នាយប៉ុស្តិ៍នគរបាលឃុំពពេល ង៉ែត មាន កំពុងផ្គើននឹងបទបញ្ជារបស់ថ្នាក់ដឹកនាំ ឃុបឃិតគ្នាជាមួយម្ចាស់ទីតាំងឈ្មោះ ចិត្រ បើកល្បែងស៊ីសងប្រភេទជល់មាន់ ចាក់ចាញ់ឈ្នះរាប់លានរៀលក្នុងមួយក្តាៗ នៅឃុំពពេល ស្រុកត្រាំកក់(មានវីដេអូរ)
ខេត្តតាកែវ៖ល្បែងស៊ីសងប្រភេទជល់មាន់ កំពុងបើកឲ្យលេងយ៉ាងគក្រឹកគក្រេងហូរកញ្ជៀវ ចាក់ចាញ់ឈ្នះរាប់លានរៀលក្នុងមួយក្តាៗ ស្ថិតនៅក្នុងភូមិក្ងោកពង ឃុំពពេល ស្រុកត្រាំកក់ ខេត្តតាកែវ អាជ្ញាធរមូលដ្ឋាន ពិសេសនគរបាលតែម្តង គ្មានចំណាត់ការទាល់តែសោះ ទោះបីជាអ្នកសារព័ត៌មានខលទូរស័ព្ទរាយការយ៉ាណាក្តី។តែទោះយ៉ាងនេះក្តីអ្នកញៀនល្បែងបានបង្ហើបប្រាប់ភ្នាក់ងារយើងឲ្យដឹងថា ដោយសារតែម្ចាស់ទីតាំងឈ្មោះ ចិត្រ បានបង់លុយឲ្យមេប៉ុស្តិ៍នគរបាលឃុំពពេល ជាប្រចាំខែរួចរាល់ហើយ ទើបបានជាគ្មានចំណាត់ការបែបនេះ ហើយម្យ៉ាងវិញទៀតម្ចាស់ទីតាំងខាងលើបានអះអាងជាមួយក្រុមអ្នកញៀនល្បែងកុំឲ្យមានការព្រួយបារម្ម គ្មានអ្នកណាហ៊ានមករករឿងកន្លែងទីតាំងខាងលើនេះទៀតផង ។
ប្រភពដដែលបន្តថា ទីតាំងខាងលើនេះបើកឲ្យលេងជាប្រចាំ ពោលគឺជារៀងរាល់ថ្ងៃតែម្តង ដោយថ្ងៃសៅរ៍ និងអាទិត្យ លេងចាប់ពី១០ ទៅ២០គូ ចំណែកថ្ងៃច័ន្ទ ដល់ថ្ងៃសុក្រវិញ គឺចាប់ពី៥ ទៅ៦គូរ ក្នុងមួយគូៗ ចាក់ចាញ់ឈ្នះចាប់ពី ៥០ម៉ឺនរៀល ដល់ជាង ១លានរៀលទៀតផង ។ហើយការបើកឲ្យលេងបានដោយរលូនបែបនេះដោយមានការបើកភ្លើងខៀវពីអាជ្ញាធរមូលដ្ឋាន ពិសេសបង់លុយឲ្យមេប៉ុស្តិ៍នគរបាលឃុំពពេល តែម្តង ។
ពាក់ព័ន្ធទៅនឹងករណីខាងលើនេះដែរភ្នាក់ងារអង្គភាព គេហទំព័រ ខ្មែរម្ចាស់ការ បានខលទូស័ព្ទរាយការជូនលោកវរសេនីយ៍ឯក ឌុក ធីយ៉ា អធិការនគរបាលស្រុកត្រាំកក់ លោកប្រាប់ថានឹងឲ្យប៉ុស្តិ៍ចុះទៅមើល តែជាច្រើនម៉ោងទៅហើយមិនឃើញសមត្ថកិច្ចចុះទៅបង្ក្រាបទាល់តែសោះ ដោយទីតាំងខាងលើនូវតែបន្តបើកឲ្យលេងដោយរលូនដដែល ដោយគ្មានខ្លាចញញើតអ្វីទាំងអស់។ មិនខុសពីអ្វីដែលក្រុមអ្នកញៀនល្បែងប្រាប់នោះឡើយ បើគ្មានការឃុបឃិតគ្នារវាងអធិការនគរបាលស្រុកត្រាំកក់ មេប៉ុស្តិ៍នគរបាលឃុំពពេល និងម្ចាស់ទីតាំងខាងលើទេនុះ នៅពេលអ្នកសារព័ត៌មានខលរាយការណ៍នឹងចុះមកបង្ក្រាបហើយ មិនទុកឲ្យលេងដោយរលូនបែបនេះនោះទេ ។ ដូចច្នេះស្នើឲ្យស្នងការដ្ឋាននគរបាលខេត្តតាកែវ មានចំណាត់ការផងទាន!! ដើម្បីឲ្យស្របតាមគោលនយោបាយ ភូមិ ឃុំ/សង្កាត់ មានសុវត្ថិភាព របស់ប្រមុខរាជរដ្ឋាភិបាលកម្ពុជា ព្រោះថា មានល្បែងស៊ីសងតែងតែកើតមានឡើងនូវចោលួច ចោប្លន់ អំពើរចោរកម្ម អំពើហឹងសារក្នុងគ្រួសារ និងបទល្មើសជួញដូរ និងប្រើប្រាសគ្រឿងញៀន ពលរដ្ឋខ្លះលក់អស់ទ្រព្យសម្បត្តិ ដីធ្លី ព្រមទាំងជំពាក់បំណុលគេជំទិស បង្កបញ្ហាអសន្តិសុខសង្គមជាដើម ហើយម្យ៉ាងវិញទៀតថ្មីៗនេះសម្តេចតេជោ ប្រមុខរាជរដ្ឋាភិបាល ក៏បានដាក់នូវបទបញ្ជាយ៉ាងដាច់ណាត់បំផុត ឲ្យមន្តីថ្នាក់ក្រោមជាតិ ចុះអនុវត្តទៅលើល្បែងស៊ីសងគ្រប់ប្រភេទនៅក្នុងព្រះរាជណាចក្រកម្ពុជា ដោយមិនយោគយល់ ទោះជាមានអ្នកចាំកាងពីក្រោយខ្នង ពាក់ទៅដល់ផ្កាយ ឬលោកខែ ក៏មិនយោគយល់នោះដែរ ៕ដោយ ៖ លោក ផួង បញ្ញា
សូមទស្សនានូវវីដេអូរដែលមានដូចខាងក្រោម៖
