ជំនន់ទឹកភ្លៀងហក់ឡើងខ្លាំង ប្រឈមប៉ៈពាល់ស្រូវកំពុងប្រមូលផល ប្រជាពលរដ្ឋឃុំរហាត់ទឹកនាំគ្នាយកកៅឡាក់បើកទ្វារទឹកសំណង់ពោធិ៍ពីរដើមមិនបាន
ខេត្តបន្ទាយមានជ័យ៖ប្រជាពលរដ្ឋឃុំរហាត់ទឹក បាននាំគ្នាយកកៅឡាក់បើកទ្វារទឹកសំណង់ពោធិ៍២ដើម ស្ថិតភូមិពោធិ៍ពីរដើម ឃុំរហាត់ទឹក ស្រុកមង្គលបូរី ខេត្តបន្ទាយមានជ័យនាថ្ងៃទី២៩ ខែកញ្ញា ឆ្នាំ២០២៣ មិនបាន ខណៈជំនន់ទឹកភ្លៀងបានហក់ឡើងខ្លាំងប្រឈមការប៉ៈពាល់ស្រូវដែលកំពុងប្រមូលផល។
ប្រជាពលរដ្ឋបានឲ្យដឹងថា៖ដោយក្តីបារម្មណ៍ពីការប្រមូលផលស្រូវ ខណៈជំនន់ទឹកភ្លៀងបានហក់ឡើងខ្លាំងនោះ ទើបពួកគាត់ស្នើសុំមន្ត្រីជំនាញដើម្បីបើកទ្វារទឹកសំណង់ពោធិ៍ពីរដើម ដើម្បីរំដោះទឹក នៅពេលដែលយកកៅឡាក់រឺរ៉តទាញទ្វារទឹកឡើង បណ្តាលដាច់កៅឡាក់ធ្លាក់សំណាងគ្មានអ្នករងគ្រោះ ។ដោយបើកមិនបានពួកគាត់អស់សង្ឃឹមក៏បានត្រឡប់ទៅវិញទាំងទឹកមុខស្រពាត់ស្រពោន។ដូច្នេះពួកគាត់ស្នើសុំឲ្យមន្ត្រីជំនាញនិងអភិបាលស្រុក.ខេត្តជួយ ខណៈដែលពួកគាត់ទទួលបានព័ត៌មានមកថា នៅផ្នែកខាងលើស្រុកបវេលខេត្តបាត់ដំបងជាប់ព្រំប្រទល់ស្រុកមង្គលបូរី ខេត្តបន្ទាយមានជ័យ ទឹកជំនន់ទឹកភ្លៀងកំពុងជន់លិចគួរឲ្យព្រួយបារម្មណ៍។
លោក ឡាយ សុធី អនុប្រធានធនធានទឹកនិងឧតុនិយមខេត្តបន្ទាយមានជ័យបានឲ្យដឹងថា៖នៅពេលទឹកជំនន់ផ្នែកខាងលើបានហក់ឡើងខ្លាំង ប្រជាពលរដ្ឋនៅឃុំរហាត់ទឹកសុំបើកទ្វារទឹកសំណង់ពោធិ៍ពីរដើម ដើម្បីរំដោះទឹក ដោយសំណង់ពោធិ៍ពីរដើមទ្វារទឹកមិនទាន់បានធ្វើរួចរាល់ទើបប្រជាពលរដ្ឋរួមជាមួយក្រុមការងារបានយកកៅឡាក់រឺរ៉តដាក់ម្ខាងនិងរថយន្តសន្ទូចម្ខាងបណ្តាលដាច់ខ្សែរទើបសម្រាកសិនហើយសុំអោយអាជ្ញាធរឃុំរហាត់ទឹកទំនាក់ទំនងនិងក្រុមការងាររកដំណោះស្រាយបើកជូនប្រជាពលរដ្ឋ។
អ្នកគ្រប់គ្រងបច្ចេកទេសធ្វើទ្វារទឹកបានប្រាប់ថា៖ក្រោយសំណង់ពោធិ៍ពីរដើមបានកសាងរួចរាល់ហើយក្រុមការងារបច្ចេកទេសកសាងទ្វារទឹកបានកំពុងដាក់ប្រព័ន្ធបិតបើកទ្វារទឹកសំណង់ពោធិ៍ពីរដើមដែលនិងរួចរាល់នៅអំឡុងខែតុលា ឆ្នាំ២០២៣ខាងមុខនេះដែលប្រព័ន្ធទ្វារទឹកសំណង់ពោធិ៍ពីរដើមបិតបើកដោយប្រើប្រព័ន្ធចុចបញ្ជាស្វ័យប្រវត្តិ៕
