មន្រ្តីនគរបាលផ្នែកអន្តោប្រវេសន៍ ខណ្ឌព្រែកព្នៅ មិនដឹងជាមានវិបត្តិអ្វីនោះទេ បាញ់សម្លាប់ខ្លួនឯង នៅមាត់ច្រកទ្វារផ្ទះ ដោយបន្សល់ទុកបណ្តាំចុងក្រោយមួយច្បាប់
(ភ្នំពេញ) ៖ មិនដឹងជាមានវិបត្តិអ្វីនោះទេ ស្ត្រីម្នាក់ ជាមន្ត្រីនគរបាលផ្នែកអន្តោប្រវេសន៍ នៃអធិការដ្ឋាននគរបាលខណ្ឌព្រែកព្នៅ សម្រេចចិត្តបញ្ចប់ជីវិត ដោយយកកាំភ្លើងបាញ់ខ្លួនឯង បណ្តាលឲ្យស្លាប់ភ្លាមៗ នៅមាត់ច្រកទ្វារផ្ទះ ស្ថិតនៅក្នុងភូមិគ្រួស សង្កាត់សំរោង ខណ្ឌព្រែកព្នៅ រាជធានីភ្នំពេញ នាថ្ងៃទី០៥ ខែមិថុនា ឆ្នាំ២០២៣ ដោយបន្សល់ទុកបណ្តាំចុងក្រោយ ។ជនរងគ្រោះមានឈ្មោះ វី ស្រីវ៉ែន ភេទស្រី អាយុ២១ឆ្នាំ មុខរបរជាមន្រ្តីនគរបាលផ្នែកអន្តោប្រវេសន៍ នៃអធិការនគរបាលខណ្ឌព្រែកព្នៅ អត្តលេខ 91377 ។
ករណីអត្តឃាតខាងលើ ធ្វើឲ្យក្រុមគ្រួសារក្តុកក្តួល នូវរឿងរ៉ាវ មិនគួរកើតឡើង គ្រាន់តែបញ្ហាក្នុងសង្គមគ្រួសារ ធ្វើឲ្យស្ត្រីរងគ្រោះដោះមិនចេញ ស្រាយមិនកើត បែជាគិតខ្លីបែបនេះ ហើយមានទាំងសំណេរទាំងផ្តែផ្តាំដល់ក្រុមគ្រួសារ ដោយមានខ្លឹមសារថា«កូនសូមទោសប៉ាម៉ាក់ កូនលាហើយ កូនមិនអាចរស់នៅបានទៀតទេ កូនជាមនុស្សមិនល្អ ប៉ាម៉ាក់មិនសមមានកូនបែបនេះទេ ហើយកាំភ្លើងនេះកូនខ្ចីពីបង អូនគេមិនជាប់ពាក់ព័ន្ធទេ យកកាំភ្លើងឲ្យគាត់វិញផង កូនសូមទោសហើយ មិនបាច់ធ្វើបុណ្យឲ្យកូនទេ កុំឲ្យអស់លុយ កូនលាហើយប៉ាម៉ាក់ជាមនុស្ស លាប្អូនទាំង៤នាក់ កុង ចៅសូមទោស គ្មានអ្នកណាពាក់ព័ន្ធទេ ខ្ញុំសម្រេចចិត្តខ្លួនឯង »។ករណីខាងលើត្រូវបានសមត្ថកិច្ចមូលដ្ឋាន សមត្ថកិច្ចជំនាញចុះទៅពិនិត្យ កោសល្យវិច័យ រួចប្រគល់សពជូនក្រុមគ្រួសារ ដើម្បីចាត់ចែងធ្វើបុណ្យទៅតាមប្រពៃណី ៕
