យុវជនកាកបាទក្រហមកម្ពុជាខេត្តកណ្ដាលចំនួន ២៧៨នាក់ នៃសាលាគោលដៅស្រុកពញាឮ ទទួលបានប័ណ្ណសម្គាល់ខ្លួន ពីឯកឧត្តម គង់ សោភ័ណ្ឌ
(ខេត្តកណ្តាល)៖នាព្រឹកថ្ងៃទី២២ ខែមេសា ឆ្នាំ២០២២ ឯកឧត្តម គង់ សោភ័ណ្ឌ ប្រធានគណៈកម្មាធិការកាកបាទក្រហមកម្ពុជាខេត្តកណ្ដាល និងជាអភិបាល នៃគណៈអភិបាលខេត្តកណ្ដាល បានអញ្ជើញសំណេះសំណាល និងប្រគល់ប័ណ្ណសម្គាល់ខ្លួនជូនយុវជនកាកបាទក្រហមកម្ពុជាខេត្តកណ្ដាល ចំនួន ២៧៨នាក់ នៃសាលាគោលដៅស្រុកពញាឮ នៅវិទ្យាល័យ ទេពប្រណម្យ ក្នុងឃុំវិហារលួង ស្រុកពញាឮ ខេត្តកណ្ដាល។
នាឱកាសនោះគង់ សោភ័ណ្ឌ បានមានប្រសាសន៍ថា ក្រោមកិច្ចដឹកនាំ ដ៏ឈ្លាសវៃ និងប៉ិនប្រសព្វ របស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា សម្ដេចបានចាត់ទុកយុវជនគឺជាអ្នកស្ម័គ្រចិត្តវ័យក្មេង ជាកម្លាំងចលក ដ៏សំខាន់ក្នុងការផ្តល់សេវាកម្មមនុស្សធម៌ ឆ្លើយតបទៅនឹងតម្រូវការរបស់ជនរងគ្រោះ និងជនងាយរងគ្រោះ ដើម្បីរួមចំណែក ក្នុងការពន្លឿនការកាត់បន្ថយភាពក្រីក្រ ការពារ និងលើកកម្ពស់សេចក្ដីថ្លៃថ្នូរបស់មនុស្សជាតិ ហើយសម្ដេចបានផ្ដល់ការគាំទ្រ លើកទឹកចិត្តជាបន្តបន្ទាប់ ធ្វើឱ្យសកម្មភាពយុវជនកាកបាទក្រហមកម្ពុជាទួលបានការគាំទ្រ យ៉ាងកុះករ ពីសំណាក់ប្រជាពលរដ្ឋកម្ពុជា ជាពិសេសយុវវ័យកម្ពុជា។
ក្នុងនោះឯកឧត្តម ក៏បានថ្លែងនូវការសរសើរ ដល់យុវជនកាកបាទក្រហមកម្ពុជាខេត្តកណ្ដាល ដែលកន្លងមក បានខ្នះខ្នែង ក្នុងការធ្វើ សកម្មភាពមនុស្សធម៌ ជួយសម្រាលការលំបាករបស់ជនងាយរងគ្រោះបំផុត និងជនរងគ្រោះដោយគ្រោះមហន្តរាយ ផ្សេងៗ នៅតាមសហគមន៍ក្នុងភូមិសាស្ត្រខេត្ត ដោយគ្មានការរើសអើង។ ពិសេសសកម្មភាព ការងារឆ្លើយតបគ្រោះមហន្តរាយ សកម្មភាពការងារសុវត្ថិភាពចរាចរណ៍ផ្លូវគោក សកម្មភាពការងារអប់រំ ផ្សព្វផ្សាយប្រយុទ្ធនឹងជំងឺឆ្លងរាតត្បាត សកម្មភាពការងារឥស្សរជនឆ្នើម សកម្មភាពការសម្អាតបរិស្ថានក្នុង បរិវេណសាលារៀន និងទីសាធារណៈ សកម្មភាពចលនាសិស្សានុសិស្សឱ្យស្ម័គ្រចិត្តជួយឧបត្ថម្ភដល់សិស្ស ដែលមានជីវភាពរស់នៅក្រីក និងសកម្មភាពចូលរួមកម្មវិធីផ្សេងៗមានកម្មវិធីទិវាជាតិ និងទិវាអន្តរជាតិជាច្រើន ទៀតដែលសាខាកាកបាទក្រហមកម្ពុជាខេត្ត បានប្រារព្ធក្នុងរយៈពេលកន្លងមក ។
ក្នុងនោះដែរសាខាកាកបាទក្រហមកម្ពុជាខេត្តកណ្ដាល បាននាំមកនូវសម្ភារៈមួយចំនួនជូនដល់យុវជនកាកបាទក្រហមកម្ពុជាស្រុកពញ្ញាឮ ចំនួន២៧៨នាក់ ក្នុងម្នាក់ៗទទួលបាន ម៉ាស់ ១០បន្ទះ ជែល ១ដប និងថវិកា ៥ម៉ឺនរៀល ក្នុងនោះនាយកសាលា និងទីប្រឹក្សាយុវជនចំនួន ១៥នាក់ ទទួលបានថវិកា ៥ម៉ឺនរៀលផងដែរ៕
