អភិបាលខេត្តបន្ទាយមានជ័យ អញ្ជើញចុះសួរសុខទុក្ខប្រជាពលរដ្ឋ ដែលរងគ្រោះដោយទឹកជំនន់នៅទីទួលសុវត្ថិភាព ក្នុងសង្កាត់ព្រះពន្លា
(បន្ទាយមានជ័យ) ៖ដើម្បីជួយសម្រួលដល់ជីវភាព និងការស្នាក់នៅរបស់បងប្អូនប្រជាពលរដ្ឋ ដែលរងគ្រោះដោយសារទឹកជំនន់ ស្នាក់នៅទួលសុវត្ថិភាព ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ អមដំណើរដោយលោក ឃ្លោក នួយ អភិបាលរងខេត្ត លោក ស្រេង សុផល អភិបាលក្រុងសិរីសោភ័ណ និងអាជ្ញាធរមូលដ្ឋាន ភូមិ សង្កាត់ព្រះពន្លា បាន អញ្ជើញចុះសួរសុខទុក្ខប្រជាពលរដ្ឋនៅទីទួលសុវត្ថិភាព ចំនួន ៤៦គ្រួសារ នៅចំណុចបេនឡានថ្មី ក្នុងភូមិព្រះពន្លា សង្កាត់ព្រះពន្លា ក្រុងសិរីសោភ័ណ ថ្ងៃទី១៦ ខែតុលា ឆ្នាំ២០២៣។
ក្នុងឱកាសចុះសួរសុខទុក្ខឯកឧត្តម អ៊ុំ រាត្រី បានធ្វើការផ្ដាំផ្ញើដល់ លោកអភិបាលក្រុង ក៏ដូចជាអាជ្ញាធរមូលដ្ឋានភូមិ សង្កាត់ ត្រូវបន្តយកចិត្តទុកដាក់ចំពោះបងប្អូនប្រជាពលរដ្ឋដែលបានជម្លាសមកស្នាក់នៅទីទួលសុវត្ថិភាពនេះ។ជាពិសេសត្រូវជួយផ្គត់ផ្គង់ពីភាពខ្វះខាតរបស់ពួកគាត់ចំពោះមុខ ដូចជាគ្រឿងឧបភោគបរិភោគជាដើម ដែលអាចធ្វើទៅបាន ទម្រាំតែទឹកសម្រកទៅវិញ។
ឯកឧត្ដម អ៊ុំ រាត្រី ក៏បានណែនាំឱ្យបងប្អូនប្រជាពលរដ្ឋ ត្រូវមានការប្រុងប្រយ័ត្នខ្ពស់ និងថែទាំសុខភាព ដោយទទួលទានអាហារឱ្យបានត្រឹមត្រូវ ហូបទឹកដាំឆ្អិនល្អ រក្សាអនាម័យ និងត្រូវគេងក្នុងមុងជានិច្ច៕
