ឯកឧត្តម រដ្ឋមន្ត្រីក្រសួងព័ត៌មាន លើកទឹកចិត្តឲ្យអ្នកសារព័ត៌មាន ពិសេសអ្នកដែលមិនទាន់បានចូលរៀនវគ្គបណ្តុះបណ្តាល សូមចូលរួមតាមរយះសមាគម ឬក្រសួង ដើម្បីបង្កើននូវសមត្ថភាព ឲ្យស្របទៅតាមការអភិវឌ្ឍន៍របស់សង្គមជាតិ និងវិស័យសារព័ត៌មាន
(ភ្នំពេញ)៖ការបើកវគ្គបណ្តុះបណ្តាលជូនដល់អ្នកសារព័ត៌មាន ពិតជាមានសារៈសំខាន់ណាស់ ហើយក្រសួងព័ត៌មាន បានផ្តល់ការគាំទ្រ និងបានលើកទឹកចិត្តដល់សមាគម បន្តបើកវគ្គបណ្តុះបណ្តាលជាបន្តបន្តាប់ទៀត ។ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន មានប្រសាសន៍បែបនេះក្នុងឱកាសដែលឯកឧត្តម អញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកវគ្គបណ្តុះបណ្តាលស្តីពីការគ្រប់គ្រងព័ត៌មាន និងក្រមសីលធម៌អ្នកសារព័ត៍មាន ដែលរៀបចំដោយសមាគមសហព័ន្ធអ្នកសារព័ត៌មានសម្រាប់សន្តិភាព និងអភិវឌ្ឍន៍ កាលពីថ្ងៃទី២៣ ខែធ្នូ ឆ្នាំ២០២៣ នៅអាគាសិរីភាព ស្ថិតនៅវីថីវិចិត្រសិល្ប: សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ដោយមានការអញ្ជើញចូលរួមពីថ្នាក់ដឹកនាំ និងសមាជិក សមាជិការសមាគម ព្រមទាំងអ្នកសារព័ត៌មានមកពីបណ្តាខេត្ត ក្រុង រាជធានី ប្រមាណជិត២០០នាក់ផងដែរ ។
នាឱកាសនោះឯកឧត្តមរដ្ឋមន្ត្រី ក៏បានលើកយកនូវចំណុចសំខាន់ៗចំនួន៣ ដែលអ្នកសារព័ត៌មានយើងត្រូវដឹង ទី១–ពាក់ព័ន្ធទៅនឹងស្ថានភាពរួមនៃប្រព័ន្ធផ្សព្វផ្សាយរបស់យើងបច្ចុប្បន្នថា តើវាស្ថិតនៅកន្លែងណា? ។ទី២-ថាតើក្រសួងព័ត៌មានក្នុងអាណត្តិទី៧ នេះក្រោមការដឹកនាំរបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជាប្រមុខរាជរដ្ឋាភិបាល ដែលជាក្របខ័ណ្ឌបន្តវេនពីថ្នាក់ដឹកនាំជំនាន់មុន មកថ្នាក់ដឹកនាំបន្តវេននេះ ថាតើយើងបានគិតគួអ្វីខ្លះ ពាក់ព័ន្ធទៅនឹងការងារខាងវិស័យព័ត៌មាន និងទី៣–ថាតើអ្នកសារព័ត៌មានរបស់យើងគួរតែ ឬ ក៏ត្រូវតែធ្វើយ៉ាងម៉េច ដើម្បីលើកតម្កើនតម្លៃសារព័ត៌មាន។
