អង្គការការីតាសស្វីស សហការជាមួយអង្គការតំណក់ទឹកសាខាប៉ោយប៉ែត រៀបចំពិធីប្រគុំតន្ត្រី និងសម្ដែងសៀកស្ដីពីការធ្វើចំណាកស្រុកប្រកបដោយសុវត្ថិភាព
ខេត្តបន្ទាយមានជ័យ៖ ដើម្បីឲ្យប្រជាពលរដ្ឋបានយល់ដឹងឱ្យកាន់តែច្បាស់អំពីការធ្វើចំណាកស្រុកដោយប្រថុយប្រថាន ពោលគឺខុសច្បាប់ នោះ នាយប់ថ្ងៃទី១៤ ខែវិច្ឆិកា ឆ្នាំ២០២៣ អង្គការការីតាសស្វីស សហការជាមួយអង្គការតំណក់ទឹក ប៉ោយប៉ែត រួមនឹងអង្គការដៃគោពាក់ព័ន្ធជាច្រើនផ្សេងទៀត បានរៀបចំពិធីប្រគុំតន្ត្រី និងសម្ដែងសៀកស្ដីពីការធ្វើចំណាកស្រុកប្រកបដោយសុវត្ថិភាព ក្រោមអធិបតីភាពលោក ញឹម ផឿង អភិបាលរង ក្រុងប៉ោយប៉ែត តំណាងលោក គាត ហ៊ុល អភិបាលនៃគណៈអភិបាលក្រុង ។ពិធីនេះបានធ្វើឡើងនៅសាលាបឋមសិក្សាព្រហ្មនិមិត្ត ស្ថិតនៅក្នុងសង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ដោយមានការអញ្ជើញចូលរួមពីលោកស្រី ឈា ម៉ានិត ប្រធានមជ្ឈមណ្ឌលសុំចតប៉ោយប៉ែត លោក ឡុង សានរិទ្ធី នាយកសាខាអង្គការតំណក់ទឹកសាខាប៉ោយប៉ែត លោក សាន់ ស៊ីថុន តំណាងអង្គការការីតាសស្វីស លោក តាំង លីហេង ក្រុមប្រឹក្សាសង្កាត់អូរជ្រៅ កងកម្លាំងប្រដាប់អាវុធ និងអាជ្ញាធរមូលដ្ឋាន រួមនឹងប្រជាពលរដ្ឋ កុមារ ប្រមាណ ជិត ១០០០ នាក់ផងដែរ។
នាឱកាសនោះលោក ឡុង សានរិទ្ធី នាយកសាខាអង្គការតំណក់ទឹកសាខាប៉ោយប៉ែត បានមានប្រសាសន៍ជម្រាបជូនក្នុងអង្គពិធីថា អង្គការដតំណក់ទឹក ចាប់ផ្ដើមដំណើរការនៅក្នុងប្រទេសកម្ពុជារហូតមកដល់បច្ចុប្បន្នជាង ២០ឆ្នាំមកហើយ ដោយមានចំនួន៤ មណ្ឌល ក្នុងខេត្ត ក្រុង ក្នុងព្រះរាជាណាចក្រកម្ពុជា រួមមាន ភ្នំពេញ ព្រៃវែង កែប និងបន្ទាយមានជ័យ ។
លោកបញ្ជាក់ថា អង្គការនេះបង្កើតឡើងគឺក្នុងគោលបំណងជួយដល់កុមារដែលរងគ្រោះ ដោយអំពើផ្សេងៗ និងជួយស្វែងរកការងារជូនប្រជាពលរដ្ឋ ក៏ដូចជាឪពុកម្ដាយកុមារងាយរងគ្រោះ ដើម្បីឲ្យពួកគាត់មានការងារធ្វើ មានមុខរបរ ចំណែកយុវជនផ្តល់ការបណ្ដុះបណ្ដាលជំនាញវិជ្ជាជីវៈ និងជួយដល់ពលករចំណាកស្រុក ពិសេសជួយថែទាំកុមារដែលរងគ្រោះផ្សេងៗ នៅប្រទេសថៃ ក៏ដូចជានៅតាមសហគមន៍ ដែលមានការរំលោភបំពានផ្សេងៗជាដើម ដែលបានបញ្ជូនមកតាមរយៈមណ្ឌលសុំចត ឬអាជ្ញាធរ។ជាងនេះទៅទៀតអង្គការមានការបង្រៀនអប់រំក្រៅប្រព័ន្ធ ដល់កុមារដែលនៅក្រៅសាលាមិនបានសិក្សារៀនសូត្រដូចកុមារដទៃផងដែរ។
ជាមួយគ្នានោះដែរ អភិបាលរង ក្រុង លោក ញឹម ផឿង បានសម្ដែងការអរគុណនិងកោតសរសើរចំពោះអង្គការទាំងជាតិ និងអន្តរជាតិ ទាំងអស់ ដែលបានចូលរួមចំណែកយ៉ាងសកម្មជាមួយអាជ្ញាធរក្នុងការជួយដល់បងប្អូនប្រជាពលរដ្ឋ ដែលចំណាកស្រុកឲ្យទទួលបានសេវាសុវត្ថិភាពសម្រាប់ខេត្តនេះគួរជាទីមោទនៈ ពិសេសជួយដល់កុមារកម្ពុជា ដែលរងគ្រោះផ្សេងៗ ។នេះគឺជាការចូលរួមចំណែកដ៏សំខាន់ជាមួយប្រមុខរាជរដ្ឋាភិបាលកម្ពុជា និងអាជ្ញាធរ ក្នុងការជួយដល់ប្រជាពលរដ្ឋ ពិសេសកុមារដែលរងគ្រោះដោយសារអំពើផ្សេងៗ ដើម្បីកាត់បន្ថយភាពក្រីក្រមួយចំណែកផងដែរ។
ជាកិច្ចបញ្ចប់នៃកម្មវិធី គណៈអធិបតីបានអញ្ជើញទស្សនានូវការសម្ដែងសៀកកាយសម្ព័ន្ធ និងរឿងការធ្វើចំណាក់ស្រុកប្រកបដោយសុវត្ថិភាព ដោយមានមានខ្លឹមសារនិងអត្ថន័យយ៉ាងជ្រាជ្រៅបំផុតដែលធ្វើឲ្យអ្នកចូលរួមទស្សនាយ៉ាងច្រើនកុះករនោះ សម្តែងការស្រែកហូរកញ្ជៀវគងរំពងគ្រប់ៗគ្នា៕
