ខេត្តបន្ទាយមានជ័យ៖អង្គការសាម៉ារីតាន់ភឺស តាមរយៈក្រុមជំនុំ មេតូឌីស្ទ បានសហការជាមួយគណៈកម្មាធិការគ្រិស្តបរិស័ទខេត្តបន្ទាយមានជ័យបាន ធ្វើការផ្តល់កញ្ចប់អំណោយជូនដល់បងប្អូនប្រជាពលរដ្ឋ ដែលជាជនភៀសសឹក បានជម្លៀសចេញពីតំបន់ព្រំដែន ជម្លោះខ្មែរ សៀម ហើយក៏គាត់បានមកស្នាក់បី លើទីទួលសុវត្ថិ ។ពិធីនេះដែរក៏មានការចូលរួម ពីសំណាក់លោកជំទាវ នួម សុភ័ណ អ្នកតំណាងរាស្ត្រមណ្ឌលខេត្តបន្ទាយមានជ័យ លោក លី សុវណ្ណារិទ្ធ អភិបាលរង ខេត្តផងដែរ
លោក គឹម វិវឌ្ឍន៍ ប្រធានក្រុមមេតូឌីស្ទ និងជា អនុប្រធានគណៈកម្មាធិការគ្រិស្តបរិស័ទ ប្រចាំខេត្តបន្ទាយមានជ័យ បានបញ្ជាក់ថា អង្គការសាម៉ារីតាន់ភឹស បានផ្តល់នូវអំណោយជាកញ្ចប់ ដល់បងប្អូនប្រជាពលរដ្ឋភៀសសឹក ដែលកំពុងជួបការលំបាក សរុបចំនួន ២២០០កញ្ចប់ និងបានធ្វើការបែងចែក ចំនួន ៤កន្លែង នៅក្នុងខេត្ត។ ដោយឡែក សម្រាប់ការបែងចែក ក្នុងស្រុកអូរជ្រៅនៅថ្ងៃនេះ មានចំនួន ១២២២កញ្ចប់ ដោយក្នុងម្នាក់ៗ ទទួលបានអង្ករ ១០គីឡូក្រាម ទឹកសុទ្ធ២យួរ ឃីត១ធុង រីឯសម្រាប់កុមារក្មេងៗ មានការបែងចែកជូនជានំនិងសម្លៀកបំពាក់។
លោក លី សុវណ្ណារិទ្ធ អភិបាលរង ខេត្ត បានមានប្រសាសន៍ថ្លែងអំណរគុណជាទីបំផុតចំពោះ អង្គការសាម៉ារីតាន់ភឹស និងគណៈកម្មការគ្រិស្តបរិស័ទប្រចាំខេត្តបន្ទាយមានជ័យ ក្រុមយុវជនគ្រិស្តបរិស័ទ ដែលបានផ្តល់អំណោយមនុស្សធម៌ ដល់បងប្អូនប្រជាពលរដ្ឋភៀសសឹក ដែលកំពុងតែជួប ការបែកបាក់ផ្ទះសម្បែង សិស្សានុសិស្ស ពុំសូវបានរៀនសូត្រ បាត់បង់ពេលវេលានៃការរកស៊ី បញ្ហានេះគឺដោយសារតែពួកចោរសៀម ឈ្លានពានទឹកដី បង្កជម្លោះតាមខ្សែបន្ទាត់ព្រំដែន បានធ្វើឲ្យកងទ័ពបាត់បង់ជីវិតនិងរបួសស្នាមបង្កជាទុក្ខវេទនាដល់បងប្អូនប្រជាពលរដ្ឋរាប់ម៉ឺននាក់។
លោក លី សុវណ្ណារិទ្ធ បានបន្តថា បងប្អូនទាំងអស់ ដែលកំពុងរស់នៅបណ្ដោះអាសន្ននៅទីនេះ មានភាពលំបាក ប៉ុន្តែសុំធ្វើយ៉ាងណារក្សាសុខភាពអនាម័យ ហូបស្អាតផឹកស្អាត និងចូលរួមតាមដានសភាពការណ៍ឲ្យបានជាប្រចាំ ជឿជាក់លើរាជរដ្ឋាភិបាលក្នុងការដឹកនាំដោះស្រាយបញ្ហា ទាហានសៀម ដែលបានធ្វើការរំលោភអធិបតេយ្យភាព បូរណភាពទឹកដី កម្ពុជាយើង ក្នុងនោះ វីរៈជនកងទ័ពដ៏ក្លាហានរបស់យើងកំពុងការពារទឹកដី និងប្រាសាទ គ្រប់គ្រងបានទាំងស្រុង៕