អភិបាលខេត្តប៉ៃលិន ក្រើនរំលឹកដល់មន្ត្រីរាជការ ដែលទើបឡើងតំណែងថ្មី ត្រូវយកចិត្តទុកដាក់បំរើសេវ៉ាសាធារណ: ជូនពលរដ្ឋឲ្យទាន់ពេលវេលា និងបង្ក្រាបក្មេងទំនើងល្បែងស៊ីសង
ខេត្តប៉ៃលិន៖ថ្លែងនៅក្នុងពិធីប្រកាសតែងតាំងនាយករដ្ឋបាលខេត្ត ប្រធានច្រកទ្វារអន្តរជាតិព្រំ អភិបាល អភិបាលរងក្រុង–ស្រុក នារសៀលថ្ងៃទី១៤ ខែវិច្ឆិកា ឆ្នាំ២០២២ នៅសាលប្រជុំសាលាខេត្តប៉ៃលិន លោកជំទាវ បាន ស្រីមុំ អភិបាលខេត្តប៉ៃលិន បានក្រើនរំលឹកដល់អភិបាលក្រុង–ស្រុកដែលទើបឡើងថ្មី ត្រូវខិតខំប្រឹងប្រែងអភិវឌ្ឍន៍តំបន់របស់ខ្លួនឲ្យបានកាន់តែល្អប្រសើរឡើង និងត្រូវគិតគូរដោះស្រាយនូវបញ្ហាមួយចំនួនដូចជា ទប់ស្កាត់បញ្ហាគ្រឿងញៀន ល្បែងស៊ីសងគ្រប់ប្រភេទ និងចូលរួម បង្ការទប់ស្កាត់ការឆ្លងរីករាលដាលនៃជំងឺកូវីដ ១៩ ដោយខិតខំធ្វើយ៉ាងណាឲ្យទទួលបាននូវលទ្ធផលល្អ តាមរយៈកាផ្សព្វផ្សាយវិធានការរបសរាជរដ្ឋាភិបាល ៣កុំ ៣ការពារ ព្រមទាំងអនុវត្តវិធានការនានារបស់ក្រសួងសុខាភិបាល និងត្រូវពិនិត្យដោះស្រាយរាល់ជម្លោះដីធ្លី បញ្ហាអំពើហិង្សាក្នុងគ្រួសារ ព្រមទាំងបន្តផ្តល់ជូនប្រជាពលរដ្ឋក្រីក្រ ទាំងជួយដោះស្រាយបញ្ហាតម្រូវការរបស់ប្រជាពលរដ្ឋឲ្យបានត្រឹមត្រូវ និងច្បាស់លាស់ និងដោយសន្តិវិធី ទប់ស្កាត់បញ្ហាឆ្លងដែនខុសច្បាប់។
ក្នុងនោះលោកជំទាវអភិបាលខេត្ត បានណែនាំឱ្យមន្ត្រីទើបតែងតាំងថ្មីបន្តខិតខំបំពេញភារកិច្ចរបស់ខ្លួន ដោយត្រូវសាមគ្គីផ្ទៃក្នុងឱ្យបានល្អ យកចិត្តទុកដាក់ជួយដោះស្រាយបញ្ហាប្រឈមនានារបស់ប្រជាពលរដ្ឋ ឱ្យទទួលបានលទ្ធផលល្អប្រសើរ ដើម្បីបន្តអភិវឌ្ឍខេត្តប៉ៃលិនឱ្យមានការរីកចម្រើនជានិរន្ត។
ចំណែកលោកសៀ សុខម អភិបាលស្រុកសាលាក្រៅ ដែលទើបតែងតាំងបានឡើងប្តេជ្ញាចិត្តថា ៖ក្រោយរាជរដ្ឋាភិបាលផ្តល់ជូននូវមុខតំណែង ក៏សូមសម្តែងនូវអំណរគុណយ៉ាងជ្រាលជ្រៅបំផុត ប្រកបដោយសេចក្តីសោមនស្សរីករាយឥតឧបមា ជូនចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ឯកឧត្តម អ៊ី ឈាន ប្រធានក្រុមការងារថ្នាក់ជាតិចុះជួយខេត្តប៉ៃលិន លោកជំទាវ បាន ស្រីមុំ អភិបាលនៃគណ:អភិបាល ខេត្តប៉ៃលិន ដែលបានផ្តល់នូវការសន្តោសប្រោសប្រណី និងមានសេចក្តីទុកចិត្ត ហើយតែងតាំងអភិបាល អភិបាលរងក្រុង.ស្រុកនាពេលនេះ។
សូមបញ្ជាក់ថា ការតែងតាំង និងផ្ទេរភារកិច្ចមន្ត្រីរាជការនាថ្ងៃនេះគឺ អភិបាលក្រុងប៉ៃលិន អភិបាលរងក្រុងម្នាក់ អភិបាលស្រុកសាលាក្រៅ អភិបាលរងស្រុកចំនួន២រូប នាយករដ្ឋបាលសាលាខេត្តនិងនាយករដ្ឋបាលស្រុកសាលាក្រៅរួមនិងប្រធានច្រកទ្វារត្រួតពិនិត្យអន្តរជាតិព្រំផងដែរ៕
