កូនប្រុសបង្កើតយកកាំបិតអារ ក ម្តាយស្លាប់ក្នុងថ្លុកឈាមយ៉ាងអាណោចអាធ័ម ព្រោះតែរឿងសុំលុយមិនបាន
(ភ្នំពេញ)៖ស្ត្រីវ័យជាង៦០ឆ្នាំម្នាក់ ត្រូវកូនបង្កើតយកកាំបិតអារ ក បណ្តាលឲ្យស្លាប់ក្នុងថ្លុកឈាមយ៉ាងអាណោចអាធ័ម ព្រោះតែរឿងសុំលុយមិនបាន។ហេតុការណ៍នេះបានកើតឡើងកាលពីយប់ ថ្ងៃទី៣១ ខែមីនា ឆ្នាំ២០២៣ នៅចំណុចបន្ទប់ផ្ទះជួលជាន់ទី១ ស្ថិតក្នុងភូមិ២៣ ក្រុម១០៦ សង្កាត់បឹងកក់២ ខណ្ឌទួលគោក រាជធានីភ្នំពេញ ។
សពជនរងគ្រោះជាម្ដាយមានឈ្មោះ តយ លឿ អាយុប្រហែល ៦០ឆ្នាំ មុខរបរផ្នែកអនាម័យនៅផ្ទះសំណាក់មួយកន្លែង ស្នាក់នៅកន្លែងកើតហេតុ មានស្រុកកំណើត ភូមិច្រេះ ឃុំច្រេះ ស្រុកមេសា ខេត្តព្រៃវែង។ចំណែកជនដៃដល់ជាកូនមានឈ្មោះ ឈាត ឆែ ភេទប្រុស អាយុជាង៣០ឆ្នាំ មុខរបរលើអីវ៉ាន់នៅផ្សារនាគមាស ស្នាក់នៅជាមួយគ្នា។
បើតាមប្រភពព័ត៌មានបានឲ្យដឹងថា ជនដៃដល់មានជំងឺសរសៃប្រសាទជាយូរណាស់មកហើយ ។ហើយនៅមុនកើតហេតុ ជនដៃដល់ជាកូនបានសុំលុយម្ដាយចំនួន ៣៥ម៉ឺនរៀល តែម្ដាយមិនឱ្យ លុះដល់ម៉ោងកើតហេតុខាងលើស្រាប់តែឃើញជនរងគ្រោះជាម្ដាយបានស្រែកឆោឡោឱ្យគេជួយ ក៏មានការភ្ញាក់ផ្អើលដល់បងប្អូនប្រជាពលរដ្ឋនាំគ្នាទៅមើល ក៏ឃើញជនរងគ្រោះជាម្ដាយត្រូវកូនអារ ក សម្លាប់ ស្លាប់នៅក្នុងថ្លុកឈាមបាត់ទៅហើយ។
បុរសម្នាក់ត្រូវជាប្អូនថ្លៃជនរងគ្រោះបានឲ្យដឹងថា កាលពីម្សិលមិញ គឺកូនប្រុសជាជនដៃដល់ បានសុំលុយម្ដាយជនរងគ្រោះចំនួន៣៥ម៉ឺនរៀល តែម្តាយមិនឱ្យដោយប្រាប់កូនថា លុយម្តាយទិញចិញ្ចៀនអស់ហើយ ហើយនៅខ្លះទុកគ្រាន់ទៅលេងស្រុកចូលឆ្នាំខ្មែរ នាពេលខាងមុខនេះ។ ប្រភពដដែលបានបន្តថា កូនប្រុសរបស់គាត់ដែលជាជនដៃដល់តែងតែសុំលុយម្ដាយយកទៅលេងល្បែងតាមអនឡាញជាញឹកញាប់ហើយចាញ់អស់មកសុំទៀត ដោយថ្ងៃកើតហេតុម្ដាយមិនឱ្យ ក៏បែកសតិយកកាំបិតអារ ក ម្ដាយដេកស្លាប់នៅក្នុងថ្លុកឈាមយ៉ាងអាណោធអាធ៌មនៅក្នុងបន្ទប់ជួលតែម្ដង ។ ភ្លាមៗជនដៃដល់ក៏ត្រូវបានប្រជាពលរដ្ឋនាំគ្នាឃាត់ខ្លួនប្រគល់ឱ្យសមត្ថកិច្ចចាត់ការតាមច្បាប់ ។
ក្រោយពីកើតហេតុកម្លាំងសមត្ថកិច្ចមូលដ្ឋាន សហការជាមួយជំនាញផ្នែកកោសល្យវិច័យ នៃស្នងការដ្ឋាននគរបាលរាធានីភ្នំពេញ បានចុះមកពិនិត្យ និងធ្វើកំណត់ហេតុ រួចប្រគល់សពឱ្យទៅសាច់ញាតិបងប្អូនចាត់ចែងធ្វើបុណ្យតាមប្រពៃណី ៕
