ឧកញ៉ាចិត្តធម៌ លន់ វណ្ណឆាយ ហៅឆយ ដែលមានជីវភាពខ្វះខាត តែចិត្តទូលាយលះបង់ដីផ្ទាល់ខ្លួនផ្តល់ជូនថ្នាក់ដឹកនាំធ្វើសាលារៀននៅភូមិក្បាលស្ពាន២ សង្កាត់អូរជ្រៅ បានទទួលមរណៈភាពហើយ តែអាជ្ញាធរហាក់បីដូវជាមិនសូវខ្វល់ខ្វាយ
ខេត្តបន្ទាយមានជ័យ៖ ដោយសារតែរោគគាពាធ(ជំងឺប្រចាំកាយរបស់មនុស្សចាស់ដ៏រ៉ាំរ៉ៃ) និងគួបផ្សំជាមួយនឹងជីវភាពខ្វះខាតក្នុងគ្រួសារមិនមានថវិកា ដើម្បីព្យាបាលជំងឺ និងទិញគ្រឿងឧបរិភោគ បរិភោគសម្រាប់ផ្គត់ផ្គង់គ្រប់គ្រាន់ផងនោះ ធ្វើឲ្យលោកឧកញ៉ា លន់ វ៉ាន់ឆាយ ហៅ ឆយ ទទួលមរណៈភាពនាវេលាថ្ងៃត្រង់ ថ្ងៃទី០១ ខែសីហា ឆ្នាំ២០២៣ ក្នុងជន្មាយុ៧២ឆ្នាំ នៅគេហដ្ឋានរបស់លោក ស្ថិតនៅក្នុងភូមិក្បាលស្ពាន២ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ។
សូមជំរាបផងដែរថា ការពីដើមខែកក្កដា ឆ្នាំ២០២៣ មុនថ្ងៃបោះឆ្នោត លោកជំទាវ សៅ ផល្លា ដែលត្រូវជាភរិយា លោកឧកញ៉ា លន់ វ៉ាន់ឆាយ ហៅ ឆយ បានដាច់ចិត្តលើកដៃសំពះស្នើសុំដល់ថ្នាក់ដឹកនាំជួយ តាមរយះបណ្តាញសារព័ត៌មាន ជាព្រាបនាំសារ ខណៈដែលលោកឧកញ៉ា លន់ វ៉ាន់ឆាយ ហៅ ឆយ មានជំងឺប្រចាំកាយ និងវង្វេង ដោយមិនមានថវិកា ដើម្បីព្យាបាលជំងឺ និងទិញគ្រឿងឧបរិភោគ បរិភោគសម្រាប់ផ្គត់ផ្គង់ ។ក្រោយពីទទួលបានព័ត៌មាននេះ អ្នកសារព័ត៌មានយើងក៏បាន ផ្ញើវីដេអូរ និងសំណេរៀបរាប់អំពីទុកលំបាករបស់គ្រួសារលោកឧកញ៉ា និងលោកជំទាវ ជូនលោក គាត ហ៊ុល អភិបាលក្រុងប៉ោយប៉ែតតាមបណ្តាញតេលេក្រាម លោកបានត្រឹមតែបើកមើលមិនឆ្លើយតប ៤ ទៅ៥ថ្ងៃក្រោយអ្នកសារព័ត៌មានយើងក៏បានបន្តផ្ញើជូនឯកឧត្តមអភិបាលខេត្ត មិនទាន់បានកន្លះម៉ោងផងក៏ស្រាប់តែលោកអភិបាលក្រុងបានផ្ញើវីដេអូរនិងសំណេដែលបានផ្ញើជូននោះត្រលប់មកវិញ រួមជាវ៉យសំលេងប្រាប់ថា បើមិនថ្ងៃស្អែ ក៏ខានស្អែក លោកនឹងចុះទៅសួរសុខទុក និងនាំយកអំណោយទៅចែកជូនគាត់ និងឲ្យអ្នកសារព័ត៌មានជូនទៅទៀតផងដែរ ។
រហូតមកដល់ថ្ងៃទី៣១ ខែកក្កដា ឆ្នាំ២០២៣ លោកជំទាវ សៅ ផល្លា បានប្រាប់ថា មិនដែលឃើញអាជ្ញាធរណាម្នាក់ចុះមកសួរសុខទុកនោះទេ លុះនាព្រឹកថ្ងៃទី១ ខែសីហា ឆ្នាំ២០២៣ ក៏បានខលទូរស័ព្ទរៀបរាប់ប្រាប់អ្នកសារព័ត៌មានថា លោកតា មិនមានសង្ឃឹមនោះទេ ដូច្នេះសូមឲ្យជួយផ្សព្វផ្សាយផង ក្រែងបានដល់ថ្នាក់ដឹកនាំ ពិសេសដល់ឯកឧត្តម ហ៊ុន ម៉ាណែត បានជួយ មិនទាន់បានប៉ុន្មានផងក៏ស្រាប់តែនៅវេលាថ្ងៃត្រង់លោកជំទាវ ក៏បានខលប្រាប់ទាំងទឹកភ្នែកថា លោកតា ដែលមានងាជាឧកញ៉ាចិត្តធម៌ខាងលើបានស្លាប់ទៅហើយ ។
បើតាមការឲ្យដឹងពីលោកជំទាវ សៅ ផល្លា បានបញ្ជាក់ថា កាលពីអំឡុងឆ្នាំ១៩៩៧ លោកតា បានផ្តល់ដីផ្ទាល់ខ្លួនមួយកន្លែងដែលមានទំហំ១០០ម៉ែត្រ គុណ៧៥ម៉ែត្រ ជូនដល់ថ្នាក់ដឹកនាំសម្រាប់ធ្វើសាលារៀន ដែលបច្ចុប្បន្នសាលារៀននោះមានឈ្មោះថា អនុវិទ្យាល័យ បាលិលេយ្យ ស្ថិតនៅក្នុងភូមិក្បាលស្ពាន២ សង្កាត់អូរជ្រៅ ក្រុងប៉ោយប៉ែត ដោយមិនយកថវិការឬសម្ភារៈអ្វីទាំងអស់ទោះបីជាឯកឧត្តម ហ៊ុន ម៉ាណែត ប្រគល់ជាផ្ទះ ឬក៏ជាថវិការជំនួសវិញយ៉ាណាក្តីក៏លោកតា បដិសេដមិនយក ទាំងជីវភាពរបស់លោកតាមិនមានដូចគេក្តី(ខ្វះខាត) ដោយសុំតែកិត្តិយសតែប៉ុណ្ណោះ ក្រោយមកទៀតក៏ទទួលបានគោរមងាជាឧកញ៉ា ទាំងនេះសរបញ្ចាក់ ឲ្យឃើញពីទឹកចិត្តសប្បុរស ដ៏ថ្លៃថ្លា ដែលអ្នកមួយចំនួនសឹងមិនអាចធ្វើបាន ពីព្រោះថា លោកមិនមែនជាអ្នកមានទ្រព្យធុននោះទេ ក៏ប៉ុន្តែលោកមានចិត្តទូលាយ លះបង់ដ៏ធំធេងជូនថ្នាក់ដឹកនាំ ដ៏ដូចជាប្រជាពលរដ្ឋ ពិសេសសិស្សានុសិស្សក្នុងក្រុងប៉ោយប៉ែតតែម្តង ៕
