កម្លាំងយោធាតំបន់ប្រតិបត្តិការសឹករងខេត្តបន្ទាយមានជ័យ ១០០នាក់ ហ្វឹកហ្វឺនពង្រឹងអង្គភាពរយៈពេល៩១ថ្ងៃ ទទួលបាននិទ្ទិសល្អ
ខេត្តបន្ទាយមានជ័យ៖នារសៀលថ្ងៃទី២៦ ខែធ្នូ ឆ្នាំ២០២៣ នៅទីបញ្ជាការ តំបន់ប្រតិបត្តិការ សឹក រងខេត្តបន្ទាយមានជ័យ បានរៀបចំពិធីបិទវគ្គហ្វឹកហ្វឺនបំប៉នពង្រឹង នាយទាហាន នាយទាហានរង និងពលទាហាន តំបន់ប្រតិបត្តិការសឹករងខេត្តបន្ទាយមានជ័យ ចំណុះយោធភូមិភាគទី៥ ឆ្នាំ២០២៣ ក្រោមអធិបតីភាព ឯកឧត្តម ឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៥ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ និងមានការអញ្ជើញចូលរួមពីសំណាក់ លោកឧត្តមសេនីយ៍ទោ សេង ធារិន មេបញ្ជាការរង នាយសេនាធិការយោធភូមិភាគទី៥ មេបញ្ជាការ មេបញ្ជាការរងតំបន់ប្រតិបត្តិការសឹងរងខេត្ត អភិបាលក្រុង ចៅសង្កាត់ នាយរងសេនាធិការ គណៈកម្មការ យោធាចារ្យ កម្មសិក្សាការី នាយទាហាន នាយទាហានរង និងពលទាហានជា ច្រើនរូបទៀត។
ក្នុងឱកាសបិទវគ្គហ្វឹកហ្វឺន នោះដែរ លោកឧត្តមសេនីយ៍ត្រី ជឹម ប៊ុនអាន មេបញ្ជាការ តំបន់ប្រតិបត្តិការសឹករងខេត្ត បានមានប្រសាសន៍ថា៖នៅក្នុងអំឡុងពេលហ្វឹកហ្វឺនសិក្ខាកាមចំនួន១០០នាក់ ដែលមានរយៈពេល ៩១ថ្ងៃ បានប្រឹងប្រែងហ្វឹកហាត់កីឡាយោធា និងបានចូលរួម ប្រកួតកីឡាកងយោធពលខេមរភូមិន្ទ ចំណុះយោធភូមិភាគទី៥ ដើម្បីលើកកម្ពស់ស្មារតី និង សមត្ថភាពកាយសម្បទា ដើម្បីជ្រើសរើសកីឡាករឆ្នើមតំណាងយោធភូមិភាគទី៥ ទៅចូលរួម ប្រកួតកីឡាខេមរភូមិន្ទថ្នាក់ជាតិ អបអរសាទរខួបលើកទី៤៦ ទិវាជ័យជម្នះ៧មករា នាពេលខាង មុខទទួលបានលទ្ធផលគួរឲ្យកោតសរសើរ។
លោកបានបន្តថា៖អង្គភាពបានខិតខំបន្ត លើការងារហ្វឹកហ្វឺន ដើម្បីពង្រឹងសមត្ថភាព យុទ្ធវិធី ឋានលេខា បច្ចេកទេសអាវុធថ្មើរជើង លំហាត់យុទ្ធដំណើរទ័ព និងបង្ក្រាបការងារអប់រំនយោបាយសតិ អារម្មណ៍ ដោយផ្សព្វផ្សាយ សភាពការណ៍ថ្មីៗ ដើម្បីបណ្តុះមនសិការ ស្នេហាជាតិ មាតុភូមិ និងប្រជាពលរដ្ឋ ជាប់ជាប្រចាំ ក្នុងគោលបំណងពង្រឹងសមត្ថភាពយោធិន ធានាបានធនធានមនុស្សសម្រាប់បន្តវេនក្នុងភារកិច្ចពង្រឹងប្រៀបការពារជាតិ សុខសន្តិភាព ស្ថេរភាពនយោបាយ សម្រាប់អ្នកជំនាន់ក្រោយ។
