ខេត្តបន្ទាយមានជ័យ៖គណ:សង្ឃគ្រប់ជាន់ថ្នាក់ ត្រូវពង្រឹងយន្តការដែលមានស្រាប់ និងកែលម្អបន្ថែមលើការដឹកនាំ បព្វជិត ភិក្ខុ សាមណេរ ឲ្យស្ថិតនៅក្នុងវិន័យសីលធម៌និងអភិសមាចារ។ ព្រះមុនីរក្ខិតរង្សី សៀង សុង ព្រះអនុគណស្រុកមង្គលបូរី មានសង្ឈដីការបែបនេះក្នុងពិធីប្រកាសតែងតាំងព្រះគ្រូចៅអធិការវត្តគ្រូសូត្រស្ដាំ សូត្រឆ្វេង និងអាចារ្យគណៈកម្មការវត្ត កោះកែវលង្ការាម ស្ថិតនៅក្នុងឃុំឫស្សីក្រោក ស្រុកមង្គលបូរីខេត្តបន្ទាយមានជ័យ នាព្រឹកថ្ងៃអង្គារ ១៥កើត ខែ ជេស្ធ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១០ ខែមិថុនា ឆ្នាំ២០២៥ ហើយត្រូវនឹងថ្ងៃពេញបរមី ក្រោមអធិបតីភាពលោក បៀវ ថាន ប្រធានមន្ទីរធម្មការនិងសាសនាខេត្ត។
ព្រះមុនីរក្ខិតរង្សី សៀង សុង និងលោក បៀវ ថាន បានមាន សង្ឃដីកានិងប្រសាសន៍ថា ជាការពិតណាស់គ្រប់ទីវត្តអារាមទូទាំងប្រទេស ទៅត្រូវតែមានថ្នាក់ដឹកនាំ ជាគណ:សង្ឃវត្តនិងជំនួយការ ព្រះសង្ឃ គឺអាចារ្យគណៈកម្មការ ហើយក្នុងនោះផងដែរ ក៏សូមកោតសរសើរដោយស្មោះចំពោះព្រះគ្រូចៅអធិការចាស់ ដែលត្រូវលាចាកសិក្ខាបទឆាប់ៗនេះ ដោយរយៈកាលកន្លងមកពុំដែលមានបញ្ហាអ្វីជាអធិករណ៍នៅក្នុងវត្តកោះកែវនេះឡើយ។ដូចនេះសូមអោយគណៈសង្ឃ ថ្មី ត្រូវគោរពប្រតិបត្តិអនុវត្តដឹកនាំគ្រប់គ្រង បន្តឲ្យបានល្អប្រសើរបន្ថែមទៀត។ ជាចុងក្រោយ លោក បៀវ ថាន បានក្រើនរំលឹកផងដែរថា សម័យកាលនេះ គឺជាសម័យសកលភាវូបនីយកម្មក្នុងនោះប្រព័ន្ធបច្ចេកវិទ្យាមានលក្ខណៈទំនើប ហើយត្រូវបានប្រើប្រាស់ជាមធ្យោបាយដើម្បីទាញយកផលប្រយោជន៍ប្រជា ច្រើនដល់សង្គមមនុស្ស ប៉ុន្តែផលអវិជ្ជមាននោះក៏បានកើតមានឡើងក្នុងវឌ្ឍនភាព នៃប្រព័ន្ធបច្ចេកវិទ្យាទំនើបនេះផងដែរ ទន្ទឹមនឹងនេះឥទ្ធិពលអាក្រក់មួយចំនួនបានមានផលប៉ះពាល់ដល់តម្លៃកិត្យានុភាពនិងសក្ដានុពលពុទ្ធសាសនា ព្រមទាំងកិត្តិយសនិងសេចក្ដីថ្លៃថ្នូររបស់ថ្នាក់ដឹកនាំទាំងព្រះសង្ឃ ជាបន្តបន្ទាប់ ដូច្នេះដើម្បីទប់ស្កាត់នូវអំពើអកុសល ដែលអាចកើតមានឡើងជាយថាហេតុដូចជាការប្រើប្រាស់បណ្ដាញទំនាក់ទំនងសង្គមដូចជាហ្វេសប៊ុក យូធូប តិកតុកជាដើម ត្រូវប្រើប្រាស់ក្នុងផ្លូវវិជ្ជមានជាកុសលប្រកប ដោយវិន័យសីលធម៌និងអភិសមាចារ ក្នុងភាពស៊ីឧត្តមភេទ សំដៅនាំមកនូវឧត្តមប្រយោជន៍តែម្យ៉ាងប៉ុណ្ណោះ សម្រាប់ពុទ្ធសាសនានិងសង្គម៕
