នគរបាលខេត្តសៀមរាប បំបែកសំណុំរឿងឃាតកម្ម កាប់សម្លាប់ទៅលើបុរសម្នាក់ បណ្តាលឲ្យស្លាប់ក្នុងថ្លុកឈាម នៅសង្កាត់ជ្រាវ ដោយឃាត់ខ្លួនជនសង្ស័យពីរនាក់ប្ដីនិងប្រពន្ធ បញ្ជូនទៅតុលាការ
ខេត្តសៀមរាប៖ករណីឃាតកម្មយ៉ាងព្រៃផ្សៃទៅលើបុរសម្នាក់ បង្កការភ្ញាក់ផ្អើលកាលពីវេលាម៉ោង ០៤ និង១០នាទីទាបភ្លឺ ឈានចូលថ្ងៃទី០៨ ខែតុលា ឆ្នាំ២០២៣ នៅចំណុចធ្លុកទឹកមាត់ប្រឡាយជាប់ផ្លូវជាតិលេខ៦ ស្ថិតនៅក្នុងភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាប ត្រូវបានកម្លាំងនគរបាលខេត្តសៀមរាប ដឹកនាំផ្ទាល់ដោយលោកវរសេនីយ៍ឯក នួន ស័ក្ដិចំរើនរិទ្ធ ស្នងការរងទទួលផែនការងារនគរបាលព្រហ្មទណ្ឌខេត្ត លោកឧត្តមសេនីយ៍ត្រី ណុប សារ៉ាក់ លោកស្នងការរងទទួលដឹកនាំការិយាល័យនគរបាលព្រហ្មទណ្ឌកម្រិតធ្ងន់-លោកវរសេនីយ៍ឯក សុខ ម៉េងអ៊ាង ប្រធានការិយាល័យនគរបាលព្រហ្មទណ្ឌកម្រិតធ្ងន់ ក្រោមការបញ្ជាផ្ទាល់ពីលោកឧត្តមសេនីយ៍ទោ តេង ច័ន្ទណាត ស្នងការនគរបាលខេត្ត និងមានសម្របសម្រួលនីតិវិធីពីឯកឧត្តម មាស ច័ន្ទពិសិដ្ឋ ព្រះរាជអាជ្ញា នៃអយ្យការអមសាលាដំបូងខេត្តសៀមរាប ចុះធ្វើការស្រាវជ្រាវរហូតកំណត់បានមុខសញ្ញាឈានដល់ការឃាត់ខ្លួនជនសង្ស័យពីរនាក់ប្ដីនិងប្រពន្ធ យកទៅសួរនាំតែម្តង ។
ពាក់ព័ន្ធនិងករណីឃាតកម្មនេះបើតាមសមត្ថកិច្ចបានបញ្ជាក់ថា កាលពីវេលាម៉ោង ០៤ និង១០នាទីទាបភ្លឺ ឈានចូលថ្ងៃទី០៨ ខែតុលា កម្លាំងនគរបាលទទួលបានព័ត៌មានពីកម្លាំងនគរបាលចរាចរណ៍ តាមរយៈទូរស័ព្ទថា មានជនមិនស្គាល់អត្តសញ្ញាណម្នាក់ ភេទប្រុស មានសំបុរស្រអែម អាយុប្រហែល៣៥ឆ្នាំ មានកំពស់ប្រហែល ១៥០សង់ទីម៉ែត្រ មានសាក់រូបនៅលើដើមទ្រូង និងផ្នែកខ្នង ពាក់អាយឺតដៃវែង ពណ៌ខ្មៅ ស្លៀកខោសាច់ក្រណាត់ជើងខ្លី ត្រឹមជង្គង់ ពណ៌ខ្មៅ បានដេកស្លាប់ក្នុងធ្លុកទឹកមាត់ប្រឡាយ ជាប់ផ្លូវជាតិលេខ៦ ខាងលិចភោជនីយដ្ឋានអាប៉ូឡូប្លាស្សាប្រហែល ១០០ម៉ែត្រ ស្ថិតនៅចំណុខខាងលើភ្លាមនោះសមត្ថកិច្ចបានចុះដល់កន្លែងកើតហេតុ ដឹកនាំដោយលោក ង៉ិល សុវណ្ណរិទ្ធិ អយ្យការរងអមសារដំបូងខេត្តសៀមរាប ដោយមានការចូលរួមសហការពីនគរបាលបច្ចេកទេសវិទ្យាសាស្ត្រ និងលោកវេជ្ជបណ្ឌិតផ្នែកកោសល្យវិច័យ នៃមន្ទីពេទ្យបង្អែកខេត្ត សៀមរាប បានធ្វើការពិនិត្យវិភាគកន្លែងកើតហេតុ និងពិនិត្យសាកសព និងធ្វើការសាកសួរសាក្សី។