ឯកឧត្តមរដ្ឋមន្ត្រី បានមានប្រសាសន៍បន្តថា កាលណាដែលយើងផលិតព័ត៌មាន អត់គុណភាព គ្មានក្រមសីលធម៌ និងវិជ្ជាជីវៈ អត់មានខ្លឹមសារ អត់មានប្រភពពិតប្រាកដ ធ្វើឲ្យគេអស់ជំនឿរទុកចិត្ត នុះអ្នកនឹងបាត់ឯង ពោលគឺដួលដោយខ្លួនឯង មិនចាំបាច់មានអ្នកច្រាន។ជាមួយគ្នានោះដែរឯកឧត្តមរដ្ឋមន្ត្រី ក៏បានលើកទឹកចិត្តឲ្យអ្នកសារព័ត៌មាន ពិសេសអ្នកដែលមិនទាន់បានចូលរៀនវគ្គបណ្តុះបណ្តាល សូមចូលរួមតាមរយះសមាគម ឬក្រសួង ដើម្បីបង្កើននូវសមត្ថភាព ឲ្យស្របទៅតាមការអភិវឌ្ឍន៍របស់សង្គមជាតិ និងវិស័យសាព័ត៌មាន ។ឯកឧត្តម រីករាយក្នុងការចូលរួម និងបើសិនជាត្រូវការវាគ្មិន ឬក៏អ្នកជំនាញបន្ថែមនោះ ក្រសួងនឹងចាត់ឲ្យមកបង្រៀន ដើម្បីពង្រឹងសមត្ថភាពអ្នកសារព័ត៌មានយើង។
ទន្ទឹមនោះឯកឧត្តម ក៏បានបញ្ជាក់ថា ក្នុងនាមរាជរដ្ឋាភិបាល សម្តេចបវរធិបតី ហ៊ុន ម៉ាណែត សូមថ្លែងអគុណចំពោះថ្នាក់ដឹកនាំសមាគមទាំងអស់ ដែលបានខិតខំប្រឹងប្រែងក្នុងការរៀបចំវគ្គបណ្តុះបណ្តាលនេះឡើង ដើម្បីបង្កើនសមត្ថភាពខ្លួនយើង និងភាពរស់រាននៃសារព័ត៌មាន ពិសេសជាងនេះទិសដៅរបស់យើងគឺបង្កើននូវតម្លៃក្នុងការផ្តល់ព័ត៌មាន ។ទាំងអស់នេះជាការបង្ហាញនូវឆន្ទៈរួម ដែលយើងត្រូវតែពួតដៃគ្នា ដើម្បីឲ្យវិស័យមួយនេះកាន់តែរឹងមាំ ទទួលស្គាល់ដោយសារធារណៈជន ហើយអ្វីដែលយើងត្រូវខិតខំប្រឹងប្រែងធ្វើ គឺជំនឿទុកចិត្តឡើងវិញ នៅក្នុងចំណោមប្រជាពលរដ្ឋ។
សូមបញ្ជាក់ផងដែរថា នារសៀលថ្ងៃខែដដែរ សមាគមសហព័ន្ធអ្នកសារព័ត៌មានសម្រាប់សន្តិភាព និងអភិវឌ្ឍន៍ បានបន្តរៀបចំពិធីបិតវគ្គបណ្តុះបណ្តាលស្តីពីការគ្រប់គ្រងព័ត៌មាន និងក្រមសីលធម៌អ្នកសារព័ត៍មាន ក្រោមអធិបតីភាពឯកឧត្តម ហ៊ុយ វណ្ណ: រដ្ឋលេខាធិការទីស្ដីការគណៈរដ្ឋមន្ត្រី និងជាប្រធានសហភាពសហព័ន្ធអ្នកសារព័ត៌មានកម្ពុជា ។ក្នុងឱកាសនោះឯកឧត្តម ហ៊ុយ វណ្ណ: ក៏បានមានប្រសាសន៍សំណេះសំណាល និងបានផ្តល់មេរៀនសំខាន់ៗជាច្រើនសម្រាប់អ្នកសារព័ត៌មានយើងយកទៅអនុវត្ត។ជាងនេះទៅទៀតឯកឧត្តម ក៏បានលើកទឹកចិត្តដល់អ្នកសារព័ត៌មាន
១–កុំភ្លេចសហការ និងសាមគ្គីគ្នា
២–កុំវាយប្រហាគ្នា ត្រូវប្រកាន់ខ្លួនឯងជាកែវភ្នែកសង្គម។ទន្ទឹមនោះឯកឧត្តមបានស្នើអោយសមាគម ស្វែងរកការដោះស្រាយជាមួយអាជ្ញាធរ ដើម្បីសហការគ្នាជាមួយអ្នកសារព័ត៌មាន ក្នុងការផ្តល់និងទទួលបានព័ត៌មានជាក់លាក់ផងដែរ៕
