ខេត្តបន្ទាយមានជ័យ: គ្រប់វត្តអារាមទាំងអស់ ត្រូវធ្វើការរៀបចំរចនាសម្ព័ន្ធ ឲ្យបានច្បាស់លាស់ត្រឹមត្រូវ ទាំងគណៈសង្ឃនិងអាចារ្យគណៈកម្មការវត្ត។លោក បៀវ ថាន ប្រធានមន្ទីរធម្មការនិងសាសនាខេត្តបន្ទាយមានជ័យ មានប្រសាសន៍បែបនេះក្នុងពិធីប្រកាសតែងតាំង គណៈសង្ឃ និងអាចារ្យ គណៈកម្មាការ នៅវត្ដពោធិរុក្ខារាមពង្រ នៅក្នុងឃុំបន្ទាយនាង ស្រុកមង្គលបូរី ក្រោមអធិបតីភាព ព្រះឧត្តមសីលញាណ ធុល សុធា ព្រះមេគណខេត្ត ។ បន្ទាប់ពីព្រះមន្ត្រីសង្ឃស្រុកមង្គលបូរី បានអាននូវសេចក្ដីសម្រេចប្រកាសតែងតាំង គណៈសង្ឃវត្ត និងអាចារ្យគណៈកម្មការ ប្រគល់ទទួលរួចមក លោក បៀវ ថាន ប្រធានមន្ទីរ ធម្មការនិងសាសនាខេត្ត និងព្រះឧត្ដមសីលញាណ ធុល សុធា ព្រះមេគណខេត្តបានមានប្រសាសន៍ និង សង្ឃដីកាលើកឡើងថា តួនាទីរបស់ព្រះចៅអធិការវត្ត គឺជាអ្នកគ្រប់គ្រងរួមនិងគ្រូសូត្រស្ដាំសូត្រឆ្វេង ជាជំនួយការផ្ទាល់របស់ព្រះចៅអធិការ រីឯតួនាទីរបស់អាចារ្យគណៈកម្មការវត្ត មានតួនាទីភារៈកិច្ចជាជំនួយ ដល់ គណៈសង្ឃ លើការងារដូចជា ផ្នែក អាចារ្យដឹកនាំរៀបចំ កម្មវិធីសាសនាតាមបែបប្រពៃណីទំនៀមទម្លាប់ខ្មែរនិងប្រពៃណីព្រះពុទ្ធសាសនា និងទំនាក់ទំនងពុទ្ធបរិស័ទដើម្បីធ្វើការអប់រំផ្សព្វផ្សាយទ្រឹស្ដីពុទ្ធសាសនា។ ចំពោះគណៈកម្មការវត្ត មានតួនាទីលើការងាររដ្ឋបាលទូទៅ ការងារកិច្ចបញ្ជីហិរញ្ញវត្ថុគ្រប់គ្រងថែរក្សាចុះបញ្ជីទ្រព្យសម្បត្តិគរុភណ្ឌវត្ត ផ្គត់ផ្គង់ប្រគេនចង្ហាន់ដល់ព្រះសង្ឃ នឹងរៀបចំសណ្ដាប់ធ្នាប់ទូទៅ រក្សាសន្តិសុខសុវត្ថិភាពនៅក្នុងវត្ត មិនមែនបានតួនាទីអាចារ្យគណៈកម្មការហើយ ទៅធ្វើការគ្រប់គ្រងលើ ព្រះសង្ឃនោះឡើយ ។
ចុងក្រោយ លោក បៀវ ថាន ក៏បានធ្វើការផ្ដាំផ្ញើដល់ព្រះសង្ឃ អាចារ្យគណៈកម្មការ ធ្វើយ៉ាងណា ត្រូវមានសាមគ្គីភាពផ្ទៃក្នុងឲ្យបានល្អ ហើយសុំធ្វើការអនុវត្តនូវគោលការណ៍ឱ្យបានខ្ជាប់ខ្ជួនរបស់ក្រសួងធម្មការនិងសាសនាដែលបានដាក់ចេញនូវអភិក្រម ស៣ សម្រាប់វត្តអារាមទូទៅយកមកធ្វើការអនុវត្តក្នុងនោះគឺ ស១ វត្តស្អាត ស២ វត្តស្វាងនិង ស៣ វត្តស្ងប់ ។ តាមរយៈអភិក្រម ស៣នេះ សង្ឃឹមថាគ្រប់វត្តអារាមនិងខិតខំចូលរួមចំណែកសម្រាប់បង្កើននូវប្រសិទ្ធភាពនៃការដឹកនាំគ្រប់គ្រងទៀតកម្ពស់ស្មារតីពង្រឹងនិងពង្រីកសាមគ្គីធម៍៕