តាមរយៈការស្រាវជ្រាវ ស៊ើបអង្កេត កម្លាំងនគរបាលព្រហ្មទណ្ឌកម្រិតធ្ងន់សហការណ៍ជាមួយកម្លាំងអធិការដ្ឋាននគរបាលស្រុកសូទ្រនិគមកំណត់បានមុខសញ្ញាឈាន់ដល់ការឃាត់ខ្លួនជនសង្ស័យចំនួន ២នាក់ ១.ឈ្មោះ ហូល ហៃ ហៅ ម៉ែន ភេទប្រុស អាយុ ៣១ឆ្នាំ មុខរបរ កម្មករ និង២.ឈ្មោះ កឿម កាន ភេទស្រី អាយុ ២៨ឆ្នាំ មុខរបរ កម្មករ ទាំងពីនាក់នេះបច្ចុប្បន្នរស់នៅភូមិបេង ឃុំដានរុន ស្រុកសូទ្រនិគម យកទៅសួរនាំ។នៅចំពោះមុខសមត្ថកិច្ចជនសង្ស័យទាំង០២នាក់ បានឆ្លើយសារភាពថា:រូបគេពិតជាធ្វើសកម្មភាពខាងលើពិតប្រាកដមែន ដោយនៅវេលាម៉ោង០២និង០០នាទី រំលងអាធ្រាត្រឈានចូលថ្ងៃទី០៨ ខែតុលា រូបគេបានបើម៉ូតូឌុបប្រពន្ធ ប្រដាប់ដោយខ្វែវ ១ដើម ចេញពីផ្ទះមករកគូទំនាស់នៅចំណុចតូបលក់បាយកន្លែងកើតហេតុ ព្រោះជនរងគ្រោះជាគូរទំនាស់ តែងតែដេកនៅទីនោះរៀងរាល់យប់។ ពេលទៅដល់រូបគេបានចុះពីម៉ូតូកាប់ជនរងគ្រោះ ដោយប្រើដៃទាំងសងខាង កាប់ចំក ផ្នែកខាងមុខចំនួន ១ខ្វែវ ខណៈដែលជនរងគ្រោះដេកផ្ងា ភ្លាមនោះជនរងគ្រោះបានប្រកាច់ចេញពីតូបលក់បាយទៅទិសខាងត្បូងផ្លូវជាតិលេខ ៦ហើយដួលផ្កាប់មុខនៅចិញ្ចើមផ្លូវ ហើយរូបគេបានកាប់បន្ថែមចំត្រង់ស្លាបប្រជៀងផ្នែកខាងស្តាំ ផ្នែកខាងក្រោយ ចំនួន ១ខ្វែវ និងកាប់ចំត្រង់ចង្កេះខាងស្តាំ ចំនួន ១ខ្វែវទៀត បន្ទាប់មកបានឲ្យប្រពន្ធជួយលើកជនរងគ្រោះបោះចូលទៅ ក្នុងធ្លុកទឹកមាត់ប្រឡាយ ហើយបើកម៉ូតូគេចទៅផ្ទះវិញ ហើយយកក្រណាត់ជូនសម្អាតឈាមចេញពីខ្វែវ លុះព្រឹកឡើង រូបគេបានសំលៀង និងលាងសំអាតខ្វែវ ហើយយកទៅសៀតនៅលើធ្នឹមផ្ទះ បន្ទាប់មកទើបយកក្រណាត់ដែល ប្រឡាក់ឈាមដាក់ដុតជាមួយកំនរសំរាមក្បែរផ្ទះ លុះដល់វេលាម៉ោង១២និង០០នាទី ថ្ងៃ.ខែ.ឆ្នាំ ដដែល ក៏ត្រូវបាន សមត្ថកិច្ចចុះនាំខ្លួនតែម្តង។
ជនសង្ស័យជាប្រពន្ធបានសារភាពដែរថា៖ នៅវេលាម៉ោង២១និង០០នាទីយប់ មុនថ្ងៃកើតហេតុមួយសប្តាហ៍ ប្តីរបស់ខ្លួនមានទំនាស់ និងប្រើហិង្សាជាមួយជនរងគ្រោះខាងលើ ខណៈកំពុងអង្គុយផឹកស្រារសជុំគ្នា ហើយនៅយប់កើតហេតុវេលាម៉ោង០២និង០០នាទី រំលងអាធ្រាត ប្តីបានបើកម៉ូតូឌុបរូបនាងប្រដាប់ដោយខ្វែវ ១ដើម មកធ្វើសកម្មភាពកាប់លើគូរទំនាស់តែម្តង ។វត្ថុតាងដកហូតបាន កាំបិតខ្វែវដងឈើ ចំនួន០១ ដើម បច្ចុប្បន្នជនសង្ស័យទាំង០២នាក់ខាងលើ ត្រូវបានកម្លាំងនគរបាលព្រហ្មទណ្ឌកម្រិតធ្ងន់ ធ្វើការសាកសួរ និងកសាងសំណុំរឿង បញ្ជូនទៅស្ថាប័នអយ្យការអមសាលាដំបូងខេត្តសៀមរាប ដើម្បីចាត់ការបន្តតាមនីតិវិធី ៕
