៅក្នុងទីកន្លែងសុវត្ថិភាពនៅក្នុងក្រុងសិរីសោភ័ណ ខេត្តបន្ទាយមានជ័យ នាព្រឹកថ្ងៃទី៣១ ខែកក្កដា ឆ្នាំ២០២៥ ដែលមានការចូលរួមពី លោកជំទាវ ជ័យ ណារី អ៊ុំ រាត្រី និងលោកស្រី រស់ សុផានី អភិបាលរង ខេត្ត។
លោក ស្រេង សុផល អភិបាលក្រុងសិរីសោភ័ណបានឲ្យដឹងថា បងប្អូនប្រជាពលរដ្ឋដែលជាជនភៀសសឹក ដែលមករស់នៅបណ្ដោះអាសន្ននាទីនេះ សរុបចំនួន ៧៣២គ្រួសារ ប៉ុន្តែដោយមាន បទឈប់បាញ់ ដោយគ្មានលក្ខខណ្ឌរបស់កងទ័ពកម្ពុជាសៀម ទេីបបងប្អូនខ្លះបានវិលត្រឡប់ទៅស្រុកកំណើតវិញ ហើយមួយចំនួនធំបាននៅបន្តទៀតពុំហ៊ានទៅដើម្បីរង់ចាំមើលសភាពការណ៍ ។
ព្រះសមណ:ញាណ ណាប់ មុឺន បានមានសង្ឃដីការថ្លែងអំណរគុណចំពោះញាតិញោមសប្បុរសជនក្នុងនិងក្រៅប្រទេសបងប្អូនអាជីវករ ក្នុងក្រុងសិរីសោភ័ណ និងក្រុងប៉ោយប៉ែតដែលតែងតែជួយ ផ្តល់នូវអំណោយជូនដល់បងប្អូនប្រជាពលរដ្ឋខ្មែរ ដែលជួបការលំបាកជីវភាពខ្វះខាត។ ជាក់ស្តែងបងប្អូន ជនភៀសសឹកដែលបានមកស្នាក់នៅជួបការលំបាក បែកផ្ទះសំបែង ខាតពេលវេលារកស៊ីទទួលទាន កូនៗផ្អាកការសិក្សាជាដើម។ ចុងក្រោយ ព្រះសមណ:ញាណ ណាប់ ម៉ឺន បានធ្វើការផ្ដាំផ្ញើដល់បងប្អូនទាំងអស់ សូមរក្សាសុខភាពអនាម័យ ហូបស្អាត ផឹកស្អាតរស់នៅស្អាត ហេីយពេលដែលវិលទៅលំនៅឋានវិញ ខិតខំអប់រំកូនកូនឲ្យបានសិក្សារៀនសូត្រដើម្បីបន្តវេនជួយគ្រួសារជួយជាតិយេីង ជាក់ស្តែង យើងឃើញថាប្រទេសយើងតូចប្រជាជនតិច ខ្វះធនធានមនុស្ស អ៊ីចឹងហើយបានជាពួកចោរសៀមមើលងាយឈានដល់ការឈ្លានពានទឹកដីរបស់យើង ។ អំណោយ ដែលបានយកមកផ្តល់ជូននាពេលនេះ ចំនួន ២កន្លែង សរុបចំនួន ៤៤គ្រួសារ ដែលក្នុងមួយគ្រួសារទទួលបាន អង្ករ ២០គីឡូក្រាម ឃីត២កញ្ចប់ សម្លៀកបំពាក់ និងថវិកាមួយចំនួន៕
