បន្ទាយមានជ័យ ៖ ឯកឧត្ដម ឌិត ទីណា រដ្ឋមន្ត្រីក្រសួងកសិកម្ម រុក្ខប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ អមដំណេីរដោយ ឯកឧត្ដម អ៊ុំ រាត្រី អភិបាល នៃគណ:អភិបាលខេត្ត ឯកឧត្ដម ប្លែក វ៉ារី ប្រធាន ក្រុមប្រឹក្សា ខេត្ត បានអញ្ជើញចុះសួរសុខទុក្ខ នាំយកអំណោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ជូនដល់បងប្អូនជនភៀសសឹក ជាង៦០០គ្រួសារ ដែលជម្លៀសខ្លួនពីតំបន់សមរភូមិមុខនៅឧត្តរមានជ័យ និងព្រះវិហារ មកទីតាំងសុវត្ថិភាព នៅក្នុងស្រុកមង្គល នៅថ្ងៃទី៣០ ខែកក្កដា ឆ្នាំ ២០២៥។
ក្នុងឱកាសនោះឯកឧត្តម ឌិត ទីណា ក៏បានជម្រាបជូនដល់បងប្អូនជនភៀសសឹក អំពីស្ថានភាពនៅតាមបន្ទាត់ព្រំដែនក្រោយពីមានកិច្ចចរចាបទឈប់បាញ់ដោយគ្មានលក្ខខណ្ឌ កងទ័ពទាំងពីរបានអនុវត្ត យ៉ាងម៉ឺងមាត់ ហេីយស្ថានភាពតាមព្រំដែនមានភាពក៏មានភាពស្ងប់ស្ងាត់ ។ តែទោះជាយ៉ាងណាក៏ដោយ ឯកឧត្ដម សូមឱ្យបងបងប្អូនជនភៀសសឹកទាំងអស់កុំទាន់វិលត្រលបទៅលំនៅឋានវិញ នៅសមរភូមិមុខខេត្តឧត្តរមានជ័យ និងព្រះវិហារ ក៏ដូចជាស្រុកជាប់ព្រំដែនក្នុងភូមិសាស្រ្តខេត្តបន្ទាយមានជ័យ រងចាំសភាពការណ៍បានស្ងប់ស្ងាត់ ជាងនេះ និងមានការជូនដំណឹងជាថ្មីសិន ។
ក្នុងដំណាក់កាលដែលបងប្អូនកំពុងតែស្នាក់នៅក្នុងទីសុវត្ថិភាពនោះហើយឯក ឧត្តម ឌិត ទីណា បានណែនាំឱ្យបងប្អូនប្រជាពលរដ្ឋជនភៀសសឹក ប្រកាន់ខ្ជាប់នូវអនាម័យ ហូបស្អាតផឹកស្អាត ដើម្បីជៀសផុតពីជំងឺតម្កាត់ផ្សេងៗ។ ហើយបើក្នុងករណីមានបញ្ហាសុខភាពអាចទៅរកក្រុមគ្រូពេទ្យដែលប្រចាំការ ទទួលបានសេវាព្យាបាលឥតគិតថ្លៃ៕
