រដ្ឋមន្ត្រីក្រសួងព័ត៌មាន ស្នើឲ្យអ្នកសារព័ត៌មានទាំងអស់ គោរពវិជ្ជាជីវៈរបស់ខ្លួន គោរពសិទ្ធិបុគ្គលឯកជន គោរពច្បាប់រដ្ឋ ពិសេសច្បាប់ស្តីពីរបបសារព័ត៌មាន
(ភ្នំពេញ) ៖ឯកឧត្តម នេត្រ ភត្រា រដ្ឋមន្ត្រីក្រសួងព័ត៌មាន នារសៀលថ្ងៃទី១៧ ខែកញ្ញា ឆ្នាំ២០២៣នេះ អញ្ជើញជាអធិបតីក្នុងពិធីបិទវគ្គសិក្សាស្តីពី « ភាពជាអ្នកគ្រប់គ្រង និងដឹកនាំអង្គភាពសារព័ត៌មាន » ដែលរៀបចំដោយសមាគមន៍អភិវឌ្ឍន៍វិជ្ជាជីវៈអ្នកសារព័ត៌មានកម្ពុជា ដែលគាំទ្រដោយក្រសួងព័ត៌មាន និងក្រសួងបរិស្ថាន ។
ថ្លែងនៅក្នុងឱកាសនោះ ឯកឧត្តម នេត្រ ភត្រា បានសម្តែងនូវការកោតសរសើរ និងវាយតម្លៃខ្ពស់ចំពោះសមាគមន៍អភិវឌ្ឍន៍វិជ្ជាជីវៈអ្នកសារព័ត៌មានកម្ពុជា ដែលបានរៀបចំវគ្គបណ្តុះបណ្តាលស្តីពី «ភាពជាអ្នកគ្រប់គ្រង និងដឹកនាំអង្គភាពសារព័ត៌មាន» ដោយឥតគិតថ្លៃ ជូនដល់សិក្ខាកាម ៣៨១នាក់ ដែលអញ្ជើញមកពីតាមបណ្តារាជធានី ខេត្ត ។
ជាមួយគ្នានោះដែរឯកឧត្តមរដ្ឋមន្ត្រី បានលើកឡើងថា ឯកឧត្តមនឹងរៀបចំស្តង់ដារប្រតិបត្តិការរួមតែមួយសម្រាប់អ្នកសារព័ត៌មាន និងរៀបចំបង្កើតវិទ្យាស្ថានជាតិ និងមុខងារសាធារណៈដើម្បីបណ្ដុះបណ្ដាល និងផ្ដល់ឱកាសឲ្យអ្នកសារព័ត៌មាន អាចដាក់ពាក្យចូលរៀនបាន។
ក្នុងនោះឯកឧត្តម ក៏បានធ្វើការផ្តាំផ្ញើដល់សិក្ខាកាមទាំងអស់ ត្រូវយកចំណេះដឹង ដែលទទួលបានពីការចែករំលែករបស់វាគ្មិន ក្នុងវគ្គសិក្សានេះ ទៅអភិវឌ្ឍខ្លួន អភិវឌ្ឍអង្គភាពខ្លួន និងចូលរួមពង្រឹងគុណភាពនិងការផ្សព្វផ្សាយនៅកម្ពុជា អ្នកសារព័ត៌មានមួយដែលខ្លាំងត្រូវតែធ្វើព័ត៌មានដែលខ្លី ខ្លឹម ហើយខ្លាំង។ទន្ទឹមនោះឯកឧត្ត ក៏បានស្នើឲ្យអ្នកសារព័ត៌មានទាំងអស់ គោរពវិជ្ជាជីវៈរបស់ខ្លួន គោរពសិទ្ធិបុគ្គលឯកជន គោរពច្បាប់រដ្ឋ ពិសេសច្បាប់ស្តីពីរបបសារព័ត៌មាន។
សូមជំរាបផងដែរថា វគ្គសិក្សាស្តីពី « ភាពជាអ្នកគ្រប់គ្រង និងដឹកនាំអង្គភាពសារព័ត៌មាន» នេះដែរគឺមានរយៈពេល ២ថ្ងៃពេញ នៅអាគាររាជបណ្ឌិត្យសភាកម្ពុជា ក្នុងវគ្គបណ្ដុះបណ្តាលឯកឧត្តម ផុស សុវណ្ណ ប្រតិភូអមនាយករដ្ឋមន្ត្រីទទួលបន្ទុកជាអគ្គនាយក នៃអគ្គនាយកដ្ឋានព័ត៌មាន និងសោទស្សន៍ លើកឡើងថា ដោយសារមានភាពជឿនលឿននៃប្រព័ន្ធឌីជីថល គឺយើងមានការប្រឈមអំពីព័ត៌មាន Fake News។ ក្រោមការដឹកនាំរបស់នាយករដ្ឋមន្ត្រីនៅអាណត្តិទី៧ សម្ដេចបវរធិបតី ហ៊ុន ម៉ាណែ យុទ្ធសាស្ត្របបញ្ចកោន ចំនួន៥ ក្នុងនោះឯកឧត្តមបានលើកឡើងនូវចំណុចទី១ ដែលដាក់ចេញជាគោលការបស់រដ្ឋាភិបាលគឺផ្ដោតទៅលើ មនុស្ស ទឹក ផ្លូវ ហើយនិងភ្លើង។
ទន្ទឹមនោះលោកបណ្ឌិត ហោ គន្ធា ប្រធានសមាគមអភិវឌ្ឍន៏វិជ្ជាជីវៈអ្នកសារព័ត៌មានកម្ពុជា បានមានប្រសាសន៍ឡើងថា នេះជាលើកទី៣ ហើយវគ្គបណ្ដុះបណ្ដាល របស់សមាគម(CJDS) តែងតែបានគិតគូរ ដល់បងប្អូនអ្នកសារព័ត៌មាន នូវក្រមសីលធម៌វិជ្ជាជីវៈរបស់ខ្លួន៕ ដោយ ៖ លោក ម៉ង់ អង្គារ
