នគរបាលខេត្តតាកែវ បង្ហាញមុខសញ្ញាក្រុមកាប់ ប្លន់ លួចម៉ូតូ និងឆក់យ៉ាងកក្រើក ក្នុងភូមិសាស្ត្រខេត្តតាកែវ
(តាកែវ)៖ក្រុមក្មេងស្ទាវចំនួន ៦នាក់ ក្នុងចំណោមបក្សពួក ១១នាក់ ដែលមានអាយុចាប់ពី ១៧ឆ្នាំ ដល់ ១៨ឆ្នាំ ដែលជាមុខសញ្ញាកាប់ ប្លន់ លួចម៉ូតូ និងឆក់យ៉ាងកក្រើក នៅក្នុងភូមិសាស្ត្រខេត្តតាកែវ ត្រូវបានកម្លាំងសមត្ថកិច្ចចាប់ឃាត់ខ្លួនបានជាបន្តបន្ទាប់ រួចយកមកបង្ហាញមុខកាលពីថ្ងៃទី៨ ខែកក្កដា ឆ្នាំ២០២២។
ជនសង្ស័យទាំង៦នាក់នេះ គឺជាមុខសញ្ញា បង្កើតបទល្មើសជាច្រើនករណី ក្នុងនោះមានកាប់ ប្លន់ ធាក់ផ្តួលប្លន់យកម៉ូតូ និងធ្វើសកម្មភាពឆក់កាបូបយ៉ាងកក្រើកនៅក្នុងទឹកដីនៃខេត្តតាកែវ រយៈពេលជាង៣ខែមកនេះ។សមត្ថកិច្ចបានឲ្យដឹងថា ការឃាត់ខ្លួនជនសង្ស័យនេះបាន គឺដំបូងកម្លាំងយើង បានចុះទៅបង្ក្រាបករណីគ្រឿងញៀនទេ តែនៅពេលឃាត់ខ្លួនជនសង្ស័យ ក៏ឆែកឆេរកឃើញស្លាកលេខម៉ូតូថ្មីមួយ ទើបកម្លាំងជំនាញ ធ្វើការស្រាវជ្រាវ និងសាកសួរជនសង្ស័យថា ជាស្លាកលេខម៉ូតូ កែប 1B-4438 នោះជាស្លាកលេខម៉ូតូរបស់អ្នកណាគេ? ក្រោយពេលសួរនាំ និងអង្កេតយ៉ាងលម្អិត ទើបជនសង្ស័យ ព្រមសារភាពថា ជាស្លាកលេខម៉ូតូរបស់ជនរងគ្រោះ ដែលបានមកពីការធ្វើសកម្មភាពធាក់ប្លន់យកម៉ូតូ នៅផ្លូវបំបែកពេជ្រសារ ស្រុកគីរីវង់ ខេត្តតាកែវ កាលពីយប់ថ្ងៃទី២ ខែកក្កដា ឆ្នាំ២០២២ និងមានករណីកាប់ប្លន់ម៉ូតូជាច្រើនករណីទៀត នៅក្នុងភូមិសាស្ត្រខេត្តតាកែវ ដែលក្រុមជនសង្ស័យបានធ្វើសកម្មភាពបានសម្រេចកន្លងមក។
ជនសង្ស័យទាំង ៦នាក់ ដែលបង្រ្កាបបាន នៅពេលនេះ រួមមាន៖
ទី១–ឈ្មោះ វឿន រក្សា ភេទប្រុស អាយុ ១៧ឆ្នាំ មុខរបរមិនពិតប្រាកដ រស់នៅភូមិខ្សឹង សង្កាត់រកាក្នុង ក្រុងដូនកែវ។
ទី២-ឈ្មោះ ចែម លីហេង ភេទប្រុស អាយុ ១៧ឆ្នាំ មុខរបរមិនពិតប្រាកដ រស់នៅភូមិបាក់កូដ ឃុំលាយបូរណ៍ ស្រុកត្រាំកក់។
ទី៣-ឈ្មោះ ម៉ែន វីរៈ ភេទប្រុស អាយុ ១៧ឆ្នាំ មុខរបរមិនពិតប្រាកដ រស់នៅភូមិតុំ សង្កាត់រកាក្រៅ ក្រុងដូនកែវ។
ទី៤-ឈ្មោះ តូច រតនា ភេទប្រុស អាយុ ១៨ ឆ្នាំ មុខរបរមិនពិតប្រាកដ រស់នៅភូមិបិនម៉ៅ សង្កាត់រកាក្រៅ ក្រុងដូនកែវ។
ទី៥–មានឈ្មោះ មឿន ជីវ័ន្ត ភេទប្រុស អាយុ១៨ឆ្នាំ មុខរបរមិនពិតប្រាកដ រស់នៅភូមិសូរច័ន្ទ សង្កាត់រកាក្រៅ ក្រុងដូនកែវ និង
ទី៦–ឈ្មោះ អ៊ុង សំនាង ភេទប្រុស អាយុ ១៨ឆ្នាំ មុខរបរមិនពិតប្រាកដ រស់នៅភូមិប៊ិនម៉ៅ សង្កាត់រកាក្រៅ ក្រុងដូនកែវ ។ ជនសង្ស័យទាំង ០៦នាក់ខាងលើ ត្រូវបានកម្លាំងជំនាញ បកសាងសំណុំរឿង បញ្ជូនទៅសាលាដំបូងខេត្តតាកែវ កាលពីព្រឹកថ្ងៃទី៨ ខែកក្កដានេះ។ ដោយឡែក ចំពោះជនសង្ស័យ ដែលជាបក្សពួកចំនួន ៥នាក់ កំពុងរត់គេចខ្លួននោះ សមត្ថកិច្ច នឹងធ្វើការស្រាវជ្រាវឃាត់ខ្លួនជាបន្តទៀត ៕
