សូមអធិការនគរបាលស្រុកកោះអណ្តែត មានវិធានការលើករណីបើកល្បែងស៊ីសងជល់មាន់តាមអនឡាញនៅភូមិរូងផងទាន រាយការណ៍ជូនមេប៉ុស្តិ៍ធ្លាប្រជុំ គ្មានចំណាត់ការ
ខេត្តតាកែវ៖ល្បែងស៊ីសងប្រភេទជល់មាន់ តាមអនឡាញ កំពុងបើកឱ្យលេងយ៉ាងគគ្រឹកគក្រេង នៅរោងកាហ្វេរមួយកន្លែង ស្ថិតនៅភូមិរូង ឃុំធ្លាប្រជុំ ស្រុកកោះអណ្ដែត ខេត្តតាកែវ អាជ្ញាធរមូលដ្ឋាន ពិសេសនគរបាលឃុំធ្លាប្រជុំតែម្តង ហាក់បីដូចជាមិនសូវយកចិត្តទុកដាក់ និងខ្វល់ខ្វាយពីផលប៉ះពាល់ដល់ការរស់នៅប្រជាពលរដ្ឋទាល់តែសោះ ទោះបីជាខលទូរសព្ទរាយការណ៍យ៉ាងណាក្តី ក៏គ្មានចំណ្តាត់ការ។
ពាក់ព័ន្ធករណីខាងលើនេះកាលពីថ្ងៃទី២៥ ខែធ្នូ ឆ្នាំ២០២៣ ភ្នាក់ងាយើងបានខលទូរសព្ទរាយការណ៍ជូនលោកនាយប៉ុស្តិ៍នគរបាលធ្លាប្រជុំ ដោយលោកបានប្រាប់ថា នឹងចុះទៅពិនិត្យមើល តែរហូតមកដល់ពេលនេះ សកម្មភាពការលេងល្បែងស៊ីសងប្រភេទជល់មាន់តាមអនឡាញ នូវតែបន្តបើកឲ្យលេងដោយរលូនដដែល ។
ការដែលបើកឲ្យមានល្បែងស៊ីសងនៅតាមមូលដ្ឋានបែបនេះ ត្រូវបានគេមើលឃើញថា ជះឥទ្ធិព លអាក្រក់ដល់សង្គមយ៉ាងធ្ងន់ធ្ងរ ។ដោយពិនិត្យមើលឃើញពីផលប៉ះពាល់បែបនេះទើបថ្នាក់ដឹកនាំតែងណែនាំដាស់តឿនជារើយៗ ឲ្យមន្ត្រីថ្នាក់ក្រោមអនុវត្តនូវគោលនយោបាយភូមិ ឃុំ/សង្កាត់មានសុវត្ថិភាព បង្ក្រាបឱ្យខានតែបាន ដោយមិនយោគយល់ ចំពោះល្បែងស៊ីសងគ្រប់ប្រភេទ ពិសេសផ្ដោតទៅលើល្បែងស៊ីសងតាមអនឡាញនេះតែម្ដង ដែលធ្វើឲ្យប៉ះពាល់ដល់សង្គម និងប្រជាពលរដ្ឋ ព្រោះថា តំបន់ដែលមានល្បែងស៊ីសងតែងតែកើតមានឡើងនូវបទល្មើសផ្សេងៗដូចជា ចោរលួច ចោរប្លន់ អំពើហិង្សាក្នុងគ្រួសារ ដោយសារឥទ្ធិពល នៃការញៀនល្បែងធ្វើឲ្យប្រជាពលរដ្ឋមួយចំនួនលក់អស់ទ្រព្យសម្បត្តិ ដីធ្លី ព្រមទាំងជំពាក់បំណុលគេជុំបង្កជាអសន្តិសុខក្នុងសង្គមជាដើម ។ដូច្នេះ ដើម្បីឲ្យប្រជាពលរដ្ឋរស់នៅ ដោយសុខសាន្តមិនមានការភ័យខ្លាច សូមស្នើឱ្យអធិការដ្ឋាននគរបាលកោះអណ្តែត មានវិធានការទប់ស្កាត់ផងទាន ដើម្បីឲ្យស្របទៅតាមគោលនយោបាយភូមិ ឃុំ/សង្កាត់ មានសុ វត្ថិភាព ដែលប្រមុខរាជរដ្ឋាភិបាលបាន ដាក់ចេញឲ្យអនុវត្តនាពេលកន្លងមកនេះ ៕ ដោយ ៖ លោក ផូង បញ្ញា
