មន្ទីរសាធារណការនិងដឹកជញ្ជូនខេត្តបន្ទាយមានជ័យ បើកការដ្ឋានធ្វើប្រឡាយសងខាងផ្លូវលេខ៥៨ ក្នុងក្រុងប៉ោយប៉ែត ដោយរៀបជាថ្មតាមជញ្ជាំងការពារដីបាក់ស្រុត និងចាក់ក្រាលបេតុងលើផ្លូវចាស់ដែលរងការខូចខាតដោយសារគ្រោះទឹកជំនន់ហូរច្រោះដាច់ កន្លងមក
ខេត្តបន្ទាយមានជ័យ ៖កំណាត់ផ្លូវជាតិលេខ ៥៨ ដែលរងការខូចខាតយ៉ាងដំណាំដោយសារគ្រោះទឹកជំនន់ហូរច្រោះដាច់ កាលពីកន្លងទៅនោះ ពេលនេះមន្ទីរសាធារណការនិងដឹកជញ្ជូនខេត្តបន្ទាយមានជ័យ បានដាក់កម្លាំងចុះមកធ្វើប្រឡាយសងខាងផ្លូវ ដោយរៀបជាថ្ម តាមជញ្ជាំងការពារដីបាក់ស្រុត និងចាក់ក្រាលបេតុងលើផ្លូវចាស់ដែលរងការខូចខាតដោយសារគ្រោះទឹកជំនន់ហូរច្រោះដាច់ កន្លងមកផងដែរ។សូមបញ្ជាក់ផងដែរថា ផ្លូវមួយខ្សែនេះមានសារៈសំខាន់ខ្លាំងណាស់សម្រាប់បងប្អូនប្រជាពលរដ្ឋ ពិសេសនៅតាមបន្ទាត់ព្រំដែនតែម្តង ងាយស្រួលក្នុងការធ្វើដំណើរ និងដឹកជញ្ជូនកសិផលនានាផងដែរ ហើយម្យ៉ាងវិញទៀតបងប្អូនប្រជាពលរដ្ឋអាចធ្វើដំណើរ ពីក្រុងប៉ោយប៉ែត ក្នុងខេត្តបន្ទាយមានជ័យ ទៅខេត្តឧត្តរមានជ័យ ព្រះវិហារ បានដោយងាយស្រួល ព្រោះថា ផ្លូវនេះលាតសន្ធឹងតាមបណ្តោយព្រំដែន ដែលមានទំហំធំទូលាយ និងស្រស់ស្អាត មានប្រជាពលរដ្ឋធ្វើដំណើរឆ្លងកាត់ច្រើន ដូច្នេះស្នើឲ្យបងប្អូនប្រជាពលរដ្ឋ ដែលធ្វើដំណើរ ឬក៏ដឹកទំនិញ កសិផលផ្សេងៗ ត្រូវចូលរួមសំអាតបរិស្ថាន កុំបោះចោលកាកសំណល់ផ្សេងៗនៅលើទ្រូងផ្លូវ ក៏ដូចជា សងខាងផ្លូវជាដើម ពិសេសជាងនេះរថយន្តដឹងជញ្ជូនដី សូមធ្វើការគ្របស្បៃឲ្យបានត្រឹមត្រូវ ជៀសវាងធ្លាក់អាចម៍ លើផ្លូវ និងមនុស្សបង្កជាគ្រោះថ្នាក់ដល់អាយុជីវិត។
ពាក់ព័ន្ធនិងការធ្វើប្រឡាយរបស់ក្រុមការងារមន្ទីរសាធារណការនិងដឹកជញ្ជូនខេត្តបន្ទាយមានជ័យនេះដែរ បើតាមលោក សុខ ចាន់ថា ប្រធានបន្ទីរសាធារណការនិងដឹកជញ្ជូនខេត្ត បានប្រាប់ឲ្យដឹងតាមទូរសព្ទថា ផ្លូវជាតិលេខ៥៨ ដែលរងការខូចខាតដោយសារគ្រោះជំនន់ទឹកភ្លៀងហូរច្រោះកាច់កាលពីកន្លងមក ដែលក្រុមការងារកំពុងបើកការដ្ឋានជួសជុលឡើងវិញនេះ គឺចម្ងាយ ១.៥០០ ម៉ែត្រ ដោយចាប់ពីតំបន់សេដ្ឋកិច្ចពិសេសរ៉ូយ៉ាល់គ្រប់(ROYAL GROP)រហូតដល់ទីស្នាក់ការ វរសេនាតូចនគរបាលការពារព្រំដែនគោកលេខ៨៩១ ស្ថិតនៅក្នុងសង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ដោយធ្វើប្រឡាយសងខាងផ្លូវរៀបជាថ្មតាមជញ្ជាំងដើម្បីការពារដីបាក់ស្រុត បន្ទាប់ពីនេះចាក់បេតុងក្រាលពីលើផ្លូវចាស់ដែលរងការខូចខាត ដោយចំណាយពេលបីឆ្នាំ គិតចាប់ពីឆ្នាំ២០២៣ រហូតដល់ឆ្នាំ២០២៥ ទើបបញ្ចប់ជាស្ថាពរ ដោយចំណាយថវិការបស់រដ្ឋទាំងស្រុង ។
ជាមួយគ្នានោះដែរប្រធានមន្ទីរសាធារណការនិងដឹកជញ្ជូនខេត្តបន្ទាយមានជ័យ ក៏បានសំណូមពរដល់បងប្អូនប្រជាពលរដ្ឋ ពិសេសអ្នកដែលរកស៊ីពុះដីឡូលក់ សូមបញ្ឈប់ការចាក់ដីលុបប្រព័ន្ធមុខទឹកបន្តទៀត ដើម្បីបញ្ជៀសការស្ទះពីព្រោះរយៈការកន្លងមកនេះឃើញថា មានការចាក់ដីលុបប្រព័ន្ធលូរំដោះទឹកជាហេតុធ្វើឲ្យមានការស្ទះ។ ជាមួយគ្នានោះដែរលោកប្រធាន មន្ទីរ ក៏សូមការអធ្យាស្រ័យផងដែររាល់ការប៉ះពាល់ណាមួយពីក្រុមការងារ ព្រោះការបើកការដ្ឋាននីមួយៗតែងតែមានការប៉ះពាល់ជៀសមិនផុតនោះទេ នៅពេលដែលក្រុមការងារធ្វើប្រឡាយទឹក និងផ្លូវល្អ ហើយនោះយើងនឹងងាយស្រួលក្នុងការធ្វើដំណើរ៕