ថ្លែងក្នុង ឱកាស បិទវគ្គនោះដែរ ឯកឧត្តម អ៊ុំ រាត្រី បានលើកឡើងថា ៖គោលបំណង និងឧត្តមគតិដ៏ថ្លៃថ្លារបស់ខ្លួន និងផ្ដើមចេញពីសំណូមពរនៃសភាពការណ៍ទូទៅបច្ចុប្បន្ន រាជរដ្ឋាភិបាលកម្ពុជា ប្តេជ្ញាពុះពារសម្រេចឲ្យបាននូវគោលដៅធំៗជាយុទ្ធសាស្ត្រ ក្នុងនោះ គោលដៅជាអាទិភាពទីមួយគឺ ការពារសន្តិភាព ការពារឯករាជ្យ អធិបតេយ្យ បូរណភាពទឹកដី និងការពាររាល់សមិទ្ធផលនៃសង្គមជាតិ ឲ្យបានគង់វង្សស្ថិតស្ថេរ។ ឯកឧត្ដម ក៏បានថ្លែងនូវការកោតសរសើរ និងវាយតម្លៃខ្ពស់ចំពោះអង្គភាពតំបន់ប្រតិបត្តិការសឹករងខេត្ត ក៏ដូចជាបណ្តាអង្គភាពកងកម្លាំង ឈរជើងទាំងអស់ក្នុងខេត្តបន្ទាយមានជ័យ ដែលកន្លងមក មិនត្រឹមតែខិតខំបំពេញតួនាទីជាកងទ័ពក្នុងភារកិច្ចស្នូលតែប៉ុណ្ណោះទេ ពោលគឺបានរួមចំណែកជាមួយរដ្ឋបាលខេត្តក្នុងការដោះស្រាយ នូវបញ្ហាលំបាកនានារបស់ប្រជាពលរដ្ឋ ដែលរងគ្រោះបណ្តាលមកពីគ្រោះមហន្តរាយផ្សេងៗដូចជា៖ការជួយជួសជុលនិងសង់ផ្ទះជូនប្រជាពលរដ្ឋដែលបណ្តាលពីខ្យល់កន្ត្រាក់ ការជួយច្រូតស្រូវជូន ប្រជាពលរដ្ឋដែលរងការលិចលង់ដោយទឹកជំនន់ និងកិច្ចការសង្គមមនុស្សធម៌ជាច្រើនទៀត។
ឯកឧត្ដម បានបន្ថែម ថា៖ កិច្ចការទាំងអស់នេះ ទទួលបាននូវការដឹងគុណពីប្រជាពលរដ្ឋប្រកបដោយភាពកក់ក្តៅ និងទទួល បាននូវការកោតសរសើរពីថ្នាក់ដឹកនាំប្រមុខរាជរដ្ឋាភិបាលនៃយើងផងដែរ។
ជាមួយគ្នានោះ ឯកឧត្តម ឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក និងជាមេបញ្ជាការយោធ ភូមិភាគទី៥ បានមានប្រសាសន៍ ថា៖ស្ថិតនៅក្នុងដំណាក់ កាលកំនែទម្រង់ របស់រាជរដ្ឋាភិបាលអាណត្តិទី៧ ក្រោមការដឹកនាំ របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញគោលនយោបាយបញ្ចកោណ ដំណាក់កាលទី១ ដោយកំណត់យកអទិភាពគន្លឹះ៥ គឺមនុស្ស ផ្លូវ ទឹក ភ្លើង និងបច្ចេកវិទ្យា ដើម្បីកសាងមូលដ្ឋានគ្រឹះ ឆ្ពោះទៅសម្រេចចក្ខុវិស័យកម្ពុជានាពេលខាងមុខ ដោយក្នុងនោះក៏មានផងដែរ ការកំណត់តួនាទីភារកិច្ច ប្រកបដោយភាពច្បាស់លាស់ក្នុងការកែទម្រង់ និងធ្វើ ទំនើបកម្មកងទ័ព ដោយផ្តោតលើ ទំនើបកម្មរចនាសម្ព័ន ហ្វឹកហ្វឺន និងគ្រឿងបំពាក់ សម្រាប់កង យោធពលខេមរភូមិន្ទ ការពារអធិបតេយ្យភាពជាតិ ទប់ស្កាត់រាល់ការរំលោភបំពាននិងការប៉ុនប៉ង ធ្វើបដិវត្តន៍ពណ៌តាមគ្រប់រូបភាព៕
