(បន្ទាយមានជ័យ) ដេីម្បីចូលរួមគាំទ្រ និងលើកទឹកចិត្តដោយស្មោះ ចំពោះបងប្អូនវរៈកងទ័ពជួរមុខដែលឈរជើងការពារបូរណភាពទឹកដីនៅប្រាសាទ ស្ថិតនៅក្នុងជួរភ្នំដងរែកខេត្តឧត្តរមានជ័យ នាព្រឹកថ្ងៃទី១៦ ខែកក្កដា ឆ្នាំ២០២៥ ឯកឧត្ដម ចាយ បូរិន រដ្ឋមន្ត្រីក្រសួងធម្មការ និងសាសនា អមដំណើរដោយ ឯកឧត្តម លោកជំទាវ អស់លោក លោកស្រី ក្រុមអ៊ិស្លាម ក្រុមគ្រិស្តបរិស័ទ និងក្រុមគ្រួសារគ្រិស្តបរិស័ទខេត្តបន្ទាយមានជ័យ បានអញ្ជើញចុះសាកសួរសុខទុក្ខដល់កងទ័ព នឹងបាននាំយកនូវ អំណោយជូនដោយផ្ទាល់ ក៏ជាការលើកទឹកចិត្តខ្មែរជួយខ្មែរ ខ្មែរស្រឡាញ់ខ្មែរ អំណោយទាំងអស់រួមមាន អង្ករ៣តោន មីយេីង ១០០កេស ទឹកក្រូចចំនួន ៥០យួរ ទឹកស៊ីអ៊ីវចំនួន ៥០យួរ ត្រីខ ៦កេសធំ សាច់គោងៀតចំនួន ៦០គីឡូក្រាម គោងៀតចំនួន៦០គីឡូក្រាម សាច់គោស្រស់ចំនួន២០០គីឡូក្រាម ថ្នាំបាត់ផ្ដាសាយចំនួន ៣ប្រអប់ធំ និងថវិកាចំនួន២០លានរៀល។
ឯកឧត្ដម ចាយ បូរិន រដ្ឋមន្ត្រី ក្រសួងធម្មការនិងសាសនា បានពាំនាំនូវប្រសាសន៍ផ្ដាំផ្ញើសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុនសែន ប្រធានព្រឹទ្ធសភា សម្តេចមហាបវរធិបតី ហ៊ុនម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។ ឯកឧត្តមបានមានប្រសាសន៍បន្តថា ក្នុងនាមជាថ្នាក់ដឹកនាំមន្ត្រីរាជការនៃក្រសួងធម្មការនិងសាសនា សូមគាំទ្រយ៉ាងពេញទំហឹង ចំពោះរាជរដ្ឋាភិបាលក្រោមការដឹកនាំដ៏ឈ្លាសវៃប្រកបដោយគតិបណ្ឌិត របស់សម្តេចមហា មហាបវរធិតី ហ៊ុនម៉ាណែត ក្នុងការចាត់បញ្ជូនលិខិតជាផ្លូវការទៅតុលាការយុត្តិធម៌អន្តរជាតិអាយ.ស៊ី.ជេ ដើម្បីរកដំណោះស្រាយពាក់ព័ន្ធ នឹងបញ្ហាវិវាទព្រំដែននៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ដើម្បីឧត្តមប្រយោជន៍ជាតិនិងប្រជាជន ព្រមទាំងការរក្សាសិទ្ធិប្រើប្រាស់កម្លាំងប្រដាប់អាវុធប្រឆាំងនឹងការឈ្លានពានរបស់កងទ័ពសៀម ដើម្បីការពារអធិបតេយ្យបូរណភាពទឹកដីមួយ មិល្លីម៉ែត្រ មិនឲ្យបាត់បង់នោះឡើយ។ ផ្ដើមចេញ ពីឧបាយកលទុច្ចរិតប្រើប្រាស់ផែនទីឯកតោភាគី វង្វេងវង្វាន់ របស់ពួកជ្រុលនិយមនិងកងយោធាថៃ បន្តបង្កហេតុបង្កើតជម្លោះជាបន្តបន្ទាប់ទោះបីជា កងទ័ពកម្ពុជាដែលឈរជើងតាមខ្សែបន្ទាត់ព្រំដែន នៅទិសយោធភូមិភាគទី៤ ព្យាយាមសម្របសម្រួល ដោយសន្តិវិធី និងអត់ធ្មត់ប៉ុន្តែពួកយោធាថៃកាន់តែបង្កើននូវសកម្មភាពដដែល២ឥតឈប់ឈរ និងប្រកាសអោយ ប្រជាពលរដ្ឋថៃ និងសាធារណមតិអន្តរជាតិ ភ័ន្តច្រឡំថាប្រាសាទតាមាន់ធំ ប្រាសាទតាមាន់តូច ប្រាសាទតាក្របី ជារបស់ថៃស្ថិតនៅក្នុងដែនដីនៃខេត្តសុរិន្ទនិងបានធ្វើសកម្មភាព ចល័តពង្រាយកម្លាំងសព្វាវុធចូលកៀកព្រំដែនបង្កើន សកម្មភាពញុះញង់បង្កហេតុបង្កជម្លោះដើម្បីឈានទៅការ កាន់កាប់ប្រាសាទតាមាន់ធំនិងប្រាសាទតាក្របី៕
