ខេត្តបន្ទាយមានជ័យ ៖ក្រុមរាំមួយឆ្នាំម្ដងរបស់បងប្អូនខ្មែរកាត់លាវថៃនៅស្រុកអូរជ្រៅ ខេត្តបន្ទាយមានជ័យ បានរួមគ្នាជាឯកច្ឆន្ទប្រារព្ធធ្វើពិធីបុណ្យដង្ហែប្រាសាទក្រមួនខ្មែរ ហៅថាបុណ្យផ្កាប្រាក់ និងបវរណាព្រះសង្ឃចេញព្រះវស្សា នារសៀលថ្ងៃទី២៨ ខែតុលា ឆ្នាំ២០២៣។
យើងសង្កេតឃើញថា បងប្អូនខ្មែរកាត់លាវថៃ បានរៀបចំដង្ហែរប្រាសាទក្រមួននទៅកាន់វត្តចាន់ស៊ីសាមគ្គីរតនារាម ក្នុងស្រុកអូរជ្រៅ ក្នុងនោះមានការរាំ ច្រៀងសប្បាយអើងកងខ្ញៀវខ្ញារ ហែរព័ទ្ធព្រះអង្គធំសម្ដៅ ទៅព្រះវិហារព្រះរតនៈចេតិយ និងយកមកតម្កល់ទុកនៅសាលាធម្មសភា ដើម្បីធ្វើកិច្ចទៅតាមបែបព្រះពុទ្ធសាសនានៃយើង។
ព្រះតេជគុណ ថា ប៊ុនឡាត់ ព្រះគ្រូអនុគណស្រុកអូរជ្រៅ និងជាព្រះចៅអធិការវត្តច័ន្ទស៊ីសាមគ្គីរតនារាម ព្រះអង្គមានសង្ឃដីកាបញ្ជាក់ថា ជារៀងរាល់ឆ្នាំពេលចេញព្រះវស្សា បងប្អូនជនជាតិខ្មែរកាត់លាវថៃ តែងតែប្រារព្ធពិធីដង្ហែរប្រាសាទក្រមួន ឬហៅថាហែរផ្កាប្រាក់ នេះជាប្រពៃណីទំនៀមទម្លាប់របស់ពួកគាត់ ដើម្បីបានជាបុណ្យកុសលទៅតាមសទ្ធាជ្រះថ្លារៀងៗខ្លួន។ ព្រះអង្គ ថា ប៊ុនឡាត់ មានសង្ឃដីកាបន្តថា រាល់បច្ចេកទាំងអស់ ដែលបងប្អូនបានដង្ហែរយកមកប្រគេនដល់ព្រះសង្ឃនាឱកាសនេះ គឺជាទឹកចិត្តសទ្ធាជ្រះថ្លាជាប្រយោជន៍ជួយទ្រទ្រង់ដល់ព្រះសង្ឃ បានកសាងនូវសមិទ្ធផលនានានិងបានផ្គត់ផ្គង់សម្រាប់ព្រះសង្ឃបានសិក្សារៀនសូត្រផងដែរ។
ក្នុងនាមព្រះអនុគណស្រុកអូរជ្រៅក៏ដូចជាក្នុងនាមព្រះចៅអធិការវត្ត សូមលើកហាត់ប្រណំបួងសួងដល់ទេវតាថែរក្សាទឹកដី គុណបុណ្យព្រះរតនត្រ័យកែវទាំងបី វត្ថុស័ក្តិសិទ្ធទាំងឡាយក្នុងលោក រិទ្ធីបារមី ពិសេសទេវតាឆ្នាំថ្មី ព្រះនាមកិមិរាទេវី សូមព្រះអង្គតាមជួយបីបាច់ថែរក្សា អភិបាលប្រោសព្រំ សព្វសាធុការពរជ័យគ្រប់ប្រការដល់បងប្អូនប្រជាពលរដ្ឋប្រុសស្រី ទាំងអស់ សូមប្រកបដោយព្រះពុទ្ធពរបួនប្រការគឺ អាយុ វណ្ណៈ សុខៈ និងពលៈ ជានិច្ចនិរន្តកុំបីឃ្លៀងឃ្លាតឡើយ៕
